تۇركىستان وبلىسىندا ناۋرىز مەيرامى 10 كۇن بويى تويلانادى
تۇركىستان. KAZINFORM - تۇركىستان وبلىسى مەن شىمكەنت قالاسىنىڭ تۇرعىندارى كورىسۋ كۇنىن بىرگە اتاپ وتەدى.
«14 ناۋرىز - «كورىسۋ كۇنى» - امال مەرەكەسى» بيىل ورداباسى اۋدانى، تەمىرلان اۋىلىنداعى ء«شامشى» اللەياسىندا ۇيىمداستىرىلادى. وندا تۇركىستان وبلىسى مەن شىمكەنت قالاسى تۇرعىندارىنىڭ كورىسۋ ءراسىمى وتەدى. اتالعان شارادا قوس ءوڭىردىڭ زيالى قاۋىم وكىلدەرى، ارداگەرلەر، ەتنوس وكىلدەرى مەن ونەرپازدارى كەزدەسىپ، كورىسۋ كۇنى ورىندالاتىن بارلىق ءراسىمدى بىرلەسە اتقاراتىن بولادى.
سونداي-اق، وسى كۇنى «ناۋرىز - جاقسىلىقتىڭ جارشىسى» اتاۋىمەن وبلىستىق چەللەنج باستاۋ الادى.
ال، 15-ناۋرىز - «قايىرىمدىلىق» كۇنى رەتىندە اتالىپ وتپەك. بۇل كۇنى اۋدان-قالالاردا، اۋىلداردا جاعدايى تومەن وتباسىلارعا، مۇمكىندىگى شەكتەۋلى ازاماتتارعا كومەك كورسەتىلەدى جانە قوعامنىڭ وسال توپتارىنا، سوعىس، ەڭبەك ارداگەرلەرىنە، باتىر انالارعا ارنايى سىيلىقتار تاپسىرىلادى.
16-ناۋرىز كۇنى «شاڭىراق»، 17-ناۋرىز - «مادەنيەت جانە ۇلتتىق سالت-ءداستۇر كۇنى»، 18-ناۋرىز - «ۇلتتىق كيىم كۇنى»، 19-ناۋرىز «جاڭارۋ كۇنى» رەتىندە اتالىپ وتەدى.
ءاربىر كۇن اياسىندا كونسەرتتىك باعدارلامالار مەن ءتۇرلى ءىس-شارالار ۇيىمداستىرىلادى.
ال، 21-ناۋرىز «قوش كەلدىڭ - ءاز ناۋرىز!» دەگەن اتاۋمەن تۇركىستان قالاسىنداعى «كەرۋەن» سارايى اۋماعىندا مەرەكەلىك سالتاناتتى ءىس-شارا جوسپارلانىپ وتىر.
سونداي-اق، وسى كۇنى قازاق ەسترادا جۇلدىزدارىنىڭ قاتىسۋىمەن «ءان مەن ءانشى تۇركىستان تورىندە» كونسەرتتىك باعدارلاماسىمەن قورىتىندىلانادى.
- 22-ناۋرىز «جىل باسى» كۇنى تۇركىستان قالاسى مەن بارلىق اۋدان-قالاداعى ورتالىق الاڭدار مەن ساياباقتاردا كورمەلەر، كونسەرتتىك باعدارلامالار، ۇلتتىق سپورتتىق ويىندار مەرەكە كوركىن قىزدىرادى. سونداي-اق، «كونگرەسس حولل» كەشەنىندە رەسپۋبليكالىق اقىندار ايتىسى، تۇركىستان مۋزىكالىق دراما تەاترىندا 2 كۇن بويى «ۆالس كورولى» قويىلىمى كورەرمەن نازارىنا ۇسىنىلادى. ال 23-ناۋرىز «تازارۋ» كۇنى - وبلىس كولەمىندە جالپىحالىقتىق سەنبىلىك ۇيىمداستىرىلىپ، اۋداندار مەن قالالاردا تازالىق جۇمىستارى جۇرگىزىلەدى، - دەدى ءازىمحان قويلىبايەۆ.
ايتا كەتەيىك، بۇدان بۇرىن تۇركىستان وبلىسىندا باتا بەرۋ جانە جاراپازان ايتۋدان جارىس وتەتىندىگىن جازعان بولاتىنبىز.
