توقايەۆ: ب ۇ ۇ ميسسياسى - بۇكىل الەمنىڭ قازاقستان ارمياسىنا دەگەن زور سەنىمى
استانا. KAZINFORM - پرەزيدەنت قاسىم-جومارت توقايەۆ ەلوردانىڭ تاۋەلسىزدىك الاڭىندا ءوتىپ جاتقان اسكەري پارادتا قازاقستان ارمياسىنىڭ بىتىمگەرلىك قىزمەتتەگى جەتىستىكتەرىنە توقتالدى.
- جۇرتىمىزدىڭ ەرلىك ءداستۇرى عاسىرلار بويى ۇرپاقتان ۇرپاققا ميراس بولىپ كەلەدى. التىن وردا، قازاق حاندىعى كەزىندەگى ءباھادۇر بابالارىمىز كەڭ بايتاق جەرىمىزدى قورعاپ، كەيىنگى بۋىنعا امانات ەتتى. ولاردىڭ بۇگىنگى ءىزباسارلارى قازاقتىڭ مەملەكەتتىلىگىن قاس قاقپاي كۇزەتىپ تۇر. ايبىندى ارميا - تاۋەلسىزدىگىمىزدىڭ قورعانى، - دەدى قاسىم-جومارت توقايەۆ.
پرەزيدەنت ق ر قارۋلى كۇشتەرى الەمدەگى تۇراقتىلىق پەن كەلىسىمدى ساقتاۋعا ۇلەس قوسىپ كەلە جاتقانىن اتاپ ءوتتى.
- جاۋىنگەرلەرىمىز بىرىككەن ۇلتتار ۇيىمىنىڭ بىتىمگەرلىك ميسسياسىنا ويداعىداي قاتىسۋدا. بۇل - بۇكىل الەمدەگى قازاقستان ارمياسىنا دەگەن زور سەنىم، - دەدى مەملەكەت باسشىسى.
ايتا كەتۋ كەرەك، بۇگىنگى اسكەري شەرۋگە 4 مىڭنان استام اسكەري قىزمەتشى، 200-دەن استام اسكەري تەحنيكا، 66 ۇشۋ اپپاراتى تارتىلعان. سونداي-اق، پارادتا بيىل ساتىپ العان سۋ جاڭا Airbus ا-400 اسكەري-كولىك ۇشاعى العاش رەت قاتىسادى. ارميالىق مي-17، مي-171 ش، مي-35 جانە كولىكتىك س-295، تۋ-154 م، ل-410 ۇشاقتارى، سۋ-30 س م، سۋ-25 جويىعىش ۇشاقتارى، ل-39 وقۋ- جاۋىنگەرلىك ۇشاعىنىڭ ەكيپاجدارى شەرۋدىڭ ايبىنىنا اۋەدەن ايبىن قوسپاق.
