ءار قويشىعا ءۇي بەرىلگەن، Wi-Fi ورناتىلعان: اۋليەاتاداعى كاسىپكەر جۇمىس ورنىن كوبەيتۋدى جوسپارلاپ وتىر
شارۋاشىلىق يەسى ناريمان ماۋلەنوۆ بۇل كاسىپپەن 2018- جىلدان بەرى اينالىسىپ كەلەدى.
اراعا ەكى جىل سالىپ (2020 -جىلى) كاسىبىن كەڭەيتۋ ماقساتىندا «اگرارلىق نەسيە كورپوراتسياسى» ا ق جامبىل وبلىس بويىنشا فيليالى ارقىلى 165 ميلليون تەڭگە نەسيەگە العان. سول قاراجاتقا 3 مىڭ باس اسىل تۇقىمدى (ءجۇندى قۇيرىقتى) قوي مەن قاجەتتى تەحنيكالار ساتىپ العان. ساتىپ العان ءۇش مىڭ باس قويدىڭ باسىن قولدان ۇرىقتاندىرۋ ارقىلى 8 مىڭعا دەيىن جەتكىزگەن. قازىر مال جايىلاتىن جەردىڭ جالپى اۋماعى - 21 مىڭ گەكتار. قويدى سۋعارۋ ىڭعايلى ءارى جىلدام بولۋ ءۇشىن قۇدىق قاسىنا موتور ورناتىلعان. قوجالىق يەسى ناريمان ماۋلەنوۆتىڭ باستى ماقساتى - ەلباسى ۇسىنعان «تۋعان جەرگە تۋىڭدى تىك» باعدارلاماسىن قولداپ، جەرگىلىكتى تۇرعىنداردى جۇمىسپەن قامتۋ.
قازىر شارۋا قوجالىعىندا ەڭبەك ەتىپ جۇرگەن 20 جۇمىسشى بار. ولاردىڭ الاتىن ايلىق جالاقىسى ورتاشا ەسەپپەن 150 مىڭ تەڭگە. مال باعاتىن 9 قويشىنىڭ ءارقايسىنا ءبىر- ءبىر ۇيدەن بەرىلگەن. ەكى بولمەلى ۇيدە ىستىق سۋ، دۋش، مونشا جانە Wi-Fi ورناتىلىپ، قاجەت جيھازدارمەن جابىقتالعان. ونداعى تاعى ءبىر ەرەكشەلىك - كۇن كوزىنەن قۋات الاتىن قوندىرعىلار. جاڭادان سالىنعان ۇيلەردىڭ اينالاسىندا 100 ءتۇپ تال، بارلىعى 1000 اعاش وتىرعىزىلعان. قارا اعاشتارمەن قاتار ءتۇرلى جەمىس اعاشتارى دا بار. الداعى ۋاقىتتا تاعى 1000 تال وتىرعىزۋ جوسپارلانىپ وتىر.
شارۋالاردىڭ ايتۋىنشا، بۇل ءۇيدىڭ اينالاسىن كورىكتى ەتىپ قانا قويماي، اپتاپ ىستىققا ءتورت تۇلىك مالعا كولەڭكە بولادى ەكەن. «تابىس» شارۋا قوجالىعى بورداقىلاۋ الاڭىن اشىپ، جۇمىس ورنىن ارتتىرۋ 2022 -جىلدىڭ باستى جوسپارى رەتىندە قاراستىرىپ وتىر. ونىڭ جوبالىق- سمەتالىق قۇجاتتاماسى 120 ميلليون تەڭگەنى قۇرايدى.