ون مىڭ ەمەس: ارىقتاۋ ءۇشىن كۇندەلىكتى قانشا قادام ءجۇرۋ كەرەك؟
استانا. قازاقپارات - European Association for the Study of Obesity ۇسىنعان جاڭا زەرتتەۋگە سايكەس، ارىقتاعىسى كەلەتىن نەمەسە سالماق تاستاعاننان كەيىن ونى قايتا قوسپاۋعا تىرىساتىن ادامدار ءۇشىن كۇنىنە شامامەن 8500 قادام ءجۇرۋ ءتيىمدى بولۋى مۇمكىن، دەپ حابارلايدى Euronews.com-عا سىلتەمە جاساپ.
عالىمدار 4 مىڭعا جۋىق ادام قاتىسقان بىرنەشە كلينيكالىق زەرتتەۋدى تالداعان. ناتيجەسىندە دۇرىس تاماقتانۋ مەن جاياۋ ءجۇرۋدى قاتار ۇستانعان ادامداردىڭ تاۋلىكتىك ورتاشا قادام سانى 8454 كە جەتىپ، دەنە سالماعى شامامەن %4,39 عا ازايعان. بۇل ورتا ەسەپپەن 4 كەلىگە جۋىق سالماق تاستاۋعا تەڭ.
مارۆان ەل گوچ سالماق تاستاۋدان دا قيىنى - سول ناتيجەنى ۇزاق ۋاقىت ساقتاۋ ەكەنىن ايتادى. زەرتتەۋشىلەردىڭ مالىمەتىنشە، ارتىق سالماعى بار ادامداردىڭ شامامەن %80 ى 3- 5 جىل ىشىندە جوعالتقان سالماعىنىڭ ءبىر بولىگىن نەمەسە تۇگەلىن قايتا قوسىپ الادى.
مامانداردىڭ پىكىرىنشە:
- سالماق تاستاۋ كەزەڭىندە كۇنىنە شامامەن 8500 قادام ءجۇرۋ؛
- كەيىن دە وسى بەلسەندىلىك دەڭگەيىن ساقتاۋ؛
- جاياۋ ءجۇرۋدى دۇرىس تاماقتانۋمەن قاتار ۇشتاستىرۋ ماڭىزدى.
زەرتتەۋ اۆتورلارى جاياۋ ءجۇرۋدىڭ باستى ارتىقشىلىعى ونىڭ قولجەتىمدى ءارى ۇزاق ۋاقىت ساقتاۋعا بولاتىن ادەت ەكەنىنە نازار اۋدارادى. قاتاڭ جاتتىعۋلارعا قاراعاندا، كۇندەلىكتى سەرۋەندى ءومىر سالتىنا ەنگىزۋ الدەقايدا جەڭىل.
دەگەنمەن، قاجەتتى قادام سانى ادامنىڭ جاسىنا، دەنساۋلىعىنا جانە ءومىر سالتىنا بايلانىستى وزگەرۋى مۇمكىن. ءتىپتى كۇندەلىكتى قوزعالىستى 3- 4 مىڭ قادامنان 6-7 مىڭ قادامعا دەيىن ارتتىرۋدىڭ ءوزى دەنساۋلىققا پايدالى اسەر ەتىپ، سالماقتى بىرتىندەپ ازايتۋعا كومەكتەسەدى.
