08:58, 09 - ناۋرىز 2021 | GMT +6
قازاقستاندىق بوكسشىلاردىڭ WBC بويىنشا جاڭارتىلعان رەيتينگتەگى ورنى انىقتالدى
نۇر-سۇلتان. قازاقپارات - بۇكىل الەمدىك بوكس كەڭەسىنىڭ (WBC) بارلىق سالماق بويىنشا جاڭارتىلعان رەيتينگى جاريالاندى، دەپ حابارلايدى قازاقپارات ءتىلشىسى.
العاشقى اۋىر سالماق بويىنشا قامشىبەك قوڭقابايەۆ 29-ورىنعا تۇراقتادى. ول بۇدان بۇرىن 37-ورىندا تۇرعان بولاتىن.
ەستەرىڭىزگە سالا كەتەلىك، 28- اقپاندا كاسىپقوي بوكستان وتكەن جەكپە-جەكتە قامشىبەك قاتارىنان ءۇشىنشى مارتە جەڭىسكە جەتتى.
ەكىنشى ورتا سالماق ديۆيزيونىندا ايدوس ەربوسىن ۇلى ءبىر ساتىعا جوعارىلاپ، 11-ورىنعا كوتەرىلدى.
ال ورتا سالماقتا باق سىناپ جۇرگەن جانىبەك ءالىمحانۇلى 6، مەيىرىم نۇرسۇلتانوۆ 15-ورىنعا جايعاستى.
ءبىرىنشى ورتا سالماق ديۆيزيونىندا سادريددين احمەدوۆ ءبىر ساتىعا تومەندەپ، 18-ورىنعا تابان تىرەدى.
تۇرسىنباي قۇلاحمەت تە ءبىر ساتىعا تومەن ءتۇسىپ، 28-ورىندى مىسە تۇتتى. ورتا سالماقتاعى دانيار ەلەۋسىنوۆ 23-ورىننان 22-ورىنعا كوتەرىلسە، باتىر جۇكەمبايەۆ ءبىرىنشى ورتا سالماقتا سەگىزىنشى ورنىن ساقتاپ قالدى.