تۇركىستان وبلىسىندا ماقتا تەرىمى باستالدى
تۇركىستان. KAZINFORM - جەتىسايلىق شارۋالار بيىل قىتايلىق «60» دەگەن ماقتا سورتىن ەككەن بولاتىن. ءبىر ەرەكشەلىگى ماقتانىڭ بۇل ءتۇرىنىڭ تالشىعى كوپ، ءشيتى از. ءتىپتى قۇرت جەمەيدى.
جەتىساي اۋدانىندا ماقتا تەرىم ناۋقانىن العاشقى بولىپ باستاعانداردىڭ ءبىرى «ايدار» شارۋا قوجالىعىنىڭ ءتوراعاسى ەربول ايتۋعانوۆ. ول يەلىگىندەگى 14 گەكتار جەرگە قىتايلىق «60» سورتىنىڭ شيتىن سەپكەن. بيىل شارۋا گەكتارىنان ورتا ەسەپپەن 50 سەنتنەردەن ءونىم الۋدى جوسپارلاپ وتىر. سەبەبى، بۇل سورتتىڭ بۇعان دەيىنگى ماقتا سورتتارىنا قاراعاندا تالشىعى كوپ، شيتى از. اگروتەحنيكالىق شارالارى دۇرىس جۇرگىزىلسە مول ءونىم الۋ مۇمكىندىگى دە جوعارى.
«اعىن سۋدان، مينەرالدى تىڭايتقىشتاردان بيىل قيىندىق كورمەۋىمىزدىڭ ناتيجەسىندە ونىمدىلىك جاقسى. الدىن ءبىز سۇلتان، ماقتاارال، بۇقارا دەگەن سورتتاردى ەگەتىن ەدىك. ءونىم 20-25 سەنتنەردى قۇرايتىن. ال، قالعانىن قۇرت جەيتىن. بيىل قىتايدىڭ 60 دەگەن سورتىن ەكتىك. مول ءونىم الىپ جاتىرمىز»، - دەيدى ەربول ايتۋعانوۆ.
بيىلعى جىلى جەتىساي اۋدانىنداعى 79,3 مىڭ گەكتار سۋارمالى جەردىڭ 40,8 مىڭ گەكتارىنا ماقتا ءشيتى ەگىلگەن. قازىردىڭ وزىندە وڭىردە 200 تونناعا جۋىق ماقتا تەرىلدى. ناۋقانعا 715 تراكتور مەن 897 تراكتور تىركەمەلەرى، 232 ماقتا تەرىم ماشينالارى جۇمىلدىرىلىپ وتىپ.
وتكەن جىلى 122 مىڭ توننا اق ۇلپا جيناعان جەتىسايلىق شارۋالار بيىلعى جىلى دا سول مەجەنى ورىنداۋعا نيەتتى. ويتكەنى، ءونىم ساپاسىن ارتتىرىپ، اعىن سۋدى ۇنەمدەۋدىڭ ءتيىمدى تەحنولوگياسى سانالاتىن تامشىلاتىپ سۋعارۋ ءادىسى بيىلدىڭ وزىندە 2 مىڭ گەكتارعا ارتقان.
ونىڭ 300 گەكتاردان استامى ماقتا داقىلىن وندىرۋشىلەردىڭ ەنشىسىندە.
