تۇركيادا شوشقا ەتىنە قاتىستى زاڭبۇزۋشىلىقتار تىركەلدى
استانا. KAZINFORM - تىيىمعا قاراماستان، تۇركيانىڭ ءبىرقاتار پروۆينتسيالارىندا ساتىلاتىن ونىمدەرگە شوشقا ەتى قوسىلىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تۇركيانىڭ اۋىل جانە ورمان شارۋاشىلىعى مينيسترلىگى ەلدىڭ ءتۇرلى ايماقتارىندا شوشقا ەتىنىڭ تارالۋىنا قاتىستى سوڭعى تەكسەرىس ناتيجەلەرىن جاريالادى. جاريالانعان تىزىمگە سايكەس، شوشقا ەتى ەڭ كوپ ساتىلاتىن التى پروۆينتسيا - بۋرسا، كونيا، انتاليا، مۋگلا، بالىكەسير جانە ادانانىڭ اتى اتالدى.
مينيسترلىك ەرەكشە نازار اۋدارعان وڭىرلەر - ءداستۇرلى تۇردە كونسەرۆاتيۆتى كوزقاراستاعى جانە ءدىني ۇستانىمدارى باسىم تۇرعىندارى بار بۋرسا مەن كونيا قالالارى. بۇل جەرلەردە شوشقا ەتى قوسىلعان ونىمدەردىڭ كوپتەپ تابىلۋى كۇتپەگەن جاعداي بولدى.
تۋريستەر ءجيى كەلەتىن انتاليا مەن مۋگلادا شوشقا ەتىنە سۇرانىس شەتەلدىك قوناقتار تاراپىنان بولعانىمەن تۇسىندىرىلەدى. الايدا مينيسترلىكتىڭ مالىمەتىنشە، كەيبىر مەكەمەلەردە كەلۋشىلەرگە تاعام قۇرامىنا قاتىستى تولىق اقپارات بەرىلمەيدى، بۇل ءوز كەزەگىندە شاعىمداردىڭ كوبەيۋىنە سەبەپ بولعان.
انىقتالعان زاڭ بۇزۋشىلىقتارعا بايلانىستى اۋىل جانە ورمان شارۋاشىلىعى مينيسترلىگى قوعامدىق تاماقتانۋ جانە ساۋدا ورىندارىنا باقىلاۋدى كۇشەيتىپ، ءونىم قۇرامىن دۇرىس كورسەتپەگەن كومپانيالاردىڭ ءتىزىمىن جاريالادى. سونداي-اق ازاماتتارعا ءونىم جاپسىرمالارىن مۇقيات تەكسەرۋدىڭ ماڭىزدىلىعىن ەسكەرتىلىپ جاتىر.
تەكسەرىس ناتيجەلەرى مەن ەرەجە بۇزعان كاسىپورىندار تۋرالى وزەكتى اقپاراتتى مينيسترلىكتىڭ رەسمي سايتىنان كورۋگە بولادى: guvenilirgida.tarimorman.gov.tr.
مينيسترلىك تۇتىنۋشىلاردى قىراعى بولۋعا جانە تاعام ونىمدەرىندەگى جالعان اقپاراتقا قاتىستى دەرەۋ حابارلاۋعا شاقىرادى.
بۇعان دەيىن ءبىز كودجاەلي پروۆينتسياسىنا قاراستى كەرفەز قالاسىندا 600 دەن استام ادامنىڭ تاۋىق دونەرىنەن ۋلانىپ قالعانى تۋرالى جازعان ەدىك.
ەسكە سالا كەتەيىك، بۇعان دەيىن تۇركيا قوناقۇيلەردىڭ جاپپاي جابىلۋى تۋرالى قاۋەسەتتى جوققا شىعارعانىن جازعان ەدىك.
