پەتروپاۆلدا جاڭا شاعىن اۋداندار مەن كوشەلەرگە قازاقشا اتاۋ بەرىلدى

پەتروپاۆل. KAZINFORM - پەتروپاۆلدا قوعامدىق تىڭداۋ ءوتىپ، جاڭا شاعىن اۋدان مەن ونداعى 28 كوشەگە قازاقشا اتاۋلار بەرىلدى.

پەتروپاۆل قالالىق ءماسليحاتىنىڭ تۇراقتى دەپۋتاتتىق كوميسسيالارىنىڭ قوعامدىق تىڭداۋى ءوتىپ، قالالىق ءماسليحات دەپۋتاتى، جۇمىس توبىنىڭ جەتەكشىسى پاۆەل افاناسەۆ ءتوراعالىق ەتتى.

تىڭداۋعا قاتىسۋشىلار بارلىق اتاۋلارعا داۋىس بەرىپ، ءبىراۋىزدان قابىلداندى. ەندى جاڭا شاعىن اۋدان «بىرلىك» دەپ اتالادى. ال كوشەلەردىڭ اتاۋلارى ۇلتتىق قۇندىلىقتاردى، مادەني مۇرا مەن تاريحي ماڭىزدىلىقتى بەينەلەيتىن سوزدەردەن تۇرادى. ولاردىڭ قاتارىندا: «اتامەكەن»، «اقجايلاۋ»، «ارمان»، «ىرىس»، «بوتاي»، «دومبىرالى»، «ازاتتىق»، «شاپاعات»، «بايتەرەك» سىندى اتاۋلار بار.

- تىڭداۋدا ماڭىزدى ۇسىنىس تا ايتىلدى - جەڭىستىڭ 80 جىلدىعى اياسىندا ەكىنشى دۇنيەجۇزىلىك سوعىس قاھارماندارىنىڭ ەسىمدەرىن كوشەلەرگە بەرۋ ارقىلى ماڭگى ەستە قالدىرۋ.

قوعامدىق تىڭداۋعا قاتىسۋشىلار ۇسىنىستى قولدادى. ناتيجەسىندە تاريحي ماڭىزى جويىلعان ەسكى اتاۋلاردىڭ ورنىنا كوشەلەرگە: باۋىرجان مومىش ۇلى، راقىمجان قوشقاربايەۆ، تالعات بيگەلدينوۆ، مانشۇك مامەتوۆا، ءاليا مولداعۇلوۆا، حيۋاز دوسپانوۆا جانە پەتروپاۆلدان شىققان كەڭەس وداعىنىڭ باتىرلارى: ۆيكتور بىكوۆسكي، الەكساندر كارۋشين، گاۆريل كيرديشەۆ، ميحايل ماليەۆ، ۆلاديمير وۆسياننيكوۆ، نيكولاي پودوروجنىي، يۆان ۋستينوۆ ەسىمدەرى بەرىلەتىن بولدى. بۇل ۇسىنىستى جۇزەگە اسىرۋ ءۇشىن قالالىق جانە وبلىستىق مادەنيەت، تىلدەردى دامىتۋ باسقارمالارىنا ءتيىستى تاپسىرما بەرىلدى، - دەيدى پاۆەل افاناسەۆ.

اۆتور

اقەركە داۋرەنبەك قىزى