تۇركىستان وبلىسىندا زاڭسىز اڭ اۋلاعان سيريا ازاماتتارى ۇستالدى
تۇركىستان. KAZINFORM - مەملەكەتكە كەلتىرىلگەن شىعىننىڭ كولەمى 1 ميلليارد تەڭگەدەن اسادى.
كۇدىكتىلەردەن 382 اقبوكەن ءمۇيىزى، 119 توماعا، 20 دان استام قۇس ۇستاۋعا ارنالعان تۇزاق، 7 راتسيا، اڭشىلىق جانە پنيەۆماتيكالىق مىلتىق، وپتيكالىق كورۋ قۇرالى، جارىقتاندىرعىش، 15 كەلىگە جۋىق ارقار ەتى جانە باسقا دا زاتتاي دالەلدەمەلەر تاركىلەندى.
مەملەكەتكە كەلتىرىلگەن شىعىننىڭ الدىن الا ەسەپتەلگەن كولەمى 1 ميلليارد تەڭگەدەن اسادى.
قازىر براكونەرلىك فاكتىسى بويىنشا قىلمىستىق ءىس قوزعالىپ، ءتيىستى ساراپتامالار تاعايىندالدى.
«ءتارتىپ ساقشىلارى سوزاق اۋدانى مەن شىمكەنت قالاسى اۋماعىندا ق ر قىزىل كىتابىنا ەنگىزىلگەن جانۋارلار مەن قۇستاردى زاڭسىز اۋلاۋ، سونداي- اق دەريۆاتتاردى ساقتاۋ جانە ساتۋعا كۇدىكتى ادامدار توبىنىڭ قىلمىستىق ارەكەتىن انىقتاپ، جولىن كەستى. جالپى 7 ادام ۇستالدى. پوليتسياعا جەتكىزىلگەندەردىڭ تورتەۋى قازاقستان ازاماتى، ال قالعان ۇشەۋى ەلىمىزدە تۇرۋعا ىقتيارحاتى بار سيريا ازاماتتارى»- دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتتا.
