تۇركىستاندىق جانكۇيەر ءۇيىنىڭ قاقپاسىن قوس كوماندانىڭ لوگوتيپىمەن بەزەندىردى

تۇركىستان. KAZINFORM - الماتىدا وتەتىن «قايرات» پەن «رەال مادريد» اراسىنداعى كەزدەسۋ قارساڭىندا فۋتبولسۇيەر قاۋىم ءوز سۇيىكتى كوماندالارىنا ءتۇرلى باعىتتا قولداۋ كورسەتىپ جاتىر.

تۇركىستاندىق جاس سۋرەتشى رامازان ءسادۋاقاستىڭ ارەكەتى ەرەكشەلىگىمەن كوپشىلىكتى ءتانتى ەتتى. ول ءوز اۋلاسىنداعى قاقپاعا ەكى كلۋبتىڭ لوگوتيپىن سالعان. سودان الەۋمەتتىك جەلىگە جۇكتەگەن. جارتى ميلليوننان استام قارالىم جيناعان ءبىر ساتتىك ۆيدەوعا ءالى دە قولداۋ كورسەتىپ جاتقاندار كوپ.

- بالا كۇنىمنەن «رەال مادريدتىڭ» جانكۇيەرىمىن. ءبىراق بۇل جولى وتاندىق كلۋبقا قولداۋ كورسەتەمىن. يدەيانى جاڭالىقتاردان كورىپ، ىسكە اسىرۋعا بەل بۋدىم. بىرنەشە قۇتى بوياۋ جۇمسالدى، وتباسىم قارسى بولمادى، قايتا كومەكتەستى، - دەيدى جانكۇيەر.

كۇندەلىكتى جۇمىستان كەيىن قولىنا قىلقالامىن الاتىن رامازان بۇل جۇمىسقا ءبىر اپتاعا جۋىق ۋاقىتىن ارناعان.

ايتا كەتەيىك، بۇدان بۇرىن «قايرات» - «رەال مادريد» كەزدەسۋىندە كىمدەر تورەشىلىك ەتەتىندىگىن جازعان بولاتىنبىز.