تۇركيا پوليتسياسى ىستانبۇلدا 3,6 ميلليون جالعان ەۋرو تاركىلەدى
استانا. KAZINFORM - تۇركيا پوليتسياسى ىستانبۇلدا اۋقىمدى شارا وتكىزىپ، ونىڭ بارىسىندا 3,6 ميلليون جالعان ەۋرو تاركىلەندى، دەپ حابارلايدى Kazinform مەنشىكتى ءتىلشىسى.
بۇل ارنايى وپەراتسيا جالعان اقشا جاساۋ جانە ساتۋمەن اينالىساتىن قىلمىستىق توپ ارەكەتىنىڭ جولىن كەسۋگە باعىتتالعان.
تۇرىك قۇقىق قورعاۋ ورگاندارى جالعان ەۋرودان بولەك، بىرنەشە ءىرى بانكتەردىڭ اتىنا باسىلعان كونترافاكتىلىك چەكتەردى، سونداي- اق جالعان اقشا جاساۋ ءۇشىن پايدالانىلعان باسپا ۇلگىلەرىن دە تاركىلەدى.
جالعان اقشا جاساۋشىلار ۇلگىلەردى جالعان كۋپيۋرالاردى باسىپ شىعارۋ ءۇشىن پايدالاندى، بۇل ولارعا ەۋرونىڭ ناقتى كوشىرمەلەرىن جاساۋعا مۇمكىندىك بەردى.
كۇش قۇرىلىمدارىنىڭ جەدەل ءىس- شارالارى بارىسىندا بىرنەشە كۇدىكتى ۇستالدى. قىلمىستىق توپ تەك تۇركيادا عانا ەمەس، باسقا ەلدەر اۋماعىندا دا ارەكەت ەتكەن.
جالعان اقشا جاساۋشىلار زاڭسىز قارجىلىق وپەراتسيالارمەن اينالىساتىن ءىرى حالىقارالىق قىلمىستىق جەلىلەرمەن بايلانىسى بولۋى مۇمكىن دەپ شامالانىپ وتىر.
قازىرگى ۋاقىتتا تۇركيانىڭ تەرگەۋ ورگاندارى جالعان ەۋرونى تاراتۋ سحەماسى مەن جولدارىنا قاتىسۋشىلاردىڭ بارلىعىن انىقتاۋ جۇمىستارىن جالعاستىرىپ جاتىر.
بۇرىن حابارلاعانىمىزداي، تۇركيادادا ەسكى دوللار كۋپيۋراسىن قابىلداۋ توقتاتىلدى.
مامانداردىڭ ايتۋىنشا، تۇركيا نارىعىندا 600 ميلليون دوللارعا جۋىق جالعان 50 جانە 100 دوللارلىق كۋپيۋرالار بار.
