ون جىلدا ەلىمىزدە 7,5 ميلليون كىتاپ مەملەكەتتىك تاپسىرىسپەن شىعارىلعان

استانا. KAZINFORM - مادەنيەت جانە اقپارات مينيسترلىگى Kazinform ساۋالىنا جولداعان جاۋاپتا كەيىنگى 10 جىلدا مەملەكەتتىك تاپسىرىسپەن نەشە كىتاپ جارىق كورگەنىن ءمالىم ەتتى.

«باسپا ىسىندە «ادەبيەتتىڭ الەۋمەتتىك ماڭىزدى تۇرلەرىن ساتىپ الۋ، باسىپ شىعارۋ جانە تاراتۋ» رەسپۋبليكالىق بيۋجەتتىك باعدارلاماسى اياسىندا جىل سايىن قوعامدىق ماڭىزى بار ادەبيەتتى ساتىپ الۋ، باسىپ شىعارۋ جانە تاراتۋ قىزمەتى جۇزەگە اسادى. اتالعان باعدارلاما ەكى باعىتتا جۇمىس ىستەيدى، ءبىرىنشى - قوعامدىق ماڭىزى بار ادەبيەتتى باسىپ شىعارۋ جانە تاراتۋ. بۇل باعىتتا 2013-2023-جىلدارى 9 ادەبيەت ءتۇرى بويىنشا 2501 كىتاپ جالپى تارالىمى 7 ميلليون 471 مىڭ 200 دانامەن باسىلىپ شىعىپ، رەسپۋبليكالىق، وبلىستىق، اۋداندىق مەملەكەتتىك كىتاپحانالارعا تاراتىلدى»، - دەپ جازىلعان رەسمي جاۋاپتا.

مەملەكەتتىك تاپسىرىسپەن جارىق كورەتىن ەڭبەكتەر 9 ادەبيەت ءتۇرى بويىنشا ىرىكتەلەدى:

ەنتسيكلوپەديالىق جانە انىقتامالىق ادەبيەت؛

بالالار جانە جاس وسپىرىمدەرگە ارنالعان ادەبيەت؛

مادەنيەت جانە ونەر تۋرالى ادەبيەت، ونىڭ ىشىندە نوتالىق ادەبيەت (نوتالىق شىعارمالاردا نوتالار شىعارمانىڭ جالپى كولەمىنىڭ 50% قۇرايدى)؛

كوركەم ادەبيەت؛

تانىمدىق ادەبيەت؛

قوعامدىق- ساياسي ادەبيەت؛

عىلىمي-كوپشىلىك ادەبيەت؛

اۋدارما ادەبيەت؛

مەرەيتويلار مەن اتاۋلى كۇندەرگە ارنالعان ادەبيەت.

«2023-جىلى قوعامدىق ماڭىزى بار ادەبيەتتى باسىپ شىعارۋ باعىتىمەن 134 اتالىم ادەبيەت جالپى تارالىمى 346 مىڭ دانامەن جارىق كورىپ، كىتاپحانالارعا تاراتىلدى»، - دەلىنگەن مينيسترلىك مالىمەتىندە.