وپا-دالاپ، شەگە جانە كارتون قيىندىسىمەن سۋرەت سالاتىن الماتىلىق جاس جىگىت كىم؟
استانا. قازاقپارات - ەل اراسىندا تۋما تالانتتار از ەمەس. سونىڭ ءبىرى بەساسپاپ سۋرەتشى راۋاج جارىلقاسىن. سۋرەت ونەرىنىڭ سان سالاسىن مەڭگەرگەن ونىڭ تالانتىنا ءتانتى بولماۋ مۇمكىن ەمەس. سۋرەتتى كوك سيامەن دە، قارىنداشپەن دە، بوياۋمەن دە، ءتىپتى وپا-دالاپپەن، شەگەمەن دە سالا بەرەدى. كارتون قيىندىلارىنان پورترەت تۇرعىزاتىن ونەرى تاعى بار. ءبىر قىزىعى بۇنىڭ ءبارىن وعان ەشكىم ۇيرەتپەگەن. 5-6 جاستاعى كەزىنەن قىلقالامدى قولىنا سەرىك ەتىپ، سۋرەت سالۋدى ءوز بەتىنشە ۇيرەنىپ العان. ونىڭ ونەرىنە تامساناتىن جۇرتشىلىق تا جەتەرلىك. قولىنان شىققان تۋىندىلارىن جۇكتەي ءجۇرىپ، تيك- توك الەۋمەتتىك جەلىسىندە 300 مىڭنان استام وقىرمان جيناعان. تالانتتى جىگىتكە ءبىزدىڭ دە كوزىمىز ءتۇسىپ، سۇحبات العان ەدىك.
«مەن ءوزىم 2002 -جىلى قاراقالپاقستاندا تۋدىم. قازىر جاسىم 22-دە. 3-4 جاسىمدا قازاقستانعا قونىس اۋداردىق. كوشىپ كەلگەن سوڭ ون جىلداي قاسكەلەڭ قالاسىندا پاتەر جالداپ تۇردىق. اكە-شەشەم، اپكەم مەن ءىنىم بار. اكەم تاكسي قىزمەتىندە، انام ءۇي شارۋاسىندا. 2016 -جىلى قاسكەلەڭنەن قاراساي اۋدانىنا قاراستى ۇلان اۋىلىنا كوشىپ، ءۇي سالدىق. وسى اۋىلعا كەلگەلى بەرى مەنىڭ تىنىسىم اشىلىپ، شىعارماشىلىعىممەن ەركىن اينالىسا باستادىم. سەبەبى اكەم ءۇي تۇرعىزعاندا وزىمە كىشكەنتاي بولمە سالىپ بەردى. قازىر وسى بولمە مەنىڭ شەبەرحاناما اينالىپ كەتكەن. ءتۇننىڭ ءبىر ۋاعىنا دەيىن سوندا سۋرەتىمدى سالىپ وتىرا بەرەمىن. اۋىلدا ۋ-شۋ جوق، تابيعاتى كەرەمەت. كورشىلەرىمىز دە جاقسى، بىرگە ۋاقىت وتكىزەتىن دوستار تاۋىپ الدىم»، - دەيدى ول.
راۋاج سۋرەتپەن عانا شەكتەلمەي، بالا كۇنىنەن قولونەرمەن اينالىسقان. وكىنىشكە قاراي تالانتىن ەرتەرەك دامىتىپ، شىڭداۋعا قول قىسقالىق ەتىپتى.
«نەگىزى مۇنىڭ ءبارى قاسكەلەڭدە تۇرىپ جاتقان كەزىمىزدە كورشى دوستارىم بولماعان سوڭ باستالدى. تۇيىق بالا بولدىم. تاڭنىڭ اتىسى، كەشتىڭ باتىسى زەرىگەمىن. ول كەزدە سمارتفون، ينتەرنەت جوق. تەك تەلەديدار بار. تۋعان اپكەم ول كەزدەرى 2-سىنىپتا وقيتىن ەدى. مەن ءالى مەكتەپكە بارماعام. اپكەمنىڭ چەرنوۆيك قاعازدارىن سۇراپ الىپ، سۋرەت سالا باستادىم. تەلەديداردان كورسەتەتىن كينولاردان، مۋلتفيلمدەردەن، كەيىپكەرلەردەن شابىت الىپ، قاعازعا تۇسىرەتىنمىن. مىسالى ورمەكشى ادام، بەتمەن، سۋپەرمەن سياقتى كەيىپكەرلەردى سالدىم. ەشقانداي ۇستازىم بولمادى. بالا كەزىمدە ۇيىرمەلەرگە بارىپ، سۋرەتتىڭ قىر-سىرىن مەڭگەرگىم كەلەتىن. ءبىراق اتا-انامنىڭ اقىلى ۇيىرمەلەرگە بەرەتىن جاعدايى بولمادى. انام ءوزى بالا كۇنىندە سۋرەت سالعان ەكەن. ماعان دا سۋرەتشىلىك ونەر انامنان دارىعان سياقتى» - دەيدى راۋاج.
بۇرىن تەك دوستارىنا 1-2 مىڭ تەڭگەگە سۋرەت سالىپ بەرىپ ءجۇرىپتى. داياشى، اۆتوجۋۋشى، كلينەر بولىپ تا جۇمىس ىستەپتى. ءبىراق مۇنداي جۇمىستاردىڭ وزىنە قول ەمەستىگىن تۇسىنگەن ول ءبارىن قويىپ، جاقىندا تاپسىرىسقا سۋرەت سالۋدى باستاعان. قازىر قالاداعى قابىرعالارعا ءتۇرلى سۋرەت تاڭبالايدى، تاپسىرىسقا پورترەت سالادى. دەگەنمەن تيك-توك پاراقشاسىندا 300 مىڭنان استام وقىرمانى بولسا دا، بۇل ءىسى وعان اسا ءبىر تابىس اكەلمەيتىن كورىنەدى. ايتسەدە جاس جىگىت ءالى دە بولسا «سۇيىكتى ىسىممەن كوپ تابىس تاۋىپ، اتا-اناما كومەكتەسەمىن» دەگەن ءۇمىتى بارىن جاسىرمادى. قازىرگى ماقساتى - وقۋىن ابىرويمەن ءتامامداۋ.
«قازىر تۇرىپ جاتقان اۋىلىمىزداعى مەكتەپتى 2022 -جىلى ءبىتىردىم. سوسىن اباي اتىنداعى ۋنيۆەرسيتەتكە قۇجات تاپسىردىم. ءبىراق گرانتقا تۇسە الماي قالدىم. سودان كەيىن قاسكەلەڭ مادەنيەت كوللەدجىنە «قولونەر» ماماندىعىنا ءتۇستىم. ول جەردە 1 جىل عانا وقىدىم. جىل سوڭىندا «گرانت ءبولىنىپ جاتىر» دەپ، اباي ۋنيۆەرسيتەتى مەنى وقۋعا شاقىرىپ الدى. كوللەدجدەن بىردەن ۋنيۆەرسيتەتكە اۋىسىپ كەتتىم. ءدال قازىر 3-كۋرس ستۋدەنتىمىن. ماماندىعىم - كەسكىندەمەشى. اۋىلدان قالاعا قاتىناپ وقيمىن. بولاشاقتا ءوزىمدى قالاي كورەمىن، ونى بىلمەيمىن، ءتىپتى ەلەستەتە دە المايمىن. بۇيىرعانىن كورەمىز. ارمانىم سونداي كوپ ەمەس. ۇلكەن ءبىر ارمانىم - ءوز مۋزەيىمدى اشۋ. حالىق كەلىپ، تۋىندىلارىمدى ءوز كوزىمەن كورسە دەيمىن. الەۋمەتتىك جەلىدەگى وقىرمانداردىڭ، حالىقتىڭ قولداۋى ماعان ەرەكشە شابىت بەرەدى»، - دەيدى ءوزى.
جاس تالانتقا ساتتىلىك تىلەيمىز! جولى اشىق بولسىن!
دەرەككوزى turkystan.kz
