ولاردى سپورت تابىستىردى: قازاقستانداعى سپورتشى جۇپتاردى بىلەسىز بە؟
استانا. قازاقپارات – 15-مامىر - حالىقارالىق وتباسى كۇنى. سپورت ارقىلى ءوزىنىڭ سۇيىكتى كاسىبىن عانا ەمەس، ومىرلىك جارىن دا تاپقان ساڭلاقتارىمىز از ەمەس. ەندەشە حالىقارالىق وتباسى كۇنى اياسىندا سپورتتاعى ءبىرقاتار جۇپتى نازارلارىڭىزعا ۇسىنامىز.
نۇرقوجا قايپانوۆ پەن ماريا سەدنيەۆا
نۇرقوجا - ەركىن كۇرەستەن الەم جانە 3 دۇركىن ازيا چەمپيونى. ال جارى - حالىقارالىق رەيتينگتىك جارىستاردىڭ جەڭىمپازى، قازاقستان چەمپيوناتى مەن كۋبوگىنىڭ چەمپيونى.
اسحات جىتكەيەۆ پەن ەلەنا پاۆلوۆا
ەكەۋى دە 2008-جىلى وتكەن بەيجىڭ وليمپياداسىنا قاتىسقان. دزيۋدوشى اسحات جىتكەيەۆ سول ويىنداردا كۇمىس جۇلدەگە يە بولدى. سونداي-اق ول - الەم چەمپيوناتىنىڭ قولا جۇلدەگەرى، 2 دۇركىن ازيا چەمپيونى، ازيا ويىندارىنىڭ 3 دۇركىن قولا مەدال يەگەرى. ەلەنا - ۆولەيبولدان كلۋبتار اراسىندا ازيا چەمپيونى، يسپانيا جانە شۆەيتساريا چەمپيوناتتارىنىڭ جەڭىمپازى.
ولجاس جانە ايگەرىم ساتتىبايەۆتار
نۇرقوجا مەن ماريا سياقتى، ولجاس پەن ايگەرىم دە ءبىر سپورت تۇرىمەن شۇعىلدانعان. قازىرگى تاڭدا ولجاس سپورتتىق مانسابىن اياقتاسا، جۇبايى ايگەرىم ءالى دە شارشى الاڭدا ونەر كورسەتىپ ءجۇر. ول بىلتىر تايلاند كورولدىگىنىڭ چيانگماي قالاسىندا وتكەن ازيا چەمپيوناتىندا قولا جۇلدە جەڭىپ العان. سونداي-اق ايگەرىم - كوپتەگەن حالىقارالىق تۋرنيردىڭ جەڭىمپازى. ال ولجاس - ريو وليمپياداسىنىڭ قاتىسۋشىسى، بۇكىلالەمدىك بوكس سەرياسىنىڭ (WSB) 2 دۇركىن چەمپيونى، ازيا چەمپيونى جانە قولا جۇلدەگەرى. اسكەريلەر اراسىنداعى الەم چەمپيوناتىندا توپ جارعان.
يسلام جانە الينا ساتپايەۆتار
يسلام مەن الينا - ءبىر سپورت تۇرىمەن شۇعىلداناتىن جۇپ. يسلام - نىسانا كوزدەۋدەن پاريج وليمپياداسىنىڭ جانە جازعى ازيا ويىندارىنىڭ قولا جۇلدەگەرى، قازاقستان رەكوردسمەنى، الەم كۋبوگىنىڭ بىرنەشە دۇركىن جۇلدەگەرى. الينا دا نىسانا كوزدەۋ سپورتىنان ءبىرقاتار جەتىستىككە قول جەتكىزگەن. اتاپ ايتقاندا، ول - حالىقارالىق جارىستاردىڭ جەڭىمپازى، قازاقستان رەسپۋبليكاسى VI جازعى سپارتاكياداسىنىڭ، چەمپيوناتى مەن كۋبوگىنىڭ چەمپيونى.
ديدار ءامىرالى مەن ءمولدىر جاڭبىرباي
ديدار - كاراتەدەن (WKF) جازعى ازيا ويىندارىنىڭ 2 دۇركىن (كۇمىس جانە قولا) جۇلدەگەرى، الەم چەمپيوناتىنىڭ قولا جۇلدەگەرى. سونداي-اق ازيا چەمپيوناتىندا بىرنەشە مارتە جۇلدە العان.
ءمولدىر - كاراتەدەن قازاقتان شىققان تۇڭعىش الەم چەمپيونى، جازعى ازيا ويىندارىنىڭ كۇمىس جۇلدەگەرى، ازيا چەمپيونى. ەڭ بەدەلدى جارىس سانالاتىن پرەمەر-ليگا تۋرنيرىنىڭ قورىتىندىسى بويىنشا ۇزدىك كاراتەشى اتانعان.
ناريمان جانە ايدا قۇربانوۆتار
سپورتتىق گيمناستيكامەن اينالىساتىن ناريمان - پاريج وليمپياداسىنىڭ كۇمىس جۇلدەگەرى، الەم كۋبوگى كەزەڭدەرىنىڭ جەڭىمپازى. سونداي-اق ونىڭ ەنشىسىندە ازيا ويىندارىنىڭ، يسلام ىنتىماقتاستىعى ويىندارىنىڭ، ۋنيۆەرسيادا مەن ازيا چەمپيوناتىنىڭ جۇلدەلەرى بار.
گيمناست ايدا - يسلام ىنتىماقتاستىعى ويىندارىنىڭ جەڭىمپازى جانە بىرنەشە دۇركىن جۇلدەگەرى، ازيا چەمپيوناتىنىڭ قولا جۇلدەگەرى.
كونستانتين مالينوۆسكي مەن ارينا التۋحوۆا
ەكەۋى دە ءبىر سپورت تۇرىمەن اينالىسىپ، بىلتىر پاريج وليمپياداسىنا قاتىسقان. نىسانا كوزدەۋدەن ازيا چەمپيوندارى، الەم كۋبوگى كەزەڭدەرىنىڭ جەڭىمپازدارى جانە بىرنەشە دۇركىن جۇلدەگەرلەرى.
داستان مەن ايسۇلۋ مۇقاشبەكوۆتەر
داستان - يادرو لاقتىرۋدان پاريج پاراليمپياداسىنىڭ قولا جۇلدەگەرى. ايسۇلۋ - پارا نىسانا كوزدەۋدەن حالىقارالىق جارىستاردىڭ جەڭىمپازى.
ايتا كەتەيىك، بۇل - قازاق سپورتىنداعى وتباسىلاردىڭ ءبىر پاراسى عانا. بۇدان بولەك، سپورت - كوپتەگەن كوماندانى، دوستاردى وتباسى رەتىندە بىرىكتىرەتىن ىقپالدى كۇش.
