وباما ترامپتىڭ مەملەكەتكە وپاسىزدىق جاسادى دەگەن مالىمدەمەسىن جوققا شىعاردى
استانا. KAZINFORM – ا ق ش- تىڭ بۇرىنعى پرەزيدەنتى باراك وبامانىڭ وكىلى دونالد ترامپتى ءوزىنىڭ الدىنداعى پرەزيدەنتتى 2016 جانە 2020-جىلدارداعى «ساتقىندىق جاسادى» جانە سايلاۋدى بۇرمالادى دەپ ايىپتاعاننان كەيىن سىنعا الدى، دەپ حابارلايدى NBC News.
- پرەزيدەنت اپپاراتىنا دەگەن قۇرمەتپەن ءبىز ادەتتە اق ۇيدەن شىعاتىن ساندىراق پەن جالعان اقپاراتقا جاۋاپ بەرە بەرمەيمىز. ءبىراق وسى جولعى مالىمدەمەگە جاۋاپ بەرۋىمىزگە تۋرا كەلدى. بۇل وعاش ايىپتاۋلار كۇلكىلى ءارى نازار اۋدارتۋدىڭ ءالسىز ارەكەتى، - دەدى وبامانىڭ باسپا ءسوز حاتشىسى پاتريك رودەنبۋش.
سەيسەنبى كۇنى ترامپ وبامانى سايلاۋدى بۇرمالاۋعا تىرىستى دەپ ايىپتادى.
- ولاردىڭ ماعان جاساعانىنان كەيىن، بۇنىڭ دۇرىس-بۇرىستىعىنا قاراماستان جۇرتتىڭ كوزىن اشاتىن كەز كەلدى. وباما بىردەن ۇستالدى. ولاردىڭ 2016 جانە 2020-جىلدارى ىستەگەندەرى - ناعىز قىلمىس. بۇل جوعارى دارەجەلى قىلمىس. ول - قىلمىسكەر. بۇل وپاسىزدىق بولدى، - دەدى دونالد ترامپ.
ترامپ ۇلتتىق بارلاۋ ديرەكتورى تۋلسي گاببارد پەن ورتالىق بارلاۋ قىزمەتىنىڭ ديرەكتورى دجون رەتكليففتىڭ الەۋمەتتىك مەديا مەن تەلەديدارداعى مالىمدەمەلەرىنە سىلتەمە جاساپ، ولار وباما اكىمشىلىگىنىڭ شەنەۋنىكتەرى بارلاۋ مالىمەتتەرىن قولداندى جانە ترامپتىڭ 2016-جىلعى سايلاۋداعى جەڭىسىنىڭ زاڭدىلىعىنا نۇقسان كەلتىرۋ ءۇشىن ءسوز بايلاستى دەپ سانايدى.
گاببارد الەۋمەتتىك جەلىدە ادىلەت دەپارتامەنتىنە قىلمىستىق ءىس قوزعاپ جاتقانىن جاريالادى.
كونگرەستە رەسپۋبليكاشىلدارمەن كەزدەسۋىندە ترامپ گابباردتى ماقتاپ، وبامانى سايلاۋدى بۇرمالاۋعا قاتىستى دەپ تاعى دا ايىپتادى.
- بۇل قاتىگەز، سۇمدىق ادامدار، - دەدى ول بۇرىنعى پرەزيدەنت جانە باسقالار تۋرالى.
بۇعان دەيىن ترامپ وبامانى 2016-جىلعى سايلاۋدى بۇزدى دەپ ايىپتاعان.
ترامپ سونىمەن قاتار بۇرىنعى پرەزيدەنت دجو بايدەن مەن ونىڭ كومەكشىلەرىنە قاتىستى تەرگەۋ جۇرگىزۋگە بۇيرىق بەردى.
