تۇركىستان وبلىسىندا جۇك كولىگىمەن قالىڭدىق الىپ كەلگەن جۇرگىزۋشىلەر جاۋاپقا تارتىلدى
تۇركىستان. KAZINFORM - وقيعا قازىعۇرت اۋىلىندا بولعان. جول ەرەجەسىن ورەسكەل بۇزعان جۇرگىزۋشىلەردىڭ كولىكتەرى ايىپتۇراققا قويىلدى.
ءتارتىپ ساقشىلارى كورتەج جاساپ جۇرگەن مەملەكەتتىك ءنومىرى جوق كولىكتەردى انىقتاعان. سونداي- اق ولاردىڭ اراسىندا ارنايى جارىق شامدارىن جاعىپ جۇرگەن جۇك كولىگى دە بولعان.
پوليتسيا قىزمەتكەرلەرى جول ەرەجەسىن ورەسكەل بۇزعان جۇرگىزۋشىلەردى توقتاتىپ، ولاردىڭ كولىگىن ايىپتۇراققا قويعان. ونىڭ ىشىندە «VOLVO FH» جۇك كولىگىنىڭ جۇرگىزۋشىسىنە اۆاريالىق جاعداي تۋعىزىپ، باعدارشامنىڭ تىيىم سالىنعان سيگنالىنا قاراماي وتكەنى جانە مەملەكەتتىك تىركەۋ ءنومىرى بولماعانى ءۇشىن، جول بەلگىلەرىمەن نەمەسە جولدىڭ ءجۇرۋ بولىگىندەگى تاڭبالارمەن كورسەتىلگەن تالاپتاردى ساقتاماعانى، ءتيىستى رۇقساتسىز قايتا جابدىقتالعان كولىك قۇرالىن باسقارعانى ءۇشىن 5 حاتتاما تولتىرىلدى.
سونىمەن قاتار جاساعان قۇقىق بۇزۋشىلىقتارىنا ساي «LADA 21144» ماركالى كولىك جۇرگىزۋشىسىنە ءۇش، ال «LADA GRANTA FL» كولىگىنىڭ جۇرگىزۋشىسىنە ەكى اكىمشىلىك حاتتاما تولتىرىلدى.
«قۇقىق بۇزۋشىلار توي كورتەجىن ۇيىمداستىرىپ، كەلىن اكەلە جاتقانى بەلگىلى بولدى. قۇقىق بۇزۋشىلار كىنالارىن مويىنداپ، الداعى ۋاقىتتا قايتالامايتىندىقتارىن جەتكىزدى»، - دەلىنگەن تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتتا.
