تۇركيانىڭ تاعى ءبىر مۇناي وڭدەۋ زاۋىتىندا جارىلىس بولدى
استانا. KAZINFORM - تۇركيانىڭ يزمير قالاسىندا ورنالاسقان «TÜPRAŞ» مۇناي وڭدەۋ زاۋىتىنداعى شيكى مۇنايدى قايتا وڭدەيتىن قۇرىلعىدا جارىلىس بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
الدىن الا مالىمەتتەر بويىنشا، وقيعا تەحنيكالىق اقاۋ سالدارىنان بولعان. الايدا، جارىلىستىڭ ناقتى سەبەبى ءالى بەلگىسىز. جارىلىس بولعان سوڭ، وقيعا ورنىنا بىردەن ءورت سوندىرۋشىلەر، قۇتقارۋشىلار مەن مەديتسينا قىزمەتكەرلەرى جىبەرىلدى.
جارىلىستان سوڭ ءورت شىعىپ، ول از ۋاقىتتا وقشاۋلانعان. قازىرگى تاڭدا جارىلىستىڭ سالدارىنان زارداپ شەككەندەر تۋرالى رەسمي اقپارات جوق، دەگەنمەن جەرگىلىكتى بيلىك ولاردىڭ بولۋ مۇمكىندىگىن جوققا شىعارمايدى.
«TÜPRAŞ» زاۋىتىنىڭ باسشىلىعى وقيعانىڭ ءمان- جايىن انىقتاۋ ءۇشىن شۇعىل قىزمەت وكىلدەرىمەن تىعىز بيلانىستا جۇمىس ىستەپ جاتقانىن مالىمدەدى. ۇجىم قىزمەتكەرلەرى مەن قورشاعان ورتانىڭ قاۋىپسىزدىگى ءۇشىن زاۋىت جۇمىسى ۋاقىتشا توقتاتىلدى.
ەكولوگتار قورشاعان ورتاعا زيان كەلۋ مۇمكىندىگىنە الاڭداۋلى، سەبەبى مۇندا وڭدەلەتىن مۇناي كولەمى وتە مول. جارىلىستىڭ داۋسى قاتتى شىققان جانە ارتىنان تاراعان ءتۇتىن الىستان كورىنىپ تۇرعان. وسىعان بايلانىستى جاعدايعا جەرگىلىكتى تۇرعىندار دا الاڭداۋلى.
«TÜPRAŞ» تۇركيانىڭ ءىرى مۇناي وڭدەۋشى زاۋىتتارىنىڭ ءبىرى جانە ول ەلدى ەنەرگورەسۋرستارمەن قامتاماسىز ەتۋدە ستراتەگيالىق ماڭىزعا يە.
وقيعا ورنىندا قاجەتتى جۇمىستار اتقارىلىپ جاتىر. جەرگىلىكتى بيلىك وكىلدەرى جاقىن ارادا بولعان وقيعانى بۇگىن- شىگەسىنە دەيىن باياندايدى دەگەن ءۇمىت بار.
وسىعان دەيىن تۇركيانىڭ يزميت قالاسىندا ورنالاسقان «TÜPRAŞ» ءىرى مۇناي وڭدەۋ زاۋىتىندا جارىلىس بولعانىن جازعان ەدىك.
سونداي- اق تۇركيادا العاشقى كۆانتتى كومپيۋتەر تانىستىرىلعانى تۋرالى جازدىق.
