تۇرمەگە سالەمدەمە رەتىندە اكەلىنگەن كامپيتتىڭ ىشىنەن كۇتپەگەن زات شىققان

استانا. KAZINFORM - وسكەمەن قالاسىنىڭ 22-تۇزەۋ مەكەمەسىندە ەسىرتكى زاتتارىن كىرگىزۋ ارەكەتىنە توسقاۋىل قويىلدى.

سوتتالعانداردىڭ بىرىنە جىبەرىلگەن سالەمدەمەنى تەكسەرۋ كەزىندە مەكەمە قىزمەتكەرلەرى «توسىن-سىيعا» كۋا بولدى، كامپيت پەن باسقا دا ازىق-تۇلىك ونىمدەرىنىڭ اراسىنا جاسىرىلعان ەسىرتكى تابىلدى، - دەپ حابارلايدى Polisia.kz.

سالەمدەمە سىرتتاي قاراعاندا ەشقانداي كۇدىك تۋدىرمايدى. سەبەبى ىشىندە كادىمگى تاتتىلەر بولدى: كامپيت، كرۋاسسان، قۇرما، سونداي-اق دىمقىل مايلىقتار. الايدا ق ر ءى ءى م ۇلتتىق ۇلان جانە وبلىستىق ق ا ج د- عا قاراستى تۇزەۋ مەكەمەسى قىزمەتكەرلەرىنىڭ قىراعىلىعى مەن كاسىبيلىگى شەشۋشى ءرول اتقاردى.

پاكەتتى مۇقيات تەكسەرۋ كەزىندە ونىمدەردىڭ ىشىنەن ۇنتاقتى زاتتىڭ 12 پاكەتى تابىلعان. بۇل ارەكەتتى جاساعان ادام - سوتتالۋشىنىڭ تانىسى، الماتى قالاسىنىڭ تۇرعىنى ەكەن. ول كۇزەتشىلەردى الداپ، ەسىرتكىنى ازىق-تۇلىك رەتىندە بۇركەمەلەۋ ارقىلى بەرۋگە تىرىستى.

سومكەلەردە ەرەكشە ءيىسى بار قويۋ جاسىل ءتۇستى زات بولدى، بۇل باقىلاۋشىلاردىڭ نازارىن بىردەن اۋداردى. كۇماندى زاتتار بىردەن تاركىلەنىپ، حيميالىق ساراپتاماعا جىبەرىلدى. ساراپتاما ناتيجەلەرى بويىنشا زاتتىڭ ناقتى شىعۋ تەگى مەن قۇرامى انىقتالادى.

دەگەنمەن زاڭسىز ارەكەتتى جاساعان ازاماتتىڭ تىيىم سالىنعان زاتتاردى تۇرمەگە وتكىزۋگە تىرىسقانى انىق. ايتا كەتۋ كەرەك، مۇنداي جاعدايلار بولىپ تۇرادى، قۇقىقبۇزۋشىلار جازاسىن وتەپ جاتقان تانىستارىنا ەسىرتكى زاتتارىن جەتكىزۋ جولىندا ءتۇرلى ايلا-ءتاسىلدى ويلاپ تابادى. ولار اياق كيىم مەن كيىمنەن باستاپ، ازىق-تۇلىك پەن جەكە كۇتىم زاتتارىنا دەيىن كۇتپەگەن جەرلەرگە بارىنشا «توسىن-سىيلار» جاسىرىپ، ءارتۇرلى ادىستەر مەن امالداردى قولدانادى.

الايدا تۇزەۋ مەكەمە قىزمەتكەرلەرى مەن ۇلتتىق ۇلان اسكەري قىزمەتشىلەرىنىڭ تاجىريبەسىنىڭ ارقاسىندا مۇنداي ارەكەتتەر اشكەرە بولادى. كۇدىكتى - الماتى تۇرعىنىنا قاتىستى قازاقستان رەسپۋبليكاسى قىلمىستىق كودەكسىنىڭ 297-بابىنىڭ 2-بولىگى (ەلەۋلى مولشەردە جاسالعان ەسىرتكى قۇرالدارىن نەمەسە پسيحوتروپتىق زاتتاردى وتكىزۋ ماقساتىندا زاڭسىز دايىنداۋ، قايتا وڭدەۋ، ساتىپ الۋ، ساقتاۋ، تاسىمالداۋ نە جونەلتۋ) بويىنشا قىلمىستىق ءىس قوزعالدى. ەندى ول وسى ارەكەتتەرى ءۇشىن زاڭ الدىندا جاۋاپ بەرەدى.