ولجاس بەكتەنوۆ شاڭحايدا وتكەن VII قىتاي حالىقارالىق يمپورت كورمەسىنىڭ اشىلۋىنا قاتىستى
استانا. KAZINFORM - پرەمەر- مينيستر ولجاس بەكتەنوۆ شاڭحاي قالاسىندا وتكەن China International Import Expo - VII قىتاي حالىقارالىق يمپورت كورمەسىنىڭ اشىلۋ سالتاناتىنا قاتىستى، دەپ حابارلايدى ۇكىمەتتىڭ باسپا ءسوز قىزمەتى.
جىل سايىنعى كوپسالالى ءىس-شارانىڭ ماقساتى -حالىقارالىق دەڭگەيدە ەكونوميكالىق ينتەگراتسيانى نىعايتۋ. كورمەگە قاتىسۋ شەتەلدىك ارىپتەستەرمەن ساۋدا-ەكونوميكالىق بايلانىستاردى كەڭەيتۋگە جانە ۇلتتىق ءونىمدى حالىقارالىق نارىققا شىعارۋعا جاڭا مۇمكىندىكتەر تۋعىزادى.
حالىقارالىق كورمەنىڭ سالتاناتتى اشىلۋ راسىمىنە قىتاي حالىق رەسپۋبليكاسى مەملەكەتتىك كەڭسەسى پرەمەرى لي شياڭ، مالايزيا پرەمەر- ءمينيسترى انۆار يبراگيم، وزبەكستان پرەمەر- ءمينيسترى ابدۋللا اريپوۆ، موڭعوليا پرەمەر- ءمينيسترى لۋۆساننامسراين ويۋۋن- ەردەنە، سەربيا پرەمەر-ءمينيسترى ميلوش ۆۋچيەۆيچ قاتىستى.
وتكەن جىلدىڭ قورىتىندىسى بويىنشا قىتايدىڭ ورتالىق ازيا ەلدەرىمەن تاۋار اينالىمىنىڭ جارتىسىنان استامى قازاقستانعا تيەسىلى بولىپ وتىر.
پرەمەر- مينيستر ولجاس بەكتەنوۆ ءوز سوزىندە مەملەكەتتەر اراسىنداعى كەدەرگىسىز ساۋدا- ساتتىق، ەلەكتروندى كوممەرتسيا، كولىك پەن لوگيستيكانى دامىتۋ، وزىق جي تەحنولوگيالارىن ەنگىزۋدە ءوزارا ءىس- قيمىلدى نىعايتۋدىڭ ماڭىزدىلىعىن اتاپ ءوتتى.
«جىبەك جولى ەلەكتروندى كوممەرتسياسى» پيلوتتىق ايماعىن قۇرۋداعى ىنتىماقتاستىقتى نىعايتۋ پەرسپەكتيۆالى بولىپ سانالادى. قازاقستاندىق پاۆيلوندار Alibaba جانە JD. com ءىرى ساۋدا پلاتفورمالارىندا تابىستى جۇمىس ىستەپ تۇر، Douyin الاڭىندا پاۆيلون اشۋ، قازاقستاندا تسيفرلىق ساۋدا ارنالارى ارقىلى لوگيستيكانى جەڭىلدەتۋ ءۇشىن بوند قويمالارى مەن كەشەندى قويما ينفراقۇرىلىمىن سالۋ بويىنشا جۇمىستار جۇرگىزىلۋدە. قازاقستان قىتايدان ەۋروپاعا جەر ءۇستى تاسىمالىنىڭ %80 دان استامىن قامتيدى. «باتىس ەۋروپا - باتىس قىتاي» حالىقارالىق ترانزيتتىك اۆتودالىزى، ليانيۋنگان پورتىنداعى لوگيستيكالىق ورتالىق، شيان قۇرعاق پورتىنداعى جۇك تەرمينالى، قىتايمەن شەكاراداعى ءۇشىنشى تەمىرجول وتكىزۋ پۋنكتى جانە باسقا دا ءىرى ينفراقۇرىلىمدىق جوبالار ترانسقۇرلىقتىق ەكونوميكالىق دالىزدەر جۇيەسىن جەتىلدىرۋگە، تاۋار اينالىمىن ۇلعايتۋعا جانە ەكى ەل حالقىنىڭ ءال-اۋقاتىن ارتتىرۋعا باعىتتالعان. قازاقستان سيفرلاندىرۋ سالاسىندا ەلەكتروندىق ۇكىمەتتىڭ دامۋ يندەكسى بويىنشا 24- ورىندى، ونلاين قىزمەتتەر بويىنشا 10- ورىندى، سونداي-اق دۇنيەجۇزىلىك بانكتىڭ رەيتينگىنە سايكەس مەملەكەتتىك تەحنولوگيالاردىڭ جەتىلۋ يندەكسىندە 6-ورىندى الادى. جاساندى ينتەللەكتىنى قولدانۋ ماسەلەلەرى بويىنشا تاجىريبە الماسۋ ەكونوميكالىق پروگرەستىڭ قوزعاۋشى كۇشى بولا الادى، دەپ اتاپ ءوتتى ولجاس بەكتەنوۆ.
ق ح ر مەملەكەتتىك كەڭەسىنىڭ پرەمەرى لي شيان جانە حالىقارالىق كورمەگە قاتىسۋشى ەلدەر دەلەگاتسيالارىنىڭ باسشىلارى تسيفرلاندىرۋ تاقىرىبىنا باعىتتالعان قازاقستاننىڭ «جاڭا ءداۋىر، ورتاق بولاشاق» ۇلتتىق پاۆيلونىندا ۇسىنىلعان ونىمدەرمەن تانىستى. ساۋدا جانە ينتەگراتسيا ءمينيسترى ارمان شاكقاليەۆ، «ۇلتتىق اقپاراتتىق تەحنولوگيالار» ا ق، Kazakh Invest، ا ح ق و، QazTrade, Kaspi Bank وكىلدەرى ەلىمىزدەگى تابىستى جوبالاردى، ونىڭ ىشىندە ەلەكتروندىق جانە قارجىلىق قىزمەتتەردى، ترانسشەكارالىق ساۋدانى دامىتۋ، ينۆەستيتسيالار تارتۋ بويىنشا جەتىستىكتەرىن تانىستىردى. سونىمەن قاتار قازاقستاندىق ازىرلەۋشىلەردىڭ ستارتاپتارى كورسەتىلدى، مىسالى: Squares - الەمنىڭ كەز كەلگەن نۇكتەسىندە ورنالاسقان جەردى جىلدام تابۋعا جانە برونداۋعا مۇمكىندىك بەرەتىن سەرۆيس؛ Alaqan AI - الاقان تامىرلارىنىڭ سۋرەتى بويىنشا جەكە تۇلعانى بيومەتريالىق سايكەستەندىرۋ سالاسىنداعى جاڭا شەشىم؛ Cerebra AI - ينسۋلتتى انىقتاۋ ءۇشىن جاساندى ينتەللەكت نەگىزىندە دياگنوستيكالىق باعدارلامانى ازىرلەۋ جانە باسقالارى بار.
قازاقستاننىڭ كوممەرتسيالىق پاۆيلونىندا بيىلعى جاڭالىق وتاندىق ءونىمدى ونلاين ساتۋ بولدى. 260 كۋادىرات مەتىر الاڭدا قازاقستاندىق وندىرۋشىلەردىڭ 50 گە جۋىق تاۋارىنىڭ - ولار ەت، ءسۇت، ماي، استىق ونىمدەرى، كونديتەرلىك ونىمدەر، شىرىندار مەن سۋسىندار، بال، توقىما جانە باسقا دا ونىمدەر كورمەسى ۇيىمداستىرىلدى. TikTok پلاتفورماسى ارقىلى ستريمينگ ىسكە قوسىلدى، بۇل ستەندكە كەلۋشىلەرگە عانا ەمەس، سونىمەن قاتار بۇكىل الەمدەگى كورەرمەندەرگە ونىمدەردىڭ اسسورتيمەنتىمەن تانىسۋعا جانە ولاردى ناقتى ۋاقىت رەجيمىندە ساتىپ الۋعا مۇمكىندىك بەرەدى. كورمەنىڭ العاشقى ساعاتتارىندا عانا ونلاين رەجيمىندە $22 مىڭعا جۋىق سوماعا قازاقستاندىق تاۋار ساتىلدى. سونداي- اق پاۆيلون بيىل 2 ەسەگە ۇلعايتىلدى، كورمەگە قاتىسۋشىلاردىڭ %80 دان استامى – ش و ب وكىلدەرى. جىل سايىن حالىقارالىق كورمەگە 300 مىڭنان استام قىتايلىق كاسىبي ساتىپ الۋشىلار قاتىسادى، بۇل ق ح ر- عا ەكسپورتتى ۇلعايتۋعا جاعداي جاسايدى.
وسىعان دەيىن قازاقستان مەن قىتايدىڭ 2,5 ميلليارد دوللارعا كەلىسىم جاساعانى تۋرالى جازدىق.
