تۇركىستانداعى «TURAN» ارنايى ەكونوميكالىق ايماعىندا 1000 جۋىق جۇمىس ورنى قۇرىلادى
تۇركىستان. KAZINFORM - تۇركىستان وڭىرىندە جاڭا زاۋىتتار اشۋ، كاسىپورىندار سالۋ جۇمىستارىنا باسىمدىق بەرىلگەن. وسى باعىتتا جۇيەلى جۇمىس ءجۇرىپ جاتىر.
اتاپ ايتار بولساق، «Turan» ارنايى ەكونوميكالىق ايماعىنداعى ينجەنەرلىك ينفراقۇرىلىمداردىڭ قۇرىلىس جۇمىستارى اياقتالعان سوڭ، مۇندا 50 گە جۋىق كاسىپورىن ورنالاسىپ، جۇمىسىن باستايتىن بولادى. ناتيجەسىندە، 1000 عا جۋىق جاڭا جۇمىس ورنى اشىلادى دەپ كۇتىلىپ وتىر.
تۇركىستان قالاسى ماڭىندا «Turan» ارنايى ەكونوميكالىق ايماعى قۇرىلىپ، ينجەنەرلىك ينفراقۇرىلىممەن قامتۋ ماقساتىندا قۇرىلىس جۇمىستارى قارقىندى جۇرگىزىلىپ جاتىر. تۇركىستان وبلىسىنىڭ اكىمى دارحان ساتىبالدى اتالعان ايماققا بارىپ، جاي- كۇيىمەن تانىستى.
«Turan» ارنايى ەكونوميكالىق ايماعىنا ۇلكەن ءۇمىت ارتىلىپ وتىر. سوندىقتان ينفراقۇرىلىممەن قامتۋ جۇمىستارى ساپالى اتقارىلۋى ءتيىس. وسى ايماقتا سۋ قورىن مولايتۋدى قولعا الىڭىزدار. كوگالداندىرۋ دا نازاردان تىس قالماۋى ءتيىس. اتالعان ايماقتا ورنالاساتىن جوبالاردى قازىردەن ىرىكتەپ، ينۆەستورلارمەن، كاسىپكەرلەرمەن ءتيىستى جۇمىس جۇرگىزىڭىزدەر»، - دەگەن دارحان ساتىبالدى جاۋاپتىلارعا تاپسىرمالار بەردى.
«Turan» ارنايى ەكونوميكالىق ايماعىندا بۇگىنگى تاڭدا ءورت ءسوندىرۋ دەپوسى، گاز جۇيەلەرى، ينتەرنەت جەلىسىنىڭ جۇمىستارى %100 عا اياقتالعان. جولدىڭ 1,4 شاقىرىمىنا اسفالت جابىندىسى توسەلگەن. جولدى تولىق 2024 -جىلدىڭ قازان ايىندا پايدالانۋعا بەرۋ جوسپارلانعان. تەمىرجول قۇرىلىس جۇمىستارى %40 عا ورىندالىپ، تەمىرجولدىڭ 2,1 شاقىرىمىنا رەلستەر ورناتىلدى.
سونىمەن قاتار سۋ جانە كارىز جەلىلەرىنىڭ قۇرىلىس جۇمىستارى %70 عا ورىندالىپ، سۋ قۇبىرىنىڭ 8,5 شاقىرىمى تارتىلدى. كارىز جۇيەسىنىڭ 3 شاقىرىمىنا قۇبىر جۇرگىزىلدى. اتالعان نىساندارىدىڭ قۇرىلىس جۇمىستارى جىل سوڭىنا دەيىن تولىق اياقتالىپ، پايدالانۋعا بەرىلەدى دەپ جوسپارلانىپ وتىر.
ەلەكترمەن جابدىقتاۋ جۇمىستارىن اياقتاۋ 2025 -جىلعا جوسپارلانعان. اتقارىلىپ جاتقان جۇمىستاردىڭ بارىسى وبلىس اكىمى مەن وبلىستىق قۇرىلىس باسقارماسى ماماندارىنىڭ تۇراقتى قاداعالاۋىندا.
