وليمپيادادا تاريحي جۇلدە العان سپورتشى باسشىلىق قىزمەتكە تاعايىندالدى

استانا. قازاقپارات - بەيجىڭ وليمپياداسىنىڭ قولا جۇلدەگەرى ارمان چىلمانوۆ اتىراۋداعى وليمپيادا رەزەرۆىن دايىنداۋ ورتالىعىنىڭ ديرەكتورى بولىپ تاعايىندالدى.

«جەرلەسىمىز، وليمپيادا ويىندارىنىڭ جۇلدەگەرى باسشىلىق قىزمەتكە تاعايىندالدى. 2025-جىلدىڭ 4-اقپانىنان باستاپ اتىراۋ وبلىسى دەنە شىنىقتىرۋ، سپورت جانە تۋريزم باسقارماسىنىڭ «وليمپيادالىق رەزەرۆىن دايىنداۋ ورتالىعى» ك م م ديرەكتورى بولىپ چىلمانوۆ ارمان كونستانتينوۆيچ تاعايىندالدى»، - دەپ حابارلايدى اتىراۋ وبلىسى دەنە شىنىقتىرۋ، سپورت جانە تۋريزم باسقارماسى.

ارمان چىلمانوۆ 1984-جىلى دۇنيەگە كەلگەن. تاەكۆوندودان 2008-جىلعى بەيجىڭ وليمپياداسىنىڭ قولا جۇلدەگەرى. تاەكۆوندودان وليمپيادا جۇلدەگەرى اتانعان تۇڭعىش قازاقستاندىق سپورتشى.

سونداي-اق ول الەم چەمپيوناتىنىڭ ەكى دۇركىن قولا (2007، 2009-جىلدارى)، ازيا چەمپيوناتىنىڭ ەكى دۇركىن قولا (2002، 2008-جىلدارى)، ەكى دۇركىن كۇمىس (2010، 2012-جىلدارى) جۇلدەگەرى ءارى ازيا چەمپيونى بولعان. بۇدان بولەك، ارمان شىلمانوۆ ازيا ويىندارىنىڭ ءۇش دۇركىن قولا (2002، 2006، 2010-جىلدارى) جۇلدەگەرى اتانعان.

قازاقستان رەسپۋبليكاسىنىڭ ەڭبەك سىڭىرگەن سپورت شەبەرى جانە «قۇرمەت» وردەنىنىڭ يەگەرى.

ءار جىلدارى تاەكۆوندودان قازاقستان رەسپۋبليكاسىنىڭ مەملەكەتتىك جاتتىقتىرۋشىسى، اتىراۋ ايماقتىق سپورتتى دامىتۋ ورتالىعى ديرەكتورىنىڭ ورىنباسارى، قازاقستان تاەكۆوندو فەدەراتسياسىنىڭ ۆيتسە-پرەزيدەنتى قىزمەتتەرىن اتقارعان.