پەتروپاۆلدا قازاقستان حالقىنىڭ بىرلىگى كۇنى ەرەكشە فورماتتا اتاپ وتىلمەك

پەتروپاۆل. KAZINFORM - پەتروپاۆلدا بيىل قازاقستان حالقىنىڭ بىرلىگى كۇنىن تويلاۋدا قالىپتاسقان فورماتتان اۋىتقىپ، ءان-بيدەن باس تارتپاق.

پەتروپاۆل قالاسى اكىمدىگىنىڭ مالىمەتىنشە، ەنگىزىلگەن توتەنشە جاعداي رەجيمىنە جانە سۋ تاسقىنىنا بايلانىستى وبلىس ورتالىعىندا جالپى قالالىق سەنبىلىك وتەدى. بۇل - قازاقستان حالقى اسسامبلەياسىنىڭ باستاماسى.

«تازا قازاقستان» اكسياسى 1-مامىردا تۇرعىنداردىڭ باسىن بىرىكتىرىپ، بۇل كۇن ەڭبەك جانە تازالىق اتموسفەراسىندا وتپەك.

جەرگىلىكتى بيلىك وكىلدەرى قالالىقتاردى ءوز اۋلالارىن تازالاۋعا شاقىردى.

سونداي-اق، سۋ باسقان اۋدانداردا دا تازارتۋ وتكىزىلەدى.

پەتروپاۆلدا تاسقىن سۋدىڭ بەتى قايتتى، ەسىل وزەنى سۋىنىڭ دەڭگەيى ءتۇسىپ جاتىر. ماسەلەن سەرگەيەۆ سۋ قويماسىندا وتكەن تاۋلىكتە سۋ دەڭگەيى 89 س م-گە، پەتروپاۆلدا 19 س م-گە ءتۇستى. سۋ كەتكەن جەرلەردە قوقىستان اياق الىپ جۇرگىسىز.

بۇعان دەيىن سۋ تاسقىنىنا قارسى ءىس-شارالاردا ەلىمىزدە 50 مىڭنان استام ۆولونتەر جۇمىس ىستەگەنىن ايتقان ەدىك.

اۆتور
اقەركە داۋرەنبەك قىزى