ولجاس بەكتەنوۆ پەن تايلاند ۇكىمەتىنىڭ وكىلى ەكى ەل ىنتىماقتاستىعىنىڭ كەلەشەگىن تالقىلادى
استانا. KAZINFORM - قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆتىڭ تايلاند كورولدىگى پرەمەر- ءمينيسترىنىڭ ورىنباسارى پحامتۋم ۆەچاياچايمەن كەزدەسۋى بارىسىندا ساۋدانى دامىتۋعا، تۋريزم جانە سپورت سالاسىنداعى ىنتىماقتاستىققا، سونداي-اق بىرلەسكەن ينۆەستيتسيالىق جوبالاردى ىسكە اسىرۋ جانە قازاقستاندىق ءونىم ەكسپورتىن ۇلعايتۋ پەرسپەكتيۆالارىنا قاتىستى ەكىجاقتى قارىم-قاتىناستىڭ نەگىزگى ماسەلەلەرى تالقىلاندى.
2023 -جىلى قازاقستان مەن تايلاند اراسىنداعى تاۋار اينالىمى $367 ميلليونعا جەتتى. تاراپتار كورولدىككە جەتكىزىلەتىن وتاندىق اگروونەركاسىپ كەشەنى تاۋارلارىنىڭ تۇرلەرىن كەڭەيتۋ مۇمكىندىگىن قاراستىردى. اتاپ ايتقاندا، قازاقستان ەت، كوكونىس پەن جەمىس، ءداندى داقىلدار، ۇن ونىمدەرىن، وسىمدىك مايلارىن جانە باسقا دا اوك ونىمدەرىن ەكسپورتتاۋعا مۇددەلى.
«مەملەكەت باسشىسىنىڭ تاپسىرماسى بويىنشا ءبىز اۋىل شارۋاشىلىعى ونىمدەرىن ساقتاۋ جانە ديستريبۋتسيالاۋدىڭ ءتيىستى ينفراقۇرىلىمى بار ۇلتتىق تاۋار وتكىزۋ جۇيەسىن دامىتىپ جاتىرمىز. بۇل ءبىزدىڭ ەلىمىزدە اگرو ازىق- تۇلىك حابىن قالىپتاستىرۋ ءۇشىن قاجەتتى جاعدايلار جاساۋعا مۇمكىندىك بەرەدى. وسى ماسەلەدە قازاقستان مەن تايلاند اراسىنداعى ىنتىماقتاستىقتى تەرەڭدەتۋدىڭ كەلەشەگى زور ءارى بۇل ەكى جاققا دا ءتيىمدى»، - دەپ ولجاس بەكتەنوۆ، قازاقستان مەن تايلاندتىڭ ءتيىستى ينۆەستيتسيالىق جوبالاردى ىسكە اسىرۋداعى كەڭ مۇمكىندىكتەرىن اتاپ ءوتتى.
ءوز كەزەگىندە، پحامتۋم ۆەچاياچاي تايلاند پەن قازاقستان اراسىنداعى ساۋدا-ەكونوميكالىق بايلانىستاردى نىعايتۋعا سەنىم ءبىلدىردى.
«بۇگىن تاڭەرتەڭ ءبىز ەكونوميكالىق ءوزارا ءىس-قيمىل تۋرالى كەلىسىمگە قول قويدىق. بۇل قۇجات ءارتۇرلى سالالارداعى، سونىڭ ىشىندە ساۋدا، ەكونوميكا جانە ينۆەستيتسيالارداعى ىنتىماقتاستىقتى كەڭەيتۋگە ىقپال ەتەدى دەپ سانايمىن»، - دەدى پحامتۋم ۆەچاياچاي.
كەزدەسۋ بارىسىندا تايلاند ۇكىمەتىنىڭ قازاقستان ازاماتتارىنا ۆيزاسىز رەجيم ۇسىنۋىمەن قاتار، تۋريزم سالاسىنداعى قاتىناستاردىڭ وڭ دامۋ ديناميكاسى اتاپ ءوتىلدى. پحۋكەتتە كونسۋلدىق پۋنكتىنىڭ اشىلۋى تايلاند اۋماعىندا جۇرگەن قازاقستاندىقتارعا قاجەتتى قولداۋ كورسەتۋگە مۇمكىندىك بەرەدى.
سونىمەن قاتار ترانسكاسپي باعىتىن دامىتۋ اياسىندا قازاقستاننىڭ ترانزيتتىك الەۋەتىن پايدالانۋ مۇمكىندىگى تالقىلاندى.
كەزدەسۋ سوڭىندا تاراپتار ەكى ەل اراسىنداعى ەكونوميكالىق ىنتىماقتاستىقتى تەرەڭدەتۋگە نيەت ءبىلدىردى.
