ون جىلدان كەيىن قازاقستانداعى كليمات قانداي بولادى

 استانا. KAZINFORM - ەكولوگيا جانە تابيعي رەسۋرستار مينيسترلىگى كليمات ساياساتى دەپارتامەنتى كليماتتىڭ وزگەرۋىنە بەيىمدەلۋ باسقارماسىنىڭ باس ساراپشىسى ايجان مامەداليەۆا Kazinform ساۋالىنا جولداعان جاۋابىندا ەلدەگى كليمات وزگەرىسى تۋرالى زەرتتەۋلەردىڭ العاشقى ناتيجەلەرىن ايتتى.

«قازاقستان دا ورتالىق ازيانىڭ وزگە ەلدەرى سياقتى كليمات وزگەرىسىنە وسال ەل بولىپ ەسەپتەلەدى. كەيىنگى ونجىلدىقتاردا قازاقستانداعى اۋا تەمپەراتۋراسى ايتارلىقتاي كوتەرىلدى. جىلدىق ورتاشا تەمپەراتۋرا ءار 10 جىل سايىن سەلسي شكالاسى بويىنشا 0,32 گرادۋس ارتىپ وتىر. 2030 -جىلى بۇل كورسەتكىش 1,7-1,9 گرادۋس، 2050 -جىلدارى 2,4-3,1 گرادۋس، 2100 -جىلعا قاراي 3,26 گرادۋس كوتەرىلەدى»، - دەيدى مامان.

ايجان مامەداليەۆانىڭ ايتۋىنا قاراعاندا، تەمپەراتۋرانىڭ ەكسترەمالدى دەڭگەيدە ارتۋى ادام دەنساۋلىعىنا، تابيعي ەكوجۇيەگە، اۋىل جانە سۋ شارۋاشىلىعىنا، ينفراقۇرىلىمعا كەرى اسەر ەتۋى مۇمكىن.

«جىلدىڭ ىشىندە تۇسەتىن جاۋىن-شاشىن كولەمىنىڭ وزگەرۋ قۇرعاقشىلىقتى ۋشىقتىرىپ، ەلدەگى ىلعالدىڭ قورىن ازايتىپ، سۋ تاپشىلىعىن ارتتىرۋى ىقتيمال. كليماتتىڭ وزگەرۋىنەن مۇزدىقتار ەرىپ، شولەيتتەنۋ جەدەلدەيدى. ورتالىق ازيادا مۇزدىقتار جىلىنا %0,2-1 ازايىپ جاتىر. كەيىنگى 50-60 جىلدا تيان-شان مەن پامير تاۋلارىندا مۇزدىقتار 14 تەن 30 پايىزعا ەرىپ كەتكەن»، - دەيدى ساراپشى.