ولجاس بەكتەنوۆ ديقاندارعا جەڭىلدەتىلگەن وتىننىڭ جەتكىزىلۋىن باقىلاۋدا ۇستاۋدى تاپسىردى

- مەملەكەت باسشىسىنىڭ كونستيتۋتسيالىق رەفورماسى ەلىمىزدى ودان ءارى جاڭعىرتۋعا، ونىڭ ىشىندە ەكونوميكانىڭ بارلىق سالاسىن دامىتا وتىرىپ، حالىقتىڭ ءال-اۋقاتىن ارتتىرۋعا باعىتتالعان. وسى ورايدا ازىق-تۇلىك قاۋىپسىزدىگىن كۇشەيتۋ جانە يمپورتقا تاۋەلدىلىكتى ازايتۋ وتە وزەكتى ماسەلە. قازىرگى تاڭدا باستى مىندەت - ەگىس ناۋقانىن ساپالى جۇرگىزۋ،- دەدى ۇكىمەت باسشىسى.

ونىڭ ايتۋىنشا، ۇكىمەت تاراپىنان بارلىق قاجەتتى جاعداي جاسالدى. قاراجات ءبولىندى، فەرمەرلەردى تەحنيكامەن جانە رەسۋرستارمەن قامتاماسىز ەتۋ شارالارى قابىلداندى.

- اگروتەحنولوگيالىق تالاپتار بەلگىلەنگەن نورمالارعا سايكەس مۇلتىكسىز ورىندالۋعا ءتيىس. بيىل 2,3 ميلليون توننا تىڭايتقىش سەبۋ جانە ەليتالىق تۇقىمداردىڭ ۇلەسىن 1,7 پايىزعا دەيىن جەتكىزۋ جوسپارى بەكىتىلدى. اتالعان كورسەتكىشتەرگە تولىق كولەمدە قول جەتكىزۋ كەرەك. سونىمەن قاتار وسىمدىكتەردى قورعاۋ شارالارىن ۋاقتىلى جۇرگىزىپ، ەگىس القاپتارىن ءارتاراپتاندىرۋ جۇمىسىن جالعاستىرۋ ماڭىزدى. جەڭىلدەتىلگەن وتىننىڭ جەتكىزىلۋىن جانە ونىڭ ماقساتتى پايدالانىلۋىن تۇراقتى باقىلاۋدا ۇستاۋ قاجەت،- دەدى پرەمەر-مينيستر.

ايتا كەتەيىك، بيىل كوكتەمگى دالا جۇمىستارىنا 402 مىڭ توننا ديزەل ارزانداتىلعان باعامەن بەرىلەدى.