تۇركىستان -ءابۋ-دابي باعىتى بويىنشا اۋە رەيسى اشىلادى
2024-جىلدان باستاپ تۇركىستان -ءابۋ-دابي باعىتى بويىنشا تۇراقتى رەيستەر ىسكە قوسىلادى
Wizz Air Abu-Dhabi اۋە كولىگى تۇركىستان قالاسىنا ۇشا باستايدى، دەپ حابارلايدى Kazinform.
كولىك مينيسترلىگىنە قاراستى ازاماتتىق اۆياتسيا كوميتەتى حالىقارالىق باعىتتار بويىنشا ۇشۋ گەوگرافياسىن كەڭەيتۋگە قاتىستى جۇمىستار جالعاسىپ جاتقانىن مالىمدەدى.
وسىلايشا، كەلەسى جىلدىڭ 16-قاڭتارىنان باستاپ Wizz Air Abu - Dhabi اۋە كومپانياسى تۇركىستان - ءابۋ-دابي باعىتى بويىنشا تۇراقتى رەيستەردى ىسكە قوسادى. رەيستەر Airbus A321 ۇلگىسىندەگى اۋە كەمەلەرىندە اپتاسىنا 3 رەيس جيىلىگىمەن ورىندالادى دەپ جوسپارلانىپ وتىر.
اتاپ ايتقاندا، اتالعان رەيستەر سەيسەنبى، بەيسەنبى، سەنبى كۇندەرى جۇزەگە اسىرىلاتىن بولادى. جاڭا اۋە باعىتى بويىنشا رەيستەردى ىسكە قوسۋ تۇركىستان قالاسىنىڭ تۇرعىندارىنا ءابۋ-دابي قالاسى ارقىلى ترانزيتپەن باسقا باعىتتار بويىنشا ودان ءارى ۇشۋعا مۇمكىندىك بەرەدى.
جاڭا حالىقارالىق اۋە باعىتىنىڭ اشىلۋى قازاقستان مەن ب ا ءا اراسىنداعى ساۋدا- ەكونوميكالىق، ىسكەرلىك، ينۆەستيتسيالىق، تۋريزم جانە مادەني ىنتىماقتاستىقتى ودان ءارى دامىتۋعا ىقپال ەتپەك.
