تەرىنى كۇيىك شالعان كەزدە نە ىستەۋگە بولمايدى
پەتروپاۆل. KAZINFORM - كۇيىك شالعان تەرىنى دۇرىس ەمدەمەگەن جاعدايدا جارا اسقىنۋى مۇمكىن. دارىگەرلەر كۇيىككە جەڭىل-جەلپى قاراۋعا بولمايتىنىن ەسكەرتەدى.

سولتۇستىك قازاقستان وبلىسى م. جۇمابايەۆ اۋدانىنىڭ 77 جاستاعى تۇرعىنى مونشاعا ءتۇسىپ جاتىپ، پەشكە قۇلاپ، اياعىن كۇيدىرىپ العان. ەر ادام وزدىگىنەن ەمدەلمەك بولعان. الايدا جاراسى ۋشىعىپ، ول اۋرۋحاناعا تۇسكەن.
پەتروپاۆلداعى كوپبەيىندى قالالىق جەدەل مەديتسينالىق جاردەم اۋرۋحاناسىنىڭ مالىمەتىنشە، اۋىل تۇرعىنى تەك سەگىز كۇننەن كەيىن عانا دارىگەرلەردىڭ كومەگىنە جۇگىنگەن. اۋرۋحاناعا تۇسكەندە سىرقاتتا دەنە قىزۋى جانە جاي-كۇيىنىڭ ناشارلاۋى سياقتى ينفەكسيا بەلگىلەرى بولعان.
ەر ادامنىڭ سول جاق سانى تەرىسىنىڭ %3 كۇيىپ، ارتى ينفەكتسيالانعان جاراعا ۇلاسقان. دارىگەرلەر سىرقاتتىڭ جاراسىن وڭدەپ، ءتيىستى ەم-دوم جاسادى. قازىر ول ستاتسيوناردا ەمدەلىپ جاتىر، جاعدايى جاقسارعان.
كىشكەنتاي كۇيىك ۇلكەن جاراعا اينالماۋى ءۇشىن دارىگەرلەر قاراپايىم ەرەجەنى ەستە ۇستاۋ قاجەتتىگىن ەسكەرتەدى. كۇيىك دۇرىس وڭدەلگەن كەزدە وڭاي ەمدەلەدى. الايدا ءوزىن ءوزى ەمدەۋدىڭ ارتى اسقىنۋلارعا اكەلۋى مۇمكىن.
مامانداردىڭ ايتۋىنشا، كۇيىك شالعان كەزدە مۇز باسۋعا بولمايدى. بۇل تىندەردىڭ ءولىپ، تامىرلاردىڭ تارتىلۋىنا اكەلۋى مۇمكىن.
جاقپا ماي، كرەم، مايلار نەمەسە حالىقتىق ەم - قايماق جاعۋعا بولمايدى. ولار دياگنوستيكانى اۋىرلاتادى، ينفەكتسيا تۋدىرۋى مۇمكىن، دارىگەرلەرگە جارانى ەمدەۋگە كەدەرگى كەلتىرەدى.
كۇلدىرەۋىكتى جارۋعا بولمايدى. بۇل ينفەكتسيا ءتۇسۋ ءقاۋپىن ارتتىرادى.
كۇيگەن جەردى تاڭعىشپەن دە وراۋعا بولمايدى، بۇل اۋا جەتىسپەۋشىلىگىنە اكەلىپ، جارانىڭ تەز جازىلۋىنا كەدەرگى كەلتىرەدى.
جابىسقان كيىمدى جۇلۋعا بولمايدى. كۇيىكتىڭ اينالاسىنداعى ماتانى اقىرىن كەسىپ الىپ، دارىگەر كومەگىنە جۇگىنگەن دۇرىس.
كۇيىك شالعان كەزدە زاقىمدانعان جەردى سالقىن (مۇزداي سۋمەن ەمەس) سۋمەن 10-15 مينۋت بويى شايۋ كەرەك. ميكروب تۇسپەۋى ءۇشىن تازا، قۇرعاق جەڭىل داكەمەن جاۋىپ، دارىگەرگە كورىنگەن ءجون.
بۇعان دەيىن، دارىگەر ءىس-قيمىلىنان دەنساۋلىققا زاقىم كەلسە، ساقتاندىرۋ تولەمى قالاي بەرىلەتىنى تۋرالى جازعان بولاتىنبىز.