ولجاس بەكتەنوۆ وسكەمەندەگى جارىلىستى جەكە باقىلاۋىنا الدى

- بىرىنشىدەن، وسكەمەندە بولعان جارىلىسقا قاتىستى تاڭەرتەڭ قاجەتتى تاپسىرمالاردى بەردىم. توتەنشە جاعدايلار، ەكولوگيا مينيسترلىكتەرى، وبلىس اكىمدىكتەرى قاجەتتى شارالار قابىلداپ، ماعان بايانداڭىزدار. ماسەلە مەنىڭ جەكە باقىلاۋىمدا بولادى، - دەدى ۇكىمەت وتىرىسىن اشقان پرەمەر-مينيستر.

ايتا كەتەيىك، وسكەمەندەگى كاسىپورىنداردىڭ بىرىندە جارىلىس بولدى.

وسكەمەن قالاسىندا ورنالاسقان كاسىپورىن اۋماعىندا اپات بولدى، دەپ حابارلايدى ت ج م باسپا ءسوز قىزمەتى.

ۆەدومستۆو دەرەگىنە سايكەس، شاڭ ءسۇزۋ سەحىنداعى قۇرىلعىدا گاز بەن اۋا قوسپاسى جارىلىپ، سونىڭ سالدارىنان ءورت شىعىپ، عيماراتتىڭ ءبىر بولىگى وپىرىلعان. الەۋمەتتىك جەلىدە جارىلىستىڭ ۆيدەوسى تارالىپ جاتىر.

- وقيعا ورنىنا توتەنشە جاعدايلار قىزمەتى كەلىپ، جۇمىس ىستەپ جاتىر. وپەراتيۆتىك شتاب قۇرىلدى. قازىر ماماندار زارداپ شەككەندەردىڭ بار-جوعىن تەكسەرىپ جاتىر، - دەلىنگەن حابارلامادا.