تۇركيا فۋتبولىندا تورەشىنى سوققىعا جىققان: ەردوعان كىنالىلەردى قاتاڭ ايىپتادى

فۋتبولدان تۇركيا چەمپيوناتىندا تورەشىنى سوققىعا جىققاندار قاتاڭ جازالانباق. «انكاراگيۋدجيۋ» مەن «ريزەسپور» كوماندالارى اراسىندا وتكەن ويىنداعى جاعدايعا پرەزيدەنت رەجەپ تايىپ ەردوعاننىڭ ءوزى نازار اۋداردى.

15-تۋرداعى «انكاراگيۋدجيۋ» مەن «ريزەسپور» اراسىنداعى ويىن 1:1 ەسەبىمەن اياقتالدى. ويىندا باس تورەشى 50-مينۋتتا الاڭ يەلەرى ويىنشىسى الي سوۋعا قىزىل قاعاز كورسەتىپ، الاڭنان قۋدى. ال كەزدەسۋ اياقتالار تۇستا قوناقتار دا 10 ويىنشىمەن قالدى. سونداي-اق «ريزەسپور» ويىنشىلارى سوڭعى ساتتە ەسەپتى تەڭەستىرىپ تە ۇلگەردى. بۇعان قارسى بولىپ، اشۋعا بۋلىققان «انكاراگيۋدجيۋ» كومانداسىنىڭ پرەزيدەنتى فارۋك قوجا باس تورەشى حاليل ۋمۋت مەلەردى سوققىعا جىققان. وعان قوسا تاعى بىرنەشە ادام قول جۇمساعان. باس تورەشى جاراقات الىپ، اۋرۋحاناعا ءتۇستى.

 

«انكاراگيۋدجيۋ» مەن «ريزەسپور» ماتچىنان كەيىن تورەشى حاليل ۋمۋت مەلەرگە جاسالعان شابۋىلدى قاتاڭ ايىپتايمىن جانە ونىڭ تەزىرەك ساۋىعىپ كەتۋىن تىلەيمىن. سپورت - تاتۋلىق پەن باۋىرمالدىق دەگەن ءسوز. سپورت زورلىق-زومبىلىقپەن ۇيلەسپەيدى. ءبىز تۇرىك سپورتىندا زورلىق-زومبىلىققا ەشقاشان جول بەرمەيمىز، - دەپ جازدى ەردوعان الەۋمەتتىك جەلىدە.

انكارا پوليتسياسى بۇل وقيعاعا قاتىستى ءىس قوزعاعان. ەلدىڭ مينيسترلىكتەرى دە بۇل ىسكە قاتىستى مالىمدەمە جاساپ، كىنالىلەردى قاتاڭ جازالاۋ جايىندا مالىمدەدى.

massaget.kz