پولشادا فەرمەرلەر نارازىلىق اكسيالارىن باستادى
استانا. KAZINFORM - ۆارشاۆادا پولشالىق فەرمەرلەر ۋكراينادان اۋىل شارۋاشىلىعى ونىمدەرىن يمپورتتاۋعا، سونداي-اق ەۋروپانىڭ ەكولوگيالىق نورمالارىنا قارسى نارازىلىق اكسيالارىن باستادى.
Uza.uz پورتالىنىڭ مالىمەتىنشە، پولشالىق فەرمەرلەر ەۋروپا كوميسسياسىنىڭ ۆارشاۆاداعى وكىلدىگىنىڭ الدىندا جينالىپ، نارازىلىق اكسياسىن وتكىزىپ جاتىر. بۇل جاعداي پولشا 2025 -جىلدىڭ ورتاسىنا دەيىن ەۋروپالىق وداققا ءتوراعالىق ەتەتىن ۋاقىتپەن تۇسپا-تۇس كەلدى.
پولشالىق فەرمەرلەر ۋكراينادان اۋىل شارۋاشىلىعى ونىمدەرىن يمپورتتاۋعا، ەۋروپانىڭ ەكولوگيالىق نورمالارىنا جانە ەلدەگى ەكونوميكالىق كورسەتكىشتەردىڭ تومەندەۋىنە قارسى نارازىلىقتارىن بىلدىرۋدە.
- ەلىمىزدەگى بارلىق اۋىل شارۋاشىلىعى ۇيىمدارى ەۋروپالىق وداقتىڭ زياندى ساياساتىنا، ءبىزدىڭ شارۋاشىلىقتارىمىزدى جابۋعا ماجبۇرلەيتىن وسى ساياساتتى باستاعان ۋرسۋلا فون دەر ليايەنگە قارسى نارازىلىق وتكىزىپ جاتىر، - دەگەن «بىرلىك» كاسىپوداق ۇيىمىنىڭ جەتەكشىسى توماش وكانسكي.
فەرمەرلەردىڭ نارازىلىعىنا اڭشىلىق قوعامداستىق وكىلدەرى دە قوسىلعان. ولار ورمانداردى پايدالانۋ جانە اڭشىلىق بويىنشا ە و مەن ۇكىمەت ساياساتىنا نارازىلىق بىلدىرۋدە.
نارازىلىق ۆارشاۆا ورتالىعىنداعى ياسنايا كوشەسىندە باستالىپ، ورتالىق كوشەلەرمەن جالعاسۋدا. پولشا استاناسىنىڭ پوليتسيا باسقارماسى فەرمەرلەر شەرۋىنە بايلانىستى بىرنەشە كوشەدە قوزعالىس توقتاتىلعانىن حابارلادى.
ءوز كەزەگىندە پولشا اۋىل شارۋاشىلىعى جانە ازىق-تۇلىك مينيسترلىگىنىڭ باسشىسى چەسلاۆ سەكەرسكي فەرمەرلەردى جۇمىس ورنىندا كۇتىپ، ولاردىڭ تالاپتارىن تىڭداۋعا دايىن ەكەنىن مالىمدەگەن.
ەسكە سالا كەتەيىك، قاراشا ايىندا پولشالىق فەرمەرلەر ۋكراينامەن شەكارادا ورنالاسقان مەدىكا - شەگيني باقىلاۋ- وتكىزۋ پۋنكتىنەن وتەتىن جولدى جۇك كولىكتەرى ءۇشىن جاۋىپ تاستاعان ەدى.
بۇدان بولەك، ماجارستاننىڭ ە و-عا ءتوراعالىعى اياقتالىپ، 1-قاڭتاردان باستاپ ەۋروپالىق كەڭەستى پولشا باسقاراتىنى ايتىلدى.
