توبىلدىڭ تاسۋى قوستاناي وبلىسىنداعى جاعدايدى ۋشىقتىرۋى مۇمكىن - قازگيدرومەت
استانا. KAZINFORM - قازگيدرومەت رەسپۋبليكالىق مەملەكەتتىك كاسىپورنىنىڭ باسپا ءسوز حاتشىسى الينا يسماگۋلوۆا ورتالىق كوممۋنيكاتسيالار قىزمەتىندە وتكەن بريفينگىدە تاسقىننىڭ كەزەكتى تولقىنى قاي وڭىرلەردە بولاتىنىن ايتتى.
«سۋ دەڭگەيىنىڭ كوتەرىلۋى باتىس قازاقستان، اقمولا، قوستاناي، سولتۇستىك قازاقستان جانە شىعىس قازاقستان وبلىستارىنىڭ سولتۇستىك بولىگىندە جالعاسىپ جاتىر.
ءساۋىر ايىنىڭ ەكىنشى ونكۇندىگىندە ەسىل وزەنىنىڭ سولتۇستىك قازاقستان وبلىسىمەن شەكارالاس بولىگىندە وزەننىڭ باسى مەن سالالارىنان قوسىمشا اعىنداردىڭ كەلۋىنە بايلانىستى تاسقىننىڭ ەكىنشى تولقىنى كۇتىلۋدە. نۇرا وزەنى باسسەينىنىڭ قاراعاندى وبلىسىمەن شەكارالاس بولىگىندە (سەلينوگراد، قورعالجىن اۋداندارى) سۋ قويماسىنان جىبەرىلگەن جانە وزەننىڭ باس جاعىنان ەرىگەن سۋدىڭ جەتۋىنە بايلانىستى وڭىردە تاسقىن جالعاسادى»، - دەدى قازگيدرومەت وكىلى.
الينا يسماگۋلوۆا قوستاناي وبلىسىندا توبىلدىڭ دەڭگەيى ءالى كوتەرىلە ءتۇسۋى مۇمكىن ەكەنىن اتاپ ءوتتى.
«قوستاناي وبلىسىنداعى نەگىزگى ىلعال كوزى سانالاتىن توبىل وزەنىنىڭ (ءجىتىقارا، دەنيسوۆ، قوستاناي جانە مەڭدىقارا اۋداندارى) جانە ءۇي، ايات، توعىزاق، وباعان سياقتى سالالارىندا مۇز سوگىلىپ، سۋ دەڭگەيى كوتەرىلىپ جاتىر. سۋ دەڭگەيىنىڭ اۋىتقۋى 53 سانتيمەتردەن 142+ سانتيمەترگە دەيىن جەتەدى. وزەننىڭ شىعىس بولىگىندە دە سۋ كوتەرىلىپ وتىر. ودان ءارى دە كوتەرىلە تۇسەدى دەگەن بولجام بار. ءتىپتى قاۋىپتى بەلگىدەن اسىپ كەتۋى مۇمكىن. بۇل سۋ دەڭگەيىنىڭ ارتىپ، وزەننىڭ جازىققا جايىلۋىنا اكەلەدى. وسىلايشا قوستاناي وبلىسىنداعى ەلدى مەكەندەردى، شارۋاشىلىق قۇرىلىستارىن، وزەن جايىلۋى ىقتيمال ۋچاسكەلەردەگى جەرگىلىكتى ماڭىزى بار جولداردى سۋ باسۋ قاۋپى ساقتالىپ تۇر»، - دەدى ول.
قازگيدرومەت مامانى اباي جانە شىعىس قازاقستان وبلىستارىنىڭ باسىم بولىگىندە 8-10-ءساۋىر كۇندەرى جاۋىن-شاشىن بولىپ، كۇن جىلىنا تۇسەتىنىن ايتتى.
«سونىڭ اسەرىنەن قار قارقىندى ەرىپ، سەڭ جۇرەدى. سۋ دەڭگەيى كۇرت كوتەرىلىپ، مۇز كەپتەلەدى، قار سۋى جازىققا جايىلادى. جايىلعان سۋ اۆتوجولدار مەن تەمىر جولداردى، تۇرعىن ەلدى مەكەندەر مەن شارۋاشىلىق قۇرىلىستاردى باسۋى مۇمكىن»، - دەدى الينا يسماگۋلوۆا.
