تولەنبەگەن ايىپپۇلدارى بار جۇرگىزۋشىلەرگە مەملەكەتتىك قىزمەتتەر شەكتەلۋى مۇمكىن
استانا. KAZINFORM - ىشكى ىستەر مينيسترلىگى كولىك جۇرگىزۋگە مەديتسينالىق قارسى كورسەتىلىمدەرى بار تۇلعالار تۋرالى اقپارات الاتىن بولادى.
ءتيىستى نورما جول قوزعالىسى قاۋىپسىزدىگىن سيفرلاندىرۋ ماسەلەلەرى جونىندەگى زاڭ جوباسىنا ەنگىزىلگەن.
اتاپ ايتقاندا، زاڭ جوباسىندا مەديتسينالىق دەرەكتەردى ءى ءى م- ءنىڭ اۆتوماتتاندىرىلعان جۇيەسىنە بىرىكتىرۋ ۇسىنىلادى. بۇل كولىك قۇرالدارىن باسقارۋعا مەديتسينالىق قارسى كورسەتىلىمدەرى بار ادامداردى جىبەرمەۋ ماقساتىندا قولعا الىنباق. مۇنداي جاعدايلاردا ءتيىستى دياگنوز قويىلعان ساتتەن باستاپ جۇرگىزۋشى كۋالىگىنىڭ كۇشى ۋاقىتشا توقتاتىلادى.
سونىمەن قاتار جول قوزعالىسى قاۋىپسىزدىگى سالاسىندا تولەنبەگەن ايىپپۇلدار نەمەسە ولاردى تولەۋ تۋرالى نۇسقامالار بولعان جاعدايدا ءبىرقاتار مەملەكەتتىك قىزمەتتەردى الۋ شەكتەلەدى.
بۇدان بولەك، زاڭ جوباسى قۇقىق بۇزۋشىلىقتاردى اۆتوماتتى تۇردە تىركەۋ جۇيەسىن كەڭەيتۋدى كوزدەيدى. بۇل اۆتوجولداردا جانە مەملەكەتتىك ورگانداردىڭ كولىكتەرىندە، جەدەل جاردەم قىزمەتىندە، سونداي-اق تۇراقتى جولاۋشىلار تاسىمالىن جۇزەگە اسىراتىن تاسىمالداۋشىلاردا ورناتىلاتىن تەحنيكالىق قۇرالدار ارقىلى جول قوزعالىسى قاۋىپسىزدىگىن باقىلاۋدى كۇشەيتۋگە باعىتتالعان.
ايتا كەتەيىك، ەلىمىزدە جول- كولىك وقيعالارىنىڭ الدىن الۋ جانە جولداعى ءتارتىپتى كۇشەيتۋ ماقساتىندا جوسپارلى تۇردە اۋقىمدى پروفيلاكتيكالىق رەيدتىك شارالار تۇراقتى تۇردە وتكىزىلىپ كەلەدى.
