وليمپيادانىڭ 2024 -جىلعى جابىلۋ سالتاناتى: اتاقتى سپورتشىلار مەن ساراپشىلار Jibek Joly ارناسىندا
استانا. KAZINFORM - سپورتسۇيەر قاۋىم ءۇش جىل كۇتكەن پاريج وليمپياداسى دا بۇگىن تاريح قويناۋىنان ءوز ورنىن تابادى. بيىل ەل تاريحىندا تۇڭعىش رەت بۇل جاھاندىق دودادان ەلىمىزدەگى بەس بىردەي تەلەارنا تىكەلەي ەفيردە كورسەتىلىم تاراتتى. فرانسيا استاناسىنداعى ويىنداردىڭ جارقىن ساتتەرىن كورەرمەنگە قاز قالپىندا جەتكىزۋگە اتسالىسقان Jibek Joly ارناسى ويىنداردىڭ جابىلۋ سالتاناتىنا دا قىزۋ دايىندالىپ جاتىر.
بەلگىلى سپورت كوممەنتاتورى ايبەك قابىلشا قىزدار اراسىندا باسكەتبول فينالىن جۇرگىزىپ شىققان بويدا سوزگە تارتقانبىز.
«وليمپيادا باستالعاننان بەرى Jibek Joly ارناسىندا 20 كورسەتىلىم جۇرگىزدىم. بۇل ارنانىڭ تەحنيكالىق مۇمكىندىگى اسا جاۋاپتى ەفيرلەردى ەش الاڭسىز جۇرگىزۋگە مۇمكىندىك بەردى دەپ ايتا الامىن. ونىڭ ۇستىنە كورسەتىلىمگە جاۋاپتى ۇجىم دا كىلەڭ ءوز ءىسىن بىلەتىن كانىگى مامانداردان جاساقتالعان. ادەتتە تىكەلەي ەفير كەزىندە قاربالاس كوبەيىپ، جۇيكەگە سالماق ءتۇسىپ جاتادى. ءبىراق بۇل ارناداعى 20 كورسەتىلىمنىڭ ءبارى ءبىر قارقىنمەن، ەشبىر ايقاي-سۇرەڭسىز، بايبالامسىز ءوتتى. ادام جاقسىعا تەز ۇيرەنەدى عوي. جارتى ايداي ۋاقىتتىڭ ىشىندە وسى ارناداعى جىلى قارىم- قاتىناسقا تەز-اق بوي ۇيرەتىپ قالىپپىز. جالپى كەز كەلگەن وليمپيادا بىتكەن ساتتە سپورت ءجۋرناليسىنىڭ كوڭىلىندە ءبىر قيماستىق بولادى. بۇگىن دە سوڭعى ءەفيردى جۇرگىزىپ وتىرىپ، ويىندارعا، ۇجىمعا دەگەن قيماستىق سەزىمدى سەزىندىم»، - دەيدى ارىپتەسىمىز.
كوپ وتپەي ستۋدياعا پاريج وليمپياداسىندا جۇلدەگە قول سوزىم جەردەن دزيۋدوشى ءابيبا ءابۋجاقىنوۆا كەلدى. بۇگىن ول دا يۋريي مەلنيچەنكو، يسلام بايرامۋكوۆ سياقتى داڭقتى سپورتشىلارمەن بىرگە Jibek Joly ارناسىنىڭ ەفيرىنە شىعىپ، ويىنداردىڭ جابىلۋىن قازاقستان جۇرتىمەن بىرگە تاماشالايدى.
«حالىقتىڭ قولداۋىن قاتتى سەزىنىپ جاتىرمىن. دزيۋدونى ۇزبەي كورىپ جۇرگەندەر بۇعان دەيىن حالىقارالىق جارىستاردا قۇرامانىڭ تۋىن جىقپاي، جالعىز جۇلدەگەر بولىپ ورالعان ساتتەرىمدى ەسكە سالىپ، بارىنشا دەمەپ جاتىر. وسىنىڭ ءبارى سپورتشىعا قوسىمشا قۋات، بولاشاققا سەنىم سىيلايدى ەكەن. ءبىر ايدان كەيىن ءبارىن ساراپتاپ، الداعى جارىستارعا دايىندالسام دەپ وتىرمىن. وليمپيادا ويىندارىنان كەيىن جىلدام ەس جيىپ، الداعى جوسپارىمدى پىسىقتاۋىما وسى حالىقتىڭ ىقىلاسى كوپ كومەكتەسىپ جاتىر»، - دەيدى سپورتشى.
بۇل ويىنداردا قازاقستاننىڭ مەدال قورجىنىنا «كۇمىس» سالعان سپورتتىڭ ءبىر ءتۇرى - گرەك-ريم كۇرەسى. اتلانتا وليمپياداسىنىڭ چەمپيونى، گرەك-ريم كۇرەسىنەن ۇلتتىق قۇرامانىڭ باس باپكەرى يۋريي مەلنيچەنكو ءوز جاساقتاپ اپارعان دەلەگاتسيانىڭ پاريج تورىندە كورسەتكەن ناتيجەسىنە كوڭىلى تولعانىن ايتادى.
«بۇعان دەيىنگى ەكى وليمپيادادا گرەك-ريم شەبەرلەرى جۇلدەدەن تىس قالىپ جۇرگەن. ءتىپتى بەسىنشى ورىنعا كۇرەسۋدىڭ ءوزى ارمانعا اينالعانداي ەدى. دەمەۋ جادىرايەۆتىڭ ءۇش بىردەي بەلدەسۋىندە الەمدىك رەيتينگتىڭ باسىندا تۇرعان قارسىلاستارىن ايقىن جەڭىپ، كۇمىس مەدال الدى. ونىڭ بۇل جەڭىسى كۇرەستە جۇرگەن جاستارعا ۇلكەن ءۇمىت، جىگەر بەرەدى»، - دەيدى باپكەر.
جالپى Jibek Joly ارناسىنىڭ ۇجىمى ءۇشىن وليمپيادادان تىكەلەي كورسەتىلىم تاراتۋ تاريحي كەزەڭ دەۋگە بولادى. باس رەجيسسەر گۇلسارا مۋسينا كەيىنگى ەكى اپتادا كۇن سايىن 8-9 ساعاتتىق كورسەتىلىمدەردى ءۇزىلىسسىز جۇرگىزگەندەرىن ايتادى.
«ەكى اپتا بويى ءتۇرلى سپورت تۇرىنەن كورسەتىلىم تاراتىپ، ارتىلعان سەنىمدى اقاۋسىز اتقاردىق دەپ ويلايمىن. ەندى جابىلۋ سالتاناتىن ساپالى بەرۋ ارقىلى بۇل ويىندارعا ادەمى نۇكتە قويساق دەپ وتىرمىز. ۇلكەن جوبالار كەز كەلگەن ۇجىمدى شىڭدايدى. وسى تۇرعىدان العاندا بۇل ويىندار دا ءبىزدىڭ ماماندارىمىزدىڭ تاجىريبەسىن ارتتىرىپ، ۇجىمدى جۇمىلدىرا ءتۇستى»، - دەيدى ول.
ارنا ۇجىمى ويىنداردىڭ اشىلۋ جانە جابىلۋ سالتاناتىن قوسقاندا 61 رەت تىكەلەي ەفيردەن كورسەتىلىم تاراتقان. بۇل - 134 ساعات بويى ءۇزىلىسسىز جۇمىس ىستەۋ دەگەن ءسوز.
«Jibek Joly» ۇجىمى پاريج وليمپياداسىنىڭ اشىلۋ سالتاناتىن استانانىڭ ورتالىق ساياباعىندا ۇيىمداستىرىپ، 4 مىڭ ادامعا ەستەن كەتپەس قۋانىش سىيلاعان بولاتىن. ال دەمالىس سايىن «Abu-Dhabi Plaza» ساۋدا- ويىن- ساۋىق ورتالىعىنىڭ LED ەكراندارىندا تىكەلەي ەفير كورسەتىلىمى بەرىلدى.
وسىنداي ولشەۋسىز جۇمىستىڭ ارقاسىندا ارنانىڭ سايتىنا كىرۋشىلەردىڭ سانى دا ارتقان. تىكەلەي كورسەتىلىمدەر كەزىندە ارنانىڭ سايتىنا 10 مىڭنان استام كىرگەن.
ەسكە سالساق، پاريج وليمپياداسىنىڭ جابىلۋ سالتاناتى استانا ۋاقىتىمەن ساعات 00.00-دە باستالادى. ونى «Jibek Joly» ارناسىنان تاماشالاۋعا بولادى. تەلەارنا سالتاناتتى شارانىڭ باستالۋىن كۇتپەستەن بەلگىلى ويىنداردى قورىتىندىلاۋعا ارنالعان كورسەتىلىمدى باستاپ كەتتى.
اۆتور
ەسىمجان ناقتىباي
