وليمپيادادا قازاقستاندىق سپورتشىلاردى قولدايتىن باپكەرلەر مەن دارىگەرلەر سانى رەكوردتىق كورسەتكىشكە جەتتى

استانا. KAZINFORM - پاريج-2024 (فرانسيا) وليمپياداسىندا قازاقستان كومانداسىنا 67 باپكەر مەن قۇرامىنا دارىگەرلەر، ماسساجشىلار جانە پسيحولوگتار ەنەتىن كەشەندى عىلىمي توپتىڭ 15 مۇشەسى قولداۋ كورسەتەدى.

كوماندانى سۇيەمەلدەيتىن تۇلعالاردىڭ سانى العاش رەت قاتىسۋشىلار سانىنان ارتىپ وتىر. قوسىمشا اككرەديتاتسيالاردى قايتا جوسپارلاۋ كەزىندە سپورتشىلاردىڭ ءساتتى ونەر كورسەتۋىنە تىكەلەي اسەر ەتەتىن كاسىبي ماماندار - باپكەرلەر قۇرامى مەن سپورتتىق دارىگەرلەرگە باسىمدىق بەرىلدى.

«وليمپيادا ويىندارىنا قاتىسقان قازاقستان قۇراماسى تاريحىندا باپكەرلەر مەن دارىگەرلەر سانى سپورتشىلار سانىنان اسىپ تۇسكەن ەمەس. سۇيەمەلدەۋشى تۇلعالاردىڭ اككرەديتاتسياسى تەك قانا وليمپيادا ويىندارىنا قاتىساتىن اتلەتتەردىڭ سانىنا بايلانىستى بولىنگەن بولاتىن. الايدا، ويىندى ۇيىمداستىرۋ كوميتەتىنىڭ جاڭارعان ساناۋ جۇيەسى، سونداي-اق، ۇ و ك پەن قازاقستان تۋريزم جانە سپورت مينيسترلىگىنىڭ بىرلەسكەن ءىس-ارەكەتتەرىنىڭ ارقاسىندا بارلىق سپورتشىنىڭ جەكە جاتتىقتىرۋشىسىن جۇيەگە ەنگىزۋ مۇمكىندىگى پايدا بولدى. ەندى سپورتشىلاردىڭ جەكە باپكەرلەرى دە ۇلتتىق قۇرامانىڭ باس باپكەرلەرىمەن بىرگە جارىسقا قاتىسا الادى. قايتالاپ ايتامىن، بۇرىن-سوڭدى مۇنداي بولعان ەمەس. ءتىپتى، كەيبىر وليمپيادا ويىندارىنا پاريجدەن الدەقايدا كوپ اتلەت قاتىسسا دا، مۇنداي جاعداي تىركەلمەگەن.

ودان بولەك، ۇلتتىق قۇرامانىڭ ۇزدىك سپورتشىلارى ەلدوس سمەتوۆ (دزيۋدو) پەن نۇرسۇلتان تۇرسىنوۆتىڭ (گرەك-ريم كۇرەسى) جەكە باپكەرلەرى العاشقى كەڭەيتىلگەن تىزىمگە ەنبەي قالعانىن دا ايتۋ كەرەك. ۇ و ك-تىڭ پاريج-2024 ويىندارىن ۇيىمداستىرۋ كوميتەتى جانە ح و ك-پەن جۇرگىزگەن ۇزاق كەلىسسوزدەرىنىڭ ارقاسىندا اتالعان جاتتىقتىرۋشىلاردى اككرەديتاتسيادان وتكىزۋگە كەلىسىم بەرىلدى. ال اتلەتتەر ءۇشىن جەكە باپكەرلەرىن الماستىراتىن ەشكىم جوق ەكەنىن ۇمىتپاۋ كەرەك.

وليمپيادا كەزىندە ويىندى ۇيىمداستىرۋ كوميتەتىمەن اراداعى بارلىق قارىم-قاتىناس تىكەلەي ۇوك ارقىلى ءوربيدى جانە مەنىڭ ارىپتەستەرىم بۇعان تاس-ءتۇيىن دايىن. پاريج ويىندارىندا ۇلتتىق قۇرامانىڭ جۇمىسىن ۇيلەستىرۋگە ۇ و ك-تىڭ جەتى قىزمەتكەرى جۇمىلدىرىلعان جانە ولاردىڭ ءارقايسىسىندا وزىندىك جاۋاپكەرشىلىك ايماعى بار. ولار تەحنيكالىق جانە لوگيستيكالىق كومەك كورسەتۋ، جاتتىعۋ كەستەسى مەن تاسىمالداۋدى رەتتەۋ، جارىسقا تىركەۋ جانە تاعى دا باسقا كوپتەگەن جۇمىستى اتقارۋ ارقىلى سپورتتىق دەلەگاتسياعا جايلى جاعداي جاسايدى. قىزمەتكەرلەر تاۋلىك بويى ۇيىمداستىرۋ كوميتەتى جانە ح و ك وكىلدەرىمەن تىكەلەي بايلانىس ۇستاپ وتىر. كەز كەلگەن سپورتشى مەن كەز كەلگەن دەلەگاتسيا وكىلىندە ءبىزدىڭ ماماندار شەشەتىن شۇعىل ماسەلەلەر تۋىنداۋى مۇمكىن»، - دەيدى وليمپيادالىق اۋىلعا جاۋاپتى قازاقستان ۇ و ك سپورت دەپارتامەنتىنىڭ باسشىسى بەكتۇر قياتباي.

ايتا كەتەلىك، ۇ و ك باسشىلىعى وليمپيادا ويىندارىنا حالىقارالىق وليمپيادا كوميتەتىنىڭ شاقىرۋىمەن كەلدى جانە جارىستان بولەك، ح و ك، ا و ك، حالىقارالىق فەدەراتسيالار، سونداي-اق، وزگە ەلدەردەگى ۇ و ك وكىلدەرىمەن ەكىجاقتى كەزدەسۋلەر وتكىزۋ جوسپارلانعان. قازىرگى تاڭدا 35-تەن اسا كەزدەسۋ جوسپارلانىپ قويدى.

سونىمەن قاتار، دەلەگاتسيا قۇرامىنا 16 سپاررينگ-سەرىكتەستىڭ ەنگەنىن ايتا كەتۋ كەرەك. ولار جەكەلەگەن سپورت تۇرلەرى بويىنشا سىنعا تۇسەتىن اتلەتتەرىمىزگە وليمپيادالىق جارىس وتەتىن ايماقتاردا كومەكتەسەتىن بولادى.

2024 -جىلعى وليمپيادا ويىندارىنا 25 سپورت تۇرىنەن 80 قازاقستاندىق اتلەت ىرىكتەۋدەن ءوتتى.

اۆتور
اسحات رايقۇل