تەرروريستىك اكتىلەر، كيبەرقالقان جانە ەكونوميكاعا قاۋىپ – ۇ ق ك ءتوراعاسى ەرمەك ساعىمبايەۆپەن ەكسكليۋزيۆتى سۇحبات
استانا. KAZINFORM – ق ر ۇلتتىق قاۋىپسىزدىك كوميتەتىنىڭ ءتوراعاسى ەرمەك ساعىمبايەۆ «Kazinform» اگەنتتىگىنىڭ تىلشىسىنە بەرگەن سۇحباتىندا تەرروريستىك اكتىلەردىڭ الدىن الۋ شارالارى، گەوساياسي تۇراقسىزدىق جاعدايىندا قازاقستان ەكونوميكاسى ءۇشىن قاۋىپ- قاتەرلەر، كيبەرقاۋىپسىزدىكتى قامتاماسىز ەتۋ، ۇلتتىق قاۋىپسىزدىك كوميتەتىنە جۇمىسقا ورنالاسۋ جانە وزگە دە ماڭىزدى ماسەلەلەر تۋرالى ايتىپ بەردى.
- ەرمەك الدابەرگەن ۇلى، تەرروريزم ۇعىمى بارشامىزعا ۇيرەنشىكتى نارسەگە اينالدى. بىزدە تەرروريستىك اكتىلەر ەلىمىزدەن تىس جەردە بولادى دەگەن تۇسىنىك قالىپتاسقان. الايدا ءىس جۇزىندە ول قازاقستان ءۇشىن عانا ەمەس، بۇكىل الەم ءۇشىن باستى قاتەرلەردىڭ ءبىرى. ءوزىڭىز باسقارىپ وتىرعان ۆەدومستۆو ماماندارى وسى زۇلىمدىققا قارسى قالاي كۇرەسۋدە؟ ەلىمىزدە تەرروريزم مەن ءدىني ەكسترەميزمگە قارسى ءىس- قيمىل بويىنشا قانداي شارالار قابىلدانىپ جاتىر؟
- وكىنىشكە قاراي، سىرتتان ەنەتىن راديكالدى ءدىني يدەولوگيا قازاقستان ءۇشىن بۇرىننان شىنايى قاۋىپ- قاتەرگە اينالدى.
ونىڭ ىقپالىمەن 2011 - 2012 جانە 2016 -جىلدارى رەسپۋبليكامىزدىڭ ءارتۇرلى وڭىرلەرىندە بولعان تەرروريستىك اكتىلەر ەستەرىڭىزدە بولار.
سوندىقتان ۇ ق ك قىزمەتكەرلەرى ءۇشىن تەرروريزمگە قارسى كۇرەس - جۇرتشىلىققا كوبىنەسە بايقالا بەرمەيتىن قارقىندى جۇمىس.
ۇلتتىق قاۋىپسىزدىك ورگاندارىنىڭ ماتەريالدارى بويىنشا، اعىمداعى جىلى تەرروريستىك قىلمىس جاساعانى ءۇشىن 32 ادام سوتتالىپ، تاعى 23 ءى تەرگەلۋدە.
ءدىني راديكالدار قاتارىنان شامامەن 170 شەتەلدىكتىڭ ەلىمىزگە كىرۋىنە جول بەرىلمەدى.
بۇدان باسقا، ۇ ق ك وسى سالاداعى ۋاكىلەتتى ورگان رەتىندە كۇشتىك قۇرىلىمدار مەن باسقا دا مەملەكەتتىك ورگانداردىڭ كومەگىمەن ءبىرقاتار شارالاردى ىسكە اسىردى.
ۇ ق ك تەرروريزمگە قارسى ورتالىعىنىڭ شتابى جىل باسىنان 300 دەن استام ءتۇرلى وقۋ-جاتتىعۋ، سەمينار، ادامدار كوپ جينالاتىن ورىنداردى تەكسەرۋ ۇيىمداستىردى.
ءدىني جانە وزگە دە ۇكىمەتتىك ەمەس بىرلەستىكتەردىڭ مەملەكەتپەن بىرلەسىپ، حالىقپەن اتقارىپ جاتقان اۋقىمدى جۇمىسىن اتاپ وتكىم كەلەدى.
كوپشىلىك بىلە قويماس، ەكسترەميستەردى قايتا الەۋمەتتەندىرۋ بويىنشا ءبىزدىڭ تاجىريبەمىز الەمدە وزىق دەپ تانىلعان. ونىڭ ءارتۇرلى حالىقارالىق ۇيىمدار، سونىڭ ىشىندە ب ۇ ۇ تاراپىنان جوعارى باعالانعانىن اتاپ وتكەن ءجون.
ءدىن تانۋشىلارمەن، يمامدارمەن اڭگىمەلەسۋدەن كەيىن راديكالداردىڭ بۇرىنعى ويلارىنان باس تارتىپ، وزدەرى ەرىكتى اتانعان فاكتىلەرى كوپ.
سونىمەن قاتار تەرروريزمگە قارسى كۇرەستە ءبىز شەتەلدىك سەرىكتەستەرمەن ەكىجاقتى جانە كوپجاقتى نەگىزدە تىعىز ىنتىماقتاسامىز.
ت م د تەرروريزمگە قارسى ورتالىعىنىڭ، ش ى ۇ وڭىرلىك تەرروريزمگە قارسى قۇرىلىمىنىڭ جانە باسقا دا الاڭداردىڭ قىزمەتىنە ۇقك بەلسەندى تۇردە قاتىسادى.
الايدا قازاقستاندا تەرروريزم قاۋپى جويىلدى دەپ ايتۋعا ءالى ەرتە. بۇل پروبلەما بارشا الەمدە، تيىسىنشە ءبىزدىڭ ەلىمىزدە دە ۇزاق ۋاقىت بويى وزەكتى بولادى.
- ءسىز جاقىندا مەملەكەت باسشىسىنا ەكى تەرروريستىك اكتىگە جول بەرىلمەگەنى تۋرالى باياندادىڭىز. سونىڭ ءبىرى - شەتەلدىك سەرىكتەستەرمەن اتقارىلعان شارۋا. وسى ىستەر تۋرالى تولىعىراق مالىمەت بەرە الاسىز با؟
- ءبىرىنشى تەرروريستىك اكت اقتاۋدا توقتاتىلدى. مۇقيات جەدەل زەرتتەۋدىڭ ناتيجەسىندە قالا تۇرعىندارىنىڭ ءبىرى راديكالدى ءدىني يدەولوگيانى ۇستانۋشى رەتىندە نازارعا ءىلىندى.
ول بۇرىن كىسى ولتىرگەنى ءۇشىن سوتتالعان. ينتەرنەتتەگى شەتەلدىك سودىرلاردىڭ ۇگىت-ناسيحاتىنىڭ ىقپالىمەن مەملەكەتتىك ورگانداردىڭ ءبىرىنىڭ عيماراتىندا جارىلىس جاساماق بولعان.
قولدان جارىلعىش قۇرىلعى جاساۋعا ارنالعان كومپونەنتتەردى، سونىڭ ىشىندە جانعىش جانە وزگە دە حيميالىق قوسپالاردى، سونداي-اق زاقىمداۋ ەلەمەنتتەرىن - بۇراندامالار مەن شەگەلەردى ساتىپ العان. ءتىنتۋ بارىسىندا ونىڭ ۇيىنەن دايىن جارىلعىش زاتتار سالىنعان 4 ىدىس جانە تەرروريستىك اكتىگە دايىندىق فاكتىسىن دالەلدەيتىن باسقا دا ايعاقتار تابىلىپ، الىندى.
ەكىنشى تەرروريستىك اكتىنىڭ شەتەلدە جولى كەسىلدى. ۇ ق ك جەدەل قىزمەتكەرلەرى جوسپارلانعان اكتسيا تۋرالى العاشقى مالىمەتتەر الىپ، ول تۋرالى شەتەل مەملەكەتىنىڭ ءتيىستى قىزمەتتەرى دەرەۋ حاباردار ەتىلدى. بىرلەسكەن تەكسەرۋ بارىسىندا ماتەريالدار راستالىپ، تەرىس ارەكەتتىڭ الدى الىندى.
ايتا كەتۋ كەرەك، تەرروريزمنىڭ شەكاراسى جوق، سوندىقتان شەتەلدىك ارناۋلى قىزمەتتەرمەن اقپارات الماسۋ ماسەلەلەرى وتە ماڭىزدى.
- تاعى ءبىر وزەكتى پروبلەما - سينتەتيكالىق ەسىرتكى جاساۋ جانە تاراتۋ. بۇل باعىتتا قانداي جۇمىستار جۇرگىزىلىپ جاتىر؟ سينتەتيكالىق ەسىرتكى وندىرەتىن جاسىرىن زەرتحانالاردى جويۋ جانە پرەكۋرسورلاردى اكەلۋگە تىيىم سالۋ ءۇشىن نە ىستەۋ كەرەك؟
- سينتەتيكانىڭ تارالۋى كۇن سايىن ارتىپ كەلەدى. ول قولجەتىمدى تاۋارعا اينالدى جانە، قىلمىسكەرلەردىڭ ويلاۋىنشا، ساتۋ ءۇشىن قاۋىپسىز. ينتەرنەتكە قوسىلعان زاماناۋي «گادجەت» بولسا جەتكىلىكتى.
ەسىرتكى ساتۋشىلار تولىق انونيمدىككە سەنەدى، سەبەبى بارلىق پروتسەسس ونلاين رەجيمدە جۇرەدى. قاتىسۋشىلارعا مەسسەندجەردەگى لاقاپ اتتار مەن ينتەرنەت-دۇكەندەردىڭ اتاۋى عانا بەلگىلى.
وسىنىڭ بارلىعى شىعىنى مەن تاۋەكەلى از، تابىسى كوپ دەپ ويلايتىن كەيبىر جاستاردى تارتاتىنى انىق.
وسىعان قاراماستان، ءبىز قابىلداپ جاتقان شارالار ەسىرتكى بيزنەسىمەن اينالىساتىنداردىڭ جولىن كەسۋگە مۇمكىندىك بەرەدى.
وسى جىلدىڭ 6 ايىندا ۇ ق ك 800 ك گ استام سينتەتيكالىق ەسىرتكى مەن 13 توننادان استام حيميالىق رەاگەنتتى زاڭسىز اينالىمنان الدى. 16 جاسىرىن زەرتحانا، سونداي-اق 24 حالىقارالىق جانە 17 وڭىرلىك ەسىرتكى ارناسى جويىلدى.
ەسىرتكىگە قارسى ءاربىر ءىس-شارا وسكەلەڭ ۇرپاقتىڭ ءومىرى مەن دەنساۋلىعىن تاۋەلدىلىكتەن ساقتاي الاتىنىن انىق تۇسىنەمىز.
ۇلتتىق قاۋىپسىزدىك كوميتەتى ارناۋلى قىزمەت رەتىندە ترانسۇلتتىق ەسىرتكى بيزنەسىنە قارسى تۇرۋعا باعىتتالعانىن اتاپ وتكىم كەلەدى. مۇندا دا حالىقارالىق ىنتىماقتاستىققا ەرەكشە ءمان بەرىلەدى.
سونىمەن قاتار مەملەكەت باسشىسىنىڭ تاپسىرماسى بويىنشا ۇكىمەت دارىلىك زاتتار جاساۋدا قولدانىلاتىن شيكىزات پەن قۇرال-جابدىقتاردى اكەلۋ مەن تاراتۋعا باقىلاۋدى كۇشەيتۋ بويىنشا زاڭنامالىق شارالار ەنگىزدى.
سايىپ كەلگەندە، ەسىرتكىنىڭ زاڭسىز اينالىمىنا قارسى كۇرەس تەك مەملەكەت تاراپىنان ۇزاق مەرزىمدى جانە جۇيەلى كۇش- جىگەر ەمەس، قوعامنىڭ بەلسەندى قولداۋىن دا قاجەت ەتەدى.
- كوميتەت الدىندا ەلىمىزدىڭ ەكونوميكالىق قاۋىپسىزدىگىن قامتاماسىز ەتۋ بويىنشا قانداي مىندەتتەر تۇر؟
- ۇلتتىق قاۋىپسىزدىك كوميتەتى ءوز وكىلەتتىكتەرىنە سايكەس جانە ەل باسشىلىعىنىڭ تاپسىرماسى بويىنشا ۇكىمەتكە ەكونوميكالىق الەۋەتتى قورعاۋ، بيۋدجەت ساياساتىنىڭ تيىمدىلىگىن ارتتىرۋ، كولەڭكەلى ەكونوميكا دەڭگەيىن تومەندەتۋ جونىندەگى شارالاردى ىسكە اسىرۋعا جاردەم كورسەتەدى.
ءبىز بيلىك ورگاندارىنا ەكونوميكا سالالارىنداعى پروبلەمالىق اسپەكتىلەر تۋرالى حابارلايمىز. قۇزىرلى مەملەكەتتىك ورگاندارعا رەسپۋبليكامىزدىڭ مۇددەلەرىنە ەكونوميكالىق زيان كەلتىرۋدىڭ العىشارتتارى تۋرالى وبەكتيۆتى ماتەريالدار تۇراقتى تۇردە بەرىلىپ وتىرادى.
بۇل رەتتە، ەكونوميكاعا سىرتتان كەلەتىن قاۋىپتەر تۋرالى دەرەكتەر جابىق سيپاتتا بولادى جانە وعان ارناۋلى قىزمەتتەرگە ءتان جۇمىس ادىستەرىن قولدانۋ ارقىلى قول جەتكىزىلەدى.
بيىل ۇلتتىق قاۋىپسىزدىك ورگاندارى باستاما جاساعان شارالاردىڭ قورىتىندىلارى بويىنشا جيىنتىق تيىمدىلىك قازىردىڭ وزىندە 1 تريلليون تەڭگەدەن استى.
زاڭناماداعى ولقىلىقتاردى جويۋ جۇمىستارى دا ماڭىزدى ءرول اتقارادى. ۇلتتىق قاۋىپسىزدىك كوميتەتى مەملەكەت ەكونوميكاسىنا اسەر ەتەتىن نورماتيۆتىك-قۇقىقتىق بازانى جەتىلدىرۋگە بەلسەندى تۇردە قاتىسادى.
- ەرمەك الدابەرگەن ۇلى، مەملەكەتتىك شەكارامىزدىڭ قاۋىپسىزدىگى قالاي قامتاماسىز ەتىلەدى، مەملەكەتتەر اراسىندا شەكارانى بىرلەسىپ كۇزەتۋدىڭ قانداي تەتىكتەرى بار؟
- قازاقستاننىڭ احۋالىنا گەوساياسي ورنالاسۋىنا بايلانىستى زاڭسىز كوشى-قون، ەسىرتكى تاسىمالى، كونتراباندا، تەرروريزم جانە ءدىني ەكسترەميزم كورىنىستەرى سياقتى كەڭ اۋقىمدى سىرتقى قاۋىپ- قاتەرلەر ىقپال ەتىپ وتىر. ەلىمىزدىڭ شەكاراسىندا اتالعان قاۋىپ- قاتەرلەرگە قارسى تۇرۋ ۇلتتىق قاۋىپسىزدىك كوميتەتىنىڭ شەكارا قىزمەتىنە جۇكتەلگەن.
جىل باسىنان بەرى شەكاراشىلار شەكارا رەجيمى مەن اۋماقتىق سۋ ەرەجەسىن بۇزعان 17 مىڭنان استام ادامدى انىقتادى. 340 شاقىرىمنان استام براكونەرلىك قۇرال تاركىلەنىپ، 3 ميلليارد تەڭگە شىعىننىڭ الدىن الۋ مۇمكىن بولدى. 316 قارۋ مەن وق-ءدارىنى، 294 ەسىرتكىنى، 268 ءدىني ادەبيەتتى الىپ ءوتۋ ارەكەتىنىڭ جولى كەسىلدى.
ەل باسشىلىعى شەكارا قاۋىپسىزدىگىن تۇراقتى دەڭگەيدە ۇستاۋعا كوپ كوڭىل بولەدى. جۋىردا ۇكىمەت شەكارانى جاقسارتۋ بويىنشا كەشەندى شارالار جوسپارىن ۇسىندى. بۇل - ينجەنەرلىك جابدىقتى كۇشەيتۋ، تەحنيكالىق قۇرال- جابدىقتار مەن ۇشقىشسىز ۇشۋ اپپاراتتارىن كەڭىنەن قولدانۋ، زاماناۋي زاستاۆالار مەن وتكىزۋ پۋنكتتەرىن پايدالانۋعا بەرۋ ارقىلى «اقىلدى شەكارا» قاعيداتىن كەزەڭ- كەزەڭىمەن ەنگىزۋدى كوزدەيتىن بايىپتى قۇجات. بۇل شارالاردى جۇزەگە اسىرۋ، ءبىر جاعىنان، رەسپۋبليكا شەكاراسىن نىعايتۋعا، ەكىنشىدەن، ادال ازاماتتاردىڭ قوزعالىسى مەن ساۋدا اعىنىن جەڭىلدەتۋگە ىقپال ەتۋى كەرەك.
سونىمەن قاتار ءبىز شەكارالىق ينفراقۇرىلىمدى جاڭعىرتۋ ۇزاق جانە كۇردەلى پروتسەسس ەكەنىن ءتۇسىنۋىمىز قاجەت. بۇل جەردە مەملەكەتتىك بيۋدجەتتىڭ مۇمكىندىكتەرىن ەسكەرۋ ماڭىزدى.
كورشى ەلدەرمەن شەكارانى بىرلەسىپ كۇزەتۋگە كەلەتىن بولساق، ونىڭ بۇكىل پەريمەترى بويىنشا شەكارالىق وكىلدىكتەر جۇمىس ىستەيدى. وسى ماسەلەلەر بويىنشا شەتەلدىك سەرىكتەستەرمەن بايلانىس كۇندەلىكتى جۇزەگە اسىرىلادى. شەكارانىڭ قىتاي، قىرعىز، رەسەي جانە وزبەكستان ۋچاسكەلەرىندە جۇيەلى تۇردە بىرلەسكەن جانە كەلىسىلگەن ءىس-شارالاردى جۇرگىزەمىز. سونىمەن قاتار ت م د، ۇ ق ش ۇ جانە ش ى ۇ پلاتفورمالارىندا ءتيىستى مەملەكەتتەردىڭ شەكارا ۆەدومستۆولارىمەن ىنتىماقتاسامىز.
- شەكارالىق قاۋىپسىزدىك جاعدايىن ناقتى ءتۇسىندىردىڭىز، ال ەلىمىزدىڭ اقپاراتتىق كەڭىستىگىن كيبەرقاۋىپتەردەن قورعاۋ تۋرالى نە ايتاسىز؟
- تەحنولوگيانىڭ دامۋىن ەسكەرسەك، بۇل - وتە وزەكتى ماسەلە. وزدەرىڭىز بىلەتىندەي، Cyber Shield جۇيەسى قازاقستاندا 2018 -جىلدان بەرى جۇمىس ىستەيدى. سوڭعى ءبىر جىلدا ينتەرنەتتىڭ قازاقستاندىق سەگمەنتىنە جاسالعان
220 ميلليوننان استام جەلىلىك شابۋىلعا تويتارىس بەرىلدى.
قازاقستان ازاماتتارىنىڭ جەكە دەرەكتەرىنىڭ سىرتقا شىعۋىنا جانە ەلدەگى بايلانىس وپەراتورلارىنىڭ جەلىلەرىنە حاكەرلەردىڭ ەنۋىنە قاتىستى جاعدايعا جەكە- جەكە توقتالعىم كەلەدى. بۇل فاكتىلەردى ۇلتتىق قاۋىپسىزدىك كوميتەتى بۇقارالىق اقپارات قۇرالدارىندا جاريالانباس بۇرىن اشكەرەلەگەن. ۋاكىلەتتى مينيسترلىكپەن جانە بايلانىس وپەراتورلارىمەن بىرلەسە وتىرىپ، ولقىلىقتاردى جويۋ جانە زالالدى ازايتۋ جۇمىستارى جۇرگىزىلدى. مۇنداي شارالار تۇراقتى تۇردە جۇزەگە اسىرىلىپ جاتىر. مىسالى، قازىرگى ۋاقىتتا ۇلتتىق قاۋىپسىزدىك كوميتەتى ۇيىمداسقان توپتاردىڭ ەلىمىزدىڭ اسا ماڭىزدى اقپاراتتىق-كوممۋنيكاتسيالىق ينفراقۇرىلىم وبەكتىلەرىنە قارسى جاساعان قىلمىستارى بويىنشا 10 قىلمىستىق ءىستى تەرگەۋ ۇستىندە. وسى ساناتتاعى ىستەردى تەرگەۋدىڭ ەڭ قيىن بولىگى - حاكەرلەر مەن شابۋىلدار كوزدەرىن انىقتاۋ.
الداعى ۋاقىتتا قىلمىستىق جانە قىلمىستىق ءىس جۇرگىزۋ كودەكستەرىنە وسىنداي ارەكەتتەردى جاساعانى ءۇشىن جاۋاپكەرشىلىكتى قاتايتۋ بولىگىندە تۇزەتۋلەر ەنگىزۋ جوسپارلانىپ وتىر.
ەكىنشىدەن، قازاقستاندىقتاردى الاڭداتاتىن ماسەلە - ينتەرنەت- الاياقتىققا توقتالىپ وتسەك. ۋاكىلەتتى ورگاندار شابۋىلداۋشىلارعا قارسى تۇرۋ ءۇشىن ءبىرقاتار شارا ۇيىمداستىردى. ءتيىستى زاڭ جوباسى پارلامەنت ماجىلىسىندە تالقىلانادى. بۇل جۇمىسقا ۇلتتىق قاۋىپسىزدىك كوميتەتى دە اتسالىسىپ جاتىر.
اقپاراتتىق قاۋىپسىزدىك - جاڭا شەشىمدەردى ۇنەمى ىزدەۋ. زاماناۋي تەحنولوگيالاردىڭ بولۋى قاۋىپسىزدىككە %100 كەپىلدىك بەرمەيدى. سيفرلىق الەم كۇن سايىن وزگەرىپ جاتىر، تيىسىنشە كيبەرقىلمىسكەرلەردىڭ مۇمكىندىكتەرى دە دامىپ كەلەدى. ءبىزدىڭ باستى مىندەتىمىز - وسى «سايىستا» ارتتا قالماي، ءبىر قادام الدا بولۋ.
اقپاراتتىق قاۋىپسىزدىكتى قامتاماسىز ەتۋ بارىسىندا وتاندىق باعدارلامالىق ازىرلەمەلەردىڭ، سونداي-اق جاساندى ينتەللەكت تەتىكتەرىنىڭ قولدانىلا باستاعانى قۋانتادى.
- جاقىندا استانادا ش ى ۇ ءسامميتى ءوتتى. وسى اۋقىمدى شارانى وتكىزۋدە ءسىزدىڭ ۆەدومستۆو قانداي ۇلەس قوستى؟
- ش ى ۇ ءسامميتى اۋقىمى بويىنشا بۇرىن- سوڭدى بولماعان ساياسي ءىس-شارا. ەلىمىزگە 16 ەلدىڭ مەملەكەت جانە ۇكىمەت باسشىلارى، حالىقارالىق ۇيىمداردىڭ باسشىلارى كەلدى.
فورۋمدى وتكىزۋ تەك ۇيىمداستىرۋشىلاردان ەمەس، ارناۋلى جانە قۇقىق قورعاۋ ورگاندارىنان دا وراسان زور كۇش-جىگەردى تالاپ ەتتى. ۇلتتىق قاۋىپسىزدىك كوميتەتى حالىقارالىق تەرروريستىك ۇيىمداردىڭ قارقىندىلىعىن ەسكەرە وتىرىپ، تەرروريزمگە قارسى كۇرەس جونىندەگى جەدەل شتابتاردىڭ كۇشتەرى مەن قۇرالدارىنىڭ دايىندىعىن ارتتىرۋ شارالارىنا باستاماشىلىق جاسادى.
تەرروريستىك تۇرعىدان وسال 350 گە جۋىق نىسان باعالانىپ، كۇزەتىلدى. سونىمەن قاتار، 200 دەن استام ماڭىزدى ينفراقۇرىلىم نىساندارىنىڭ قاۋىپسىزدىگى كۇشەيتىلدى. جارىلعىش زاتتاردى انىقتايتىن ماماندار مەن كينولوگتار جۇمىلدىرىلدى. بارلىعى 2500 گە جۋىق ءتۇرلى ءىس- شارا جۇزەگە اسىرىلدى. ەل ىشىندە دە، شەتەلدەگى قاۋىپ- قاتەر جاعدايىندا دا جەدەل جۇمىس كۇشەيتىلدى.
- كەز كەلگەن ارناۋلى قىزمەت جۇرتشىلىقتىڭ كوزىنە تۇسپەيتىن مەكەمە ەكەنىن ءبارى بىلەدى. حالىققا بارلىعىن دەرلىك ايتا المايسىز. قىزمەتىڭىزدىڭ ەرەكشەلىگى مەن اشىقتىعى اراسىنداعى تەپە-تەڭدىكتى قالاي تابۋعا بولادى؟
- شىنىندا دا، ارناۋلى قىزمەتتەگى جۇمىسى جوعارى دارەجەدەگى قۇپيالىلىقتى جانە قاتاڭ قاۋىپسىزدىك پروتوكولدارىن ساقتاۋدى تالاپ ەتەدى.
الايدا ءبىز حالىقتىڭ سەنىمىن ساقتاۋ قاجەت ەكەنىن دە مويىندايمىز. تەپە- تەڭدىككە قول جەتكىزۋ ءۇشىن «مۇمكىندىك شەگىندەگى اشىقتىق» ءتاسىلىن ۇستانۋعا تىرىسامىز.
ۇ ق ك باسپا ءسوز قىزمەتى ءوز جۇمىسىنىڭ ناتيجەلەرى تۋرالى اقپاراتتى جۇيەلى تۇردە جاريالايدى، جۋرناليستەر ءۇشىن پرەسس-تۋرلار، تەرروريزمگە قارسى وپەراتسيا جاعدايىنداعى ب ا ق ارەكەتتەرى تۋرالى ترەنينگتەر مەن دارىستەر وتكىزەدى.
كوميتەت Instagram, Facebook, Tik-Tok, X جانە YouTube ۆيدەوحوستينگى سياقتى الەۋمەتتىك جەلىلەردە دە بەلسەندى.
ءبىز اقپاراتتى ەلدىڭ قاۋىپسىزدىك مۇددەسىنە قاتەر توندىرمەيتىن،
سونداي-اق جەدەل- ىزدەستىرۋ ءىس- شارالارىمىزدىڭ ەگجەي- تەگجەيلەرىن اشپايتىن دارەجەدە جاريالايمىز.
بۇل رەتتە، ۇلتتىق قاۋىپسىزدىك كوميتەتى كەز كەلگەن مەملەكەتتىك ورگان سياقتى ب ا ق وكىلدەرى مەن ازاماتتاردىڭ وتىنىشتەرىن قابىلدايدى. جىل باسىنان بەرى 11000-نان استام ءوتىنىش كەلىپ ءتۇستى. ونىڭ بىرەۋى دە ءبىزدىڭ تاراپىمىزدان جاۋاپسىز قالعان جوق.
بۇل شارالار حالىققا ارناۋلى قىزمەت ەرەكشەلىكتەرىن تەرەڭىرەك تۇسىنۋگە جانە جاس مامانداردى ۇلتتىق قاۋىپسىزدىك ورگاندارىندا قىزمەت ەتۋگە تارتۋعا كومەكتەسەدى دەپ سەنەمىز.
- قازىر جاستاردىڭ اسكەري قىزمەتكە دەگەن قىزىعۋشىلىعى تومەن. ۇلتتىق قاۋىپسىزدىك كوميتەتىندە كادرلاردى ىرىكتەۋ مەن جيناقتاۋدا قيىندىقتار بار ما؟
- جاستاردىڭ ۇلتتىق قاۋىپسىزدىك كوميتەتىندە قىزمەت ەتۋگە دەگەن قىزىعۋشىلىعى تومەندەگەن جوق.
كەرىسىنشە، بيىل ۇلتتىق قاۋىپسىزدىك كوميتەتىنىڭ اكادەمياسى مەن شەكارا اكادەمياسىنا وقۋعا نەمەسە تىكەلەي قابىلداۋعا ىرىكتەۋ قاتاڭ بولعانىمەن، كانديداتتار سانى 30 پايىزعا ءوستى.
ءبىزدىڭ كونتينگەنت مەكتەپ تۇلەكتەرىنەن نەمەسە جۇمىس ىستەپ جۇرگەن جوعارى ءبىلىمدى، وتان يگىلىگى ءۇشىن قىزمەت ەتۋگە دايىن مامانداردان تۇرادى.
كانديداتتارعا قويىلاتىن ناقتى تالاپتار ۇ ق ك سايتىندا ورنالاستىرىلعان نەمەسە ولارمەن تۇرعىلىقتى جەرىڭىزدەگى اۋماقتىق ورگانعا بارىپ تانىسا الاسىز.
- بارشا قازاقستاندىقتى ەلىمىزدە بۇرىن- سوڭدى بولماعان سۋ تاسقىنىمەن كۇرەس بىرىكتىرە تۇسكەنى راس. بۇل رەتتە، كوميتەت قىزمەتكەرلەرى دە شەتتە قالماعانىن بىلەمىز...
- بۇل تابيعي اپات ەل ءۇشىن زور سىناققا اينالدى. بارلىق قازاقستاندىقتار سياقتى سۋ تاسقىنى ايماعىندا قالعان رەسپۋبليكا تۇرعىندارى ءۇشىن الاڭدادىق. ولاردىڭ اراسىندا ارىپتەستەرىمىز، سونداي-اق ولاردىڭ تۋىستارى مەن دوستارى بار.
ۇ ق ك قىزمەتكەرلەرى سۋ تاسقىنىنا قارسى ءىس-شارالارعا بەلسەندى قاتىستى. شەكارا قىزمەتىنىڭ اسكەري قىزمەتشىلەرى 10 مىڭنان استام ادامدى ەۆاكۋاتسيالاپ، اپاتتى ايماقتارعا تۇراقتى تۇردە ازىق-تۇلىك پەن ءدارى-دارمەك جەتكىزىپ تۇردى. بۇل ۆەدومستۆونىڭ 100 بىرلىكتەن استام تەحنيكاسى پايدالانىلدى.
سۋ تاسقىنى جاعدايىن اۋەدەن باقىلاپ، قۇتقارۋ كۇشتەرىن جۇمىلدىرۋعا ۇ ق ك اۆياتسيا قىزمەتى دە جۇمىلدىرىلدى.
سونىمەن قاتار ۇ ق ك ءتۇرلى بولىمشەلەرىنىڭ ۇجىمدارى سۋ تاسقىنىنان زارداپ شەككەندەرگە كومەك كورسەتۋ ءۇشىن اقشالاي قاراجات جيناۋدى باستاماشىلىقپەن ۇيىمداستىردى. «قازاقستان حالقىنا» قورىنا بارلىعى 330 ميلليون تەڭگەدەن استام قارجى جونەلتىلدى.
Kazinform اگەنتتىگىنىڭ رەداكتياسى ۇلتتىق قاۋىپسىزدىك كوميتەتىنىڭ قىزمەتكەرلەرىن 13-شىلدەدە اتالىپ وتەتىن كاسىبي مەرەكەلەرى -ۇلتتىق قاۋىپسىزدىك كوميتەتىنىڭ كۇنىمەن قۇتتىقتايدى.
اۆتور
ورالحان قوجانوۆ
