تۇرىك قوناق ۇيىندەگى ءورت: 15 ادام قاماۋعا الىندى
استانا. KAZINFORM - تۇركيانىڭ بولۋ پروۆينسياسىنداعى كارتالكايا تاۋ شاڭعىسى كۋرورتىندا ورتەنىپ كەتكەن «گراند كارتال» قوناق ءۇيىنىڭ يەسى وقيعاعا قىزمەتكەرلەردى كىنالادى، دەپ حابارلايدى Kazinform ءتىلشىسى Hürriyet باسىلىمىنا سىلتەمە جاساپ.اتالمىش باسىلىم اتاپ وتكەندەي، حاليت ەرگۇل قايعىلى وقيعاعا اسپازدى، كۇزەتشىلەردى، كونسالتينگتىك كومپانيا مەن ەلەكتريكتى كىنالاپ وتىر.

- قوناق ءۇي ورتكە قارسى بارلىق ساقتىق شاراسىن قابىلدادى. تەكسەرۋ بارىسىندا ولقىلىقتار انىقتالمادى، - دەدى ول.
سوت تەرگەۋى جالعاسۋدا. ورتكە قاتىسى بار دەگەن كۇدىكپەن ازىرگە 15 ادام قاماۋعا الىندى.
ەستەرىڭىزگە سالا كەتەيىك، قايعىلى وقيعا قوناقۇيدەگى ءورت قاۋىپسىزدىگىنىڭ ورەسكەل بۇزىلۋىن اشكەرەلەگەن بولاتىن. قىزمەتكەرلەر ءورت قاۋىپسىزدىگى جۇيەسى ءىس جۇزىندە جوق ەكەنىن ايتتى.
انىقتالعانداي، دابىل جۇيەسى جۇمىس ىستەمەيدى، ءورت سوندىرگىشتەر جوق، ءورت ءسوندىرۋ ساتىسى ادامداردى ءتيىستى دەڭگەيدە ەۆاكۋاتسيالاۋدى قامتاماسىز ەتپەگەن. بۇل ولقىلىقتار قۇتقارۋ جۇمىستارىنىڭ كەشىگۋىنە جانە قۇرباندار سانىنىڭ كوبەيە تۇسۋىنە سەبەپ بولعان.
ەسكە سالا كەتەيىك، بۇعان دەيىن تۇركياداعى قوناقۇيدە بولعان ورتتەن قازا تاپقاندار سانى 79 ادامعا جەتكەنىن جازعان ەدىك.