پەتروپاۆلدا 16 جاستاعى جاس ءوسپىرىم اناسىن الداپ، ونىڭ اتىنا نەسيە رەسىمدەگەن

پەتروپاۆلدا 16 جاستاعى جاس ءوسپىرىمنىڭ الاياقتىققا قاتىسى بولۋى مۇمكىن. ول تۋعان اناسىن الداپ، ونىڭ اتىنا قوماقتى سوماداعى نەسيە رەسىمدەگەن، دەپ حابارلايدى Kazinform.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جىلدىڭ باسىندا پەتروپاۆل تۇرعىنىنا ءوزى الماعان ءىرى سوماداعى نەسيەنى تولەۋ تۋرالى حابارلامالار كەلە باستاعان. ايەل دەرەۋ پوليتسيا باسقارماسىنا جۇگىنگەن. نەسيەنى ونىڭ اتىنا كىم الۋى مۇمكىن ەكەنى تۋرالى ەش بولجامى بولماعان.

جەدەل ۋاكىلدەر سۇراۋ بارىسىندا ونىڭ ەسىنە 16 جاستاعى ۇلىنىڭ وتكەن جىلدىڭ جەلتوقسان ايىندا سايتتاردىڭ بىرىنە تىركەلۋدى وتىنگەنى ەسىنە ءتۇستى. بالاسى ول سايتتان ەمتيحان سۇراقتارىنا ارنالعان جاۋاپتاردى الامىن دەپ ايتقان. جاس ءوسپىرىم ەكى ادام تىركەلگەن جاعدايدا جەڭىلدىك بولادى دەپ تۇسىندىرگەن. تىركەلۋ كەزىندە ايەلدىڭ فوتو جانە بەينەۆەريفيكاتسيادان ءوتۋى قاجەت بولعان. الدانعانىن تۇسىنبەگەن ايەل «باستى سولعا، وڭعا بۇرۋ» دەگەن سياقتى تالاپتاردى ورىنداعان.

«وسى پروتسەدۋرادان كەيىن جابىرلەنۋشىنىڭ اتىنا 1 ميلليون 180 مىڭ تەڭگە مولشەرىندە نەسيە رەسىمدەلگەنى انىقتالدى. اتالعان فاكتى ق ر قىلمىستىق كودەكسىنىڭ 190-بابىنىڭ 2-بولىگى «الاياقتىق» بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىنە ەنگىزىلدى. قازىرگى ۋاقىتتا تەرگەۋ اياقتالۋعا جاقىن، تەرگەۋشىلەر ءىس ماتەريالدارىن سوتقا جىبەرۋگە دايىنداپ جاتىر»، - دەيدى س ق و پ د كريمينالدىق پوليتسيا باسقارماسىنىڭ باستىعى يۆان تەرزيدي.

پوليتسەيلەردىڭ ايتۋىنشا، قارجى ۇيىمدارى قاشىقتىقتان نەسيە الۋ راسىمدەرىن قيىنداتقاننان بەرى الاياقتار باسقا ادامداردىڭ بيومەتريالىق مالىمەتتەرىن پايدالانۋ ءۇشىن ءتۇرلى ادىستەردى قولدانا باستادى. سوندىقتان سۋرەتكە نەمەسە ۆيدەوعا ءتۇسۋ تۋرالى وتىنىشتەرگە ساقتىقپەن قاراعان ءجون. جەكە مالىمەتتەردى ەشكىمگە بەرمەۋ قاجەت.

س ق و- دا 11 ايدىڭ ىشىندە ينتەرنەت-الاياقتىقتىڭ 716 دەرەگى تىركەلدى. ونىڭ 91 ى بوگدە ادامداردىڭ اتىنا نەسيە رەسىمدەۋمەن بايلانىستى.