تۇركىستان وبلىسىندا 213 كاسىپكەر ازىق-تۇلىك باعاسىن نەگىزسىز كوتەرگەن
تۇركىستان. KAZINFORM - تۇركىستان وبلىسىندا ازىق- تۇلىك باعاسىنىڭ تۇراقتىلىعى باستى نازاردا. ق ر «ساۋدا قىزمەتىن رەتتەۋ تۋرالى» زاڭىنىڭ 9-بابىنا سايكەس، ساتۋشىلار الەۋمەتتىك ماڭىزى بار ازىق-تۇلىك باعاسىنا 15 پايىزدان ارتىق ۇستەمەاقى قوسپاۋى ءتيىس.
ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتى تاراپىنان الەۋمەتتىك ماڭىزى بار ازىق-تۇلىك باعاسىن نەگىزسىز كوتەرگەن 213 كاسىپكەرلىك سۋبەكتىسىنە اكىمشىلىك شارا كورىلىپ، زاڭ بۇزۋشىلىقتار جويىلدى.
قازىرگى ۋاقىتتا ءامات تىزىمىنە 19 تاۋار كىرەدى. ولاردىڭ قاتارىندا ءبىرىنشى سورتتى بيداي ۇنى، ءبىرىنشى سورتتى ۇننان جاسالعان بيداي نانى (ءپىشىندى)، روجكي (ولشەنىپ سالىناتىن)، قاراقۇمىق جارماسى (ءدان، ولشەنىپ سالىناتىن)، تازارتىلعان كۇرىش (دومالاق ءداندى، ولشەنىپ سالىناتىن)، كارتوپ، اسحانالىق ءسابىز، باستى پياز، اق قاۋداندى قىرىققابات، اق قانت - قۇمشەكەر، كۇنباعىس مايى، سيىر ەتى (سۇيەكتى جاۋىرىن - ءتوس بولىگى)، تاۋىق ەتى (سان سۇيەك جانە ىرگەلەس جۇمساق ەتى بار سان جىلىك)، مايلىلىعى %2,5 بولاتىن جۇمساق قاپتاماداعى پاستەرلەنگەن ءسۇت پەن ايران، سارى ماي (تۇزدالماعان، مايلىلىعى كەمىندە %72,5، تولىقتىرعىشتار جانە وسىمدىك مايلارى جوق)، تاۋىق جۇمىرتقاسى (I ساناتتى)، اس تۇزى («ەكسترا» - دان باسقا)، سۇزبە بار.
«جالپى تۇركىستان وبلىسىندا الەۋمەتتىك ماڭىزى بار ازىق-تۇلىك تاۋارلارىنىڭ باعاسى تۇراقتى جانە باعاسىن نەگىزسىز وسىرمەۋ بويىنشا جۇمىستار كۇندەلىكتى باقىلاۋدا. سونىمەن قاتار ءتيىستى شارالار ءوز كەزەڭىمەن جالعاسادى»، - دەلىنگەن تۇركىستان وبلىسى اكىمىنىڭ باسپا ءسوز قىزمەتى تاراتقان اقپاراتتا.
