پەتروپاۆل ماڭىنداعى ساياجاي ۋچاسكەلەرىن سۋ باسىپ قالدى
پەتروپاۆل. KAZINFORM - پەتروپاۆلداعا زارەچنىي كەنتى مەن «رەچپورت» ماڭىنداعى ساياجايلارعا سۋ كىردى.
سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ وڭىردەگى سۋ تاسقىنىنا قاتىستى جاعدايدى حابارلادى.
ونىڭ ايتۋىنشا، بيىل العاش رەت سۋ تاسقىنىنىڭ ءۇشىنشى تولقىنى ءوتىپ جاتىر. پەتروپاۆلدا تاسقىننىڭ شارىقتاۋ شەگى 28- 30-ساۋىردە بولادى دەپ بولجانعان.
- ەسىل وزەنىندەگى سۋ دەڭگەيىنىڭ كوتەرىلۋىنە بايلانىستى سۋ جىلداعىداي القاپتارعا جايىلدى. قازىر سۋ زارەچنىي كەنتى مەن رەچپورت ماڭىنداعى ساياجاي ۋچاسكەلەرىن باستى. بۇل ساياجايلاردا تۇرعىندار جوق، توتەنشە جاعدايلار دەپارتامەنتى مەن پوليتسيا بەكەتتەرى قويىلدى.
ويقالا مەن بىلعارى كەنتىندەگى، قىزىلجار اۋدانىنىڭ تەپليچنوە جانە پريبرەجنوە اۋىلدارىندا جاعداي ەرەكشە باقىلاۋعا الىندى.
سۋ تاسقىنى تولىق اياقتالعانعا دەيىن جاعدايدى تۇراقتى باقىلاۋدا ۇستايمىز. باستى باسىمدىق - ازاماتتاردىڭ ءومىرى مەن مۇلكىن ساقتاۋ. بارلىق قىزمەتتەر جوعارى دايىندىقتا بولىپ، جەدەل ارەكەت ەتۋ كەرەك، - دەدى عاۋەز نۇرمۇحامبەتوۆ.
ەسىل وزەنىنىڭ جايىلما القابىندا ورنالاسقان زارەچنىي كەنتىندە 6 كوپقاباتتى جانە 90 جەكە ءۇي، 13-ورتا مەكتەپ پەن تۇزەۋ مەكەمەسى بار. تۇرعىنداردىڭ قاۋىپسىزدىگىن قامتاماسىز ەتۋ جانە مۇلكىن قورعاۋ ماقساتىندا زارەچنىي كەنتىنىڭ تۇرعىندارىن قاۋىپسىز ايماقتارعا كوشىرۋ تۋرالى شەشىم قابىلداندى. وسى ماقساتتا 90 جانە 72 پاتەرلى ەكى كوپقاباتتى ءۇي تۇرعىزىلىپ جاتىر. سونىمەن قاتار، جاڭا تۇزەۋ مەكەمەسى مەن كوپاي شاعىن اۋدانىندا 600 ورىندىق مەكتەپ سالىنادى.
بۇعان دەيىن پەتروپاۆلعا مول سۋدىڭ كەلە جاتقانىن جازعان ەدىك.
اۆتور
اقەركە داۋرەنبەك قىزى
