تۇركيا بوسفور جانە داردانەلل بۇعازدارى ارقىلى وتەتىن كەمەلەر اقىسىن تاعى دا كوتەردى
استانا. KAZINFORM - بۇگىننەن باستاپ تۇركيا ستراتەگيالىق ماڭىزى بار بوسفور جانە داردانەلل بۇعازدارى ارقىلى كەمەلەردىڭ ترانزيتتىك ءوتۋ تولەمىن تاعى دا ارتتىردى، دەپ حابارلايدى Kazinform ءتىلشىسى.
قازىر كەمەلەردىڭ ءوتۋ قۇنى %15 عا ءوستى جانە تازا سۋ ىعىستىرۋ تونناسىنا 5,83 دوللار بولدى.
بۇل تۇركيا پرەزيدەنتى رەجەپ تايىپ ەردوعاننىڭ جارلىعىمەن تاريفتەردى قايتا قاراۋ پروتسەسى باستالعان 2022-جىلدان بەرگى ءتورتىنشى ءوسىم. ءۇش جىل ىشىندە ءوتۋ قۇنى 7,2 ەسەگە ءوستى.
تولەمدەر مونترە كونۆەنتسياسىنىڭ ەرەجەلەرىنە سايكەس ەسەپتەلەدى جانە ترانزيتتىك كەمەلەرگە قولدانىلادى. ەل بيلىگى تولەمنىڭ ءوسۋى تەڭىز تاسىمالىنىڭ ارتۋى، تاۋەكەلدەردىڭ ارتۋى، سونداي-اق جاعالاۋ ينفراقۇرىلىمى مەن قاۋىپسىزدىك قىزمەتتەرىنە تۇسەتىن اۋىرتپالىقپەن بايلانىستى ەكەنىن اتاپ ءوتتى.
تۇركيانىڭ كولىك جانە ينفراقۇرىلىم ءمينيسترى ابديۋلكادير ۋرالوعلىنىڭ ايتۋىنشا، الىمداردان تۇسكەن قاراجات جاعالاۋ كۇزەتى، قۇتقارۋ جانە مەديتسينالىق قىزمەتتەر جۇمىسىن قارجىلاندىرۋعا، سونداي-اق سۋداعى اپاتتاردىڭ سالدارىن جويۋعا جۇمسالادى.
2024-جىلدىڭ سوڭىنا قاراي 51 مىڭنان استام كەمە بۇعازداردان ءوتىپ، جالپى سوماسى 227 ميلليون دوللار الىم تولەندى. جاڭا تاريف مەملەكەت بيۋجەتىنە بۇدان دا كوپ كىرىس اكەلۋى ءتيىس.
بۇل ارادا ساراپشىلار تۇركيانىڭ تاريف ساياساتىن قايتا قاراۋ ارقىلى تەك شىعىننىڭ ورنىن تولتىرىپ قانا قويماي، ماڭىزدى ەكونوميكالىق جانە ستراتەگيالىق رەسۋرس رەتىندە بۇعازداردىڭ ءرولىن كۇشەيتۋدى كوزدەپ وتىرعانىن اتاپ ءوتتى.
بۇعان دەيىن بيىلعى جىلدىڭ 1-شىلدەسىنەن باستاپ تۇركيانىڭ ستراتەگيالىق ماڭىزى بار بوسفور جانە داردانەلل بۇعازدارى ارقىلى كەمەلەردىڭ ءوتۋ تاريفى تاعى دا كوتەرەتىنىن جازعان بولاتىنبىز.
ايتا كەتەلىك تۇركيادا 50 مىڭنان استام ادام ەۆاكۋاتسيالانعان ەدى.
