تيمۋر سۇلەيمەنوۆ بانكتەردى بيزنەسكە قولايلى جاعداي جاساۋعا شاقىردى

الماتى. KAZINFORM - الماتىدا «قازاقستاننىڭ قارجى سەكتورى: ستراتەگيالىق سىن-قاتەرلەرگە 25 جىل» اتتى قارجىگەرلەر فورۋمى ءوتىپ جاتىر.

ق ر ۇلتتىق بانك ءتوراعاسى تيمۋر سۇلەيمەنوۆ ەلىمىزدىڭ ەكونوميكالىق دامۋىن قامتاماسىز ەتۋدەگى قارجى سەكتورىنىڭ ءرولى تۋرالى ايتتى.

ق ر ۇلتتىق بانك ءتوراعاسى تيمۋر سۇلەيمەنوۆ ەلىمىزدىڭ ەكونوميكالىق دامۋىن قامتاماسىز ەتۋدەگى قارجى سەكتورىنىڭ ءرولى تۋرالى ايتتى.

«ءبىز قازىر جاڭا مىندەتتەر الدىندا تۇرمىز. مەملەكەت باسشىسى ناقتى سەكتوردى نەسيەلەندىرۋدىڭ جىل سايىنعى ءوسىمىن كەمىندە %20 قامتاماسىز ەتۋ دەگەن اۋقىمدى ماقسات قويدى. ماقساتقا قول جەتكىزۋ ەلىمىزدىڭ ەكونوميكالىق دامۋىن قامتاماسىز ەتىپ، بيزنەسكە قولايلى جاعداي تۋعىزادى. ول ءۇشىن قارجى سەكتورى كاپيتالدى قايتا ءبولۋدىڭ نەگىزگى ءرولىن ءتيىمدى ورىنداۋى كەرەك. بانكتىك قىزمەتتەردى سيفرلاندىرۋ ءۇردىسىن جالعاستىرۋ جانە نەسيەلەۋ سالاسىندا يننوۆاتسيالىق تەحنولوگيالاردى ەنگىزۋ ماڭىزدى. ءبىز بانكتەر وزدەرىنىڭ نەگىزگى قىزمەتتەرىنە نازار اۋدارىپ، قارىز الۋشىلارعا ىڭعايلى شارتتاردى ۇسىنا وتىرىپ، بيزنەسكە بەلسەندى قولداۋ كورسەتەدى دەپ كۇتەمىز. قارجى رەسۋرستارىن قايتا ءبولۋدىڭ، بانكتىك ەمەس سەكتوردى دامىتۋدىڭ جانە ەكونوميكانى قارجىلاندىرۋدىڭ بالامالى كوزدەرىنىڭ ءتيىمدى ارناسى رەتىندە قور نارىعىن قۇرۋ ماڭىزدى. مەملەكەت ءوز تاراپىنان ناقتى سەكتوردى نەسيەلەندىرۋدىڭ ءوسىمىن دامىتۋ ءۇشىن قاجەتتى جاعداي جاساپ جاتىر»، - دەلىنگەن ۇلتتىق بانك باسشىسىنىڭ بايانداماسىندا.

ول مەملەكەت باسشىسىنىڭ تاپسىرماسى بويىنشا قارجى سەكتورىمەن بىرگە ءبىرقاتار ماڭىزدى زاڭنامالىق باستاما جۇزەگە اسىرىلىپ جاتقانىن اتاپ ءوتتى.

«قولايلى نورماتيۆتىك-قۇقىقتىق ورتانى قۇرۋعا، ۇلتتىق جانە قارجىلىق ينفراقۇرىلىمدى دامىتۋعا جانە قارجىلىق تەحنولوگيالاردى قولداۋعا ەرەكشە نازار اۋدارىلاتىن بولادى. ءبىز سونداي-اق قارجى نارىعىندا جاساندى ينتەللەكتىنىڭ دامۋىن رەتتەۋ مەن ىنتالاندىرۋدىڭ وڭتايلى ستراتەگياسىن ازىرلەۋ بويىنشا بەلسەندى جۇمىس ىستەيتىن بولامىز. قارجى رەسۋرستارىنىڭ قولجەتىمدىلىگىن قامتاماسىز ەتۋ ارقىلى ەكونوميكالىق ءوسۋ مەن ەلدىڭ تۇراقتى دامۋى - ءبىزدىڭ ورتاق مىندەتىمىز»، - دەپ ەسەپتەيدى تيمۋر سۇلەيمەنوۆ.