تۇركىستان وبلىسىندا كونگو-قىرىم گەمورراگيالىق قىزباسىمەن اۋىرعان تۇرعىن قايتىس بولدى
تۇركىستان. KAZINFORM - جالپى جىل باسىنان بەرى وبلىس بويىنشا كەنە شاققان 1332 ادام مەديتسينالىق ۇيىمعا قارالعان.
وتكەن جىلدىڭ سايكەس كەزەڭىمەن سالىستىرعاندا بۇل كورسەتكىش 14,2 پايىزعا تومەندەگەن. دەگەمەن، كونگو- قىرىم گەمورراگيالىق قىزباسىمەن اۋىرعان ءبىر تۇرعىن كورسەتىلگەن ەم شارالارعا قاراماستان قايتىس بولدى.
تۇركىستان وبلىسىنىڭ سانيتاريالىق- ەپيدەميولوگيالىق باقىلاۋ دەپارتامەنتىنىڭ ماماندارى كەنە شاققاندا اسا قاۋىپتى ينفەكتسيانى جۇقتىرۋ مۇمكىن ەكەنىن، مىندەتتى تۇردە جەكە باستى قورعاۋ، ساقتانۋ قۇرالدارىن پايدالانۋ كەرەكتىگىن ەسكەرتەدى.
«تابيعاتقا دەمالىسقا شىققاندا كەنەنىڭ جابىسقانى كورىنەتىن اشىق ءتۇستى جاقسى قورعالعان رەزەڭكەلى مانجەتتى جەڭى ۇزىن كويلەك كيۋ قاجەت. دەنەگە كەنەنىڭ جابىسقانىن تەكسەرۋ ءۇشىن ءوزىڭىز جانە وزىڭىزگە بايقالمايتىن ورىنداردى (مويىن، باستىڭ شاش بولىگى، دەنەنىڭ ارتقى جاعى ت. ب. ) ءبىر- ءبىرىڭىزدىڭ ۇستەرىڭىزدى مۇقيات قاراپ وتىرۋ كەرەك. دەنەنىڭ اشىق جەرلەرىنە جانە كيىمگە كەنە اعزاسىنا كەرى اسەر ەتەتىن نەمەسە ونى جويۋعا ارنالعان ارنايى اكارورەپەلەنتتەردى، اكاريتسيدتەردى جانە جەكە قورعانۋ قۇرالدارىن قولدانىڭىزدار»- دەيدى سالا ماماندارى.
بۇگىندە تۇركىستان وبلىسىنىڭ بارلىق ايماعىندا كەنە شاعۋ جاعدايلارى كەزدەسەدى. ونىڭ ىشىندە بايدىبەك، ماقتاارال، ورداباسى، وتىرار، سايرام، سوزاق، شاردارا اۋداندارى مەن ارىس قالاسى اۋماعىندا تۇرعىنداردى بىرنەشە رەت كەنە شاققان.
«كەنە شاققان نەمەسە كەنەمەن جاناستا بولعان جاعدايلاردا مىندەتتى تۇردە مەديتسينالىق ۇيىمعا قارالعانىڭىز ءجون جانە 14 كۇن مەديتسينالىق باقىلاۋدا بولۋىڭىز قاجەت. دەنەگە جابىسقان كەنەنى كادىمگى پينتسەتپەن ونى تەرىگە مۇمكىندىگىنشە جاقىنداتا وتىرىپ، ءىلىپ الۋ قاجەت. پينتسەتتى قاتتى قىسپاي، شايقالتپاي، جۇلقىماي ابايلاپ تارتۋ كەرەك. ەگەر كەنەنىڭ اۋىز بولىگى تەرىدە قالىپ قويعان جاعدايدا پينتسەتپەن تارتىپ شىعارىڭىز. كەنەنىڭ تەرىدەگى شاققان ورىنىن سپيرتپەن، يودپەن وڭدەپ، قولدى سابىنمەن جۋۋ قاجەت. الىنعان كەنەنى قاقپاعى تىعىز جابىلاتىن ىدىسقا سالىپ، جەرگىلىكتى مەديتسينالىق ۇيىمعا قارالىڭىز»- دەلىنگەن ماماندار كەڭەسىندە.
ايتا كەتەيىك، بۇدان بۇرىن الەمدى جاڭا ىندەت جايلاۋى ىقتيمال ەكەنىن جازعان بولاتىنبىز. دۇنيەجۇزىلىك دەنساۋلىق ساقتاۋ ۇيىمى الەمدە كەز كەلگەن ۋاقىتتا ءورشۋى مۇمكىن جاڭا پاندەميانىڭ پايدا بولۋ ىقتيمالدىعى تۋرالى ەسكەرتتى.
