وليمپيادا التىنىنان كەيىن قازاقستاندا ەلدوس سمەتوۆتىڭ جەڭىسىنە «ورتاقتاسقاندار» كوبەيدى

استانا. قازاقپارات - دزويۋدوشى ەلدوس سمەتوۆتى پاريج وليمپياداسىنداعى جەڭىسىنەن كەيىن ەل ىشىندە اركىم ءوز جاعىنا تارتىپ جاتىر، دەپ حابارلايدى Azattyq Rýhy.

وتكەن دەمالىستا ەلدوس سمەتوۆ وليمپيادا شىڭىن باعىندىرىپ، قازاقستان قورجىنىنا العاشقى التىن سالدى. پاريجدەن جەتكەن قۋانىشتى حابار بارشا قازاق ەلىنە ەرەكشە ماقتانىش سىيلاعانى راس. وليمپيادا التىنىنان كەيىن ەلدوس سمەتوۆتىڭ جەڭىسىنە ورتاقتاسىپ، ءوز اتىن جارنامالاعاندار دا تابىلدى.

ماسەلەن، ءال-فارابي اتىنداعى قازاق ۇلتتىق ۋنيۆەرسيتەتى پاريج وليمپياداسىنىڭ چەمپيونى اتانعان ەلدوس سمەتوۆ قاز ۇ ۋ تۇلەگى ەكەنىن ەسكە سالدى.

«ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى، دزيۋدودان قازاقستان كومانداسىنىڭ بەلدى مۇشەسى ەلدوس سمەتوۆ پاريج وليمپياداسىنىڭ چەمپيونى اتاندى. بۇل - ەلىمىزدىڭ وسى الەمدىك دوداداعى العاشقى التىن مەدالى»، - دەپ جازدى ۋنيۆەرسيتەت ءوز پاراقشاسىندا.

سمەتوۆ بيولوگيا جانە بيوتەحنولوگيا فاكۋلتەتىنىڭ «دەنە شىنىقتىرۋ جانە سپورت» ماماندىعىن بىتىرگەن.

ىشكى ىستەر مينيسترلىگىنە قارايتىن ۇلتتىق ۇلان دا «ۇلاندىق وفيتسەر پاريجدە التىن الدى!» دەپ جار سالدى.

«ق ر ءى ءى م ۇلتتىق ۇلانىنىڭ سپورت كومانداسىن دايارلاۋ ورتالىعىنىڭ اسكەري قىزمەتشىسى كاپيتان ەلدوس سمەتوۆ فرانسيا استاناسىندا 60 كەلىگە دەيىنگى سالماق دارەجەسىندە ءوتىپ جاتقان 2024 -جىلعى جازعى وليمپيادادا دزيۋدودان التىن مەدال جەڭىپ الدى»، - دەپ حابارلادى ۇلتتىق ۇلاننىڭ باسپا ءسوز قىزمەتى.

سمەتوۆ وليمپياداعا قاتىسۋعا مۇمكىندىك بەرگەن ىشكى ىستەر مينيسترىنە ريزاشىلىعىن بىلدىرگەن.

«ەستەرىڭىزدە بولسا، ريو-دە-جانەيروداعى العاشقى وليمپيادادا مەن فينالعا شىققان ەدىم، ءبىراق جەڭىلدىم جانە ماراپاتتاۋ راسىمىندە قارسىلاس ەلىمنىڭ ءانۇرانى شىرقالدى. سول كەزدە مەن وليمپيادا ويىندارىندا جەڭىسىمنىڭ قۇرمەتىنە قازاقستاننىڭ ءانۇرانى شىرقالاتىن ءساتتى ەلەستەتىپ كورگەنمىن. بۇگىن سول ارمان ورىندالدى. ىشكى ىستەر ءمينيسترى پوليتسيا گەنەرال-لەيتەنانتى ەرجان سادەنوۆكە جانە ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆقا ەلىمىزدىڭ اتىنان وليمپياداعا قاتىسۋعا مۇمكىندىك بەرگەنى ءۇشىن العىسىمدى بىلدىرگىم كەلەدى»، - دەدى ەلدوس سمەتوۆ.

ەلدوس سمەتوۆ - وليمپيادا ويىندارىنىڭ ءۇش بىردەي مەدالىن جەڭىپ العان قازاق. دزيۋدوشى 2016 -جىلى ريو-دە-جانەيرودا كۇمىس، 2020 -جىلى توكيودا قولا، ال بيىل پاريجدە التىن يەلەندى.

قولدانىستاعى زاڭناما بويىنشا وليمپيادا چەمپيونىنا 250000 دوللار بەرىلەدى.