گولوۆكين بوكستى وليمپيادا باعدارلاماسىندا ساقتاپ قالۋعا ۋادە بەردى
استانا. KAZINFORM - قازاقستان ۇلتتىق وليمپيادالىق كوميتەتىنىڭ پرەزيدەنتى، World Boxing وليمپيادالىق كوميسسيا ءتوراعاسى گەننادي گولوۆكين بوكستى وليمپيادا باعدارلاماسىندا ساقتاپ قالۋعا كۇش سالاتىنىن ايتتى. بۇل تۋرالى ق ر ۇ و ك حابارلادى.
گەننادي گولوۆكين پۋەبلوداعى (ا ق ش) بوكستان U19 الەم چەمپيوناتىنىڭ قاتىسۋشىلارىمەن كەزدەستى. جارىسقا قاتىسىپ جاتقان قۇرامالارعا بەيرەسمي جاعدايدا قولداۋ كورسەتىپ، سونىمەن بىرگە جاس بوكسشىلارمەن ەستەلىككە سۋرەتكە ءتۇستى.
گەننادي گولوۆكين سپورتشىلارعا ارنالعان ۇندەۋىندە 2028-جىلعى وليمپيادا ويىندارى باعدارلاماسىندا بوكستى ساقتاپ قالۋعا باسىمدىق بەرەتىنىن اتاپ ءوتتى.
«قازىرگى تاڭدا ارالارىڭىزدا بولاشاق چەمپيوندار، لوس-اندجەلەستەگى ويىندارعا قاتىساتىن وليمپياداشىلار بار. ءوز تاراپىمنان بوكستى وليمپيادانىڭ جارىس باعدارلاماسىندا ساقتاپ قالۋ ءۇشىن قولىمنان كەلگەنىن ىستەيمىن دەپ ۋادە بەرەمىن. بيىككە ۇمتىلىڭىزدار، ماقساتتارىڭىزعا جەتۋ ءۇشىن كۇشتەرىڭىزدى اياماڭىزدار. بارلىعىنا جەڭىس جانە الەم چەمپيوناتىندا جەتىستىككە جەتۋدى تىلەيمىن»، - دەدى گەننادي گولوۆكين.
ايتا كەتەلىك، پۋەبلوداعى الەم چەمپيوناتى World Boxing اياسىندا العاش رەت ۇيىمداستىرىلعان. وعان 30 ەلدەن 180 بوكسشى قاتىسىپ جاتىر.
