تەھراندا قازاق اقىنىنىڭ پارسى تىلىنە اۋدارىلعان پوەماسىنىڭ تانىستىرىلىمى ءوتتى - شەتەلدەگى قازاق باسپا ءسوزى
Kazinform شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
ش ى ۇ ەلدەرىنىڭ دەنساۋلىق ساقتاۋ مينيسترلەرى قازاقستاندا باس قوستى - TRT
قازاقستاننىڭ باس قالاسى استانادا شانحاي ىنتىماقتاستىق ۇيىمىنا (ش ى ۇ) مۇشە ەلدەردىڭ دەنساۋلىق ساقتاۋ مينيسترلەرى باس قوستى، دەپ حابارلايدى تۇركيا راديو تەلەۆيزيا پورتالى.
اتاپ ايتقاندا، ءۇندىستان، قىتاي، يران، پاكىستان، رەسەي، قىرعىزستان، وزبەكستان جانە تاجىكستان دەنساۋلىق ساقتاۋ مينيسترلەرى مەن رەسمي تۇلعالارى قازاقستان دەنساۋلىق ساقتاۋ ءمينيسترى اقمارال ءالنازاروۆانىڭ ۇيىمداستىرۋىمەن «سيفرلىق ۇكىمەت» كەڭسەسىندە وتكەن ش ى ۇ ەلدەرى دەنساۋلىق ساقتاۋ مينيسترلەرى كەڭەسىنىڭ 7-شى وتىرىسىنا قاتىستى.
تۇركيالىق ب ا ق-تىڭ مالىمەتىنشە، استاناداعى جينالىسقا سونداي-اق ش ى ۇ باس حاتشىسىنىڭ ورىنباسارى نۇرلان نيازاليەۆ جانە دۇنيەجۇزىلىك دەنساۋلىق ساقتاۋ ۇيىمىنىڭ ەۋروپاداعى ايماقتىق ديرەكتورى حانس كليۋگە دە قاتىسقان.
شيانداعى قازاقستاندىق تەرمينالدان كونتەينەرلىك پويىز ازەربايجانعا 11 كۇندە كەلدى - «حالىق گازەتى»
وسى جىلدىڭ 11-ناۋرىزىندا باكۋدە ق ر پرەزيدەنتى ق. توقايەۆتىڭ ءازىربايجانعا مەملەكەتتىك ساپارى بارىسىندا شيان قالاسىنداعى (قىتاي) جاڭا قازاقستاندىق كولىك-لوگيستيكالىق تەرمينالدان كونتەينەرلىك پويىزدىڭ كەلۋى بويىنشا تەلەكوپىر ءوتتى. بۇل تۋرالى قىتايدىڭ «حالىق گازەتى» باسىلىمى «Rail-news.kz»-گە سىلتەمە جاساپ حابارلايدى.
پويىز اپشەرون (ازەربايجان) ستانسياسىنا قازاقستان ارقىلى ترانسكاسپي حالىقارالىق كولىك باعدارى (ت ح ك ب) بويىنشا ترانزيتپەن كەلىپ جەتكەن.
اقپارات كوزىنىڭ دەرەگىنشە، كونتەينەرلىك قۇرام شامامەن 7 مىڭ شاقىرىمدى ارتقا تاستاپ، 11 كۇندە ءجۇرىپ ءوتتى. قازاقستان بويىنشا التىنكولدەن اقتاۋ پورتىنا دەيىنگى قاشىقتىق 3128 ك م قاشىقتىقتى پويىز ءۇش تاۋلىكتە ءجۇرىپ وتكەن. مۋلتيمودالدى تاسىمالداۋ بارىسىندا كونتەينەرلەر قازاقستاندا ەكى رەت - «KTZE Khorgos Gateway» قۇرعاق پورتىندا جانە اقتاۋ تەڭىز پورتىندا قايتا تيەلدى، سودان كەيىن كاسپي تەڭىزى ارقىلى باكۋ حالىقارالىق ساۋدا پورتىنا، سول جەردەن - اپشەرون ستانسياسىنا جەتكىزىلگەن.
ايتا كەتەيىك، بۇرىن قىتايدان قارا تەڭىز پورتتارىنا جەتكىزىلىم 53 كۇن بولسا، قازىر - 18 كۇنگە قىسقارعان.
شاكارىمنىڭ ايگىلى پوەماسى پارسى تىلىنە اۋدارىلىپ، تەھراندا تانىستىرىلىمى ءوتتى - «Parstoday»
يران كۇنتىزبەسىندە 21 ەسفاند (11-ناۋرىز) نيزامي گاندجاۆيدى ۇلىقتاۋ كۇنى دەپ بەلگىلەنگەن. سول 11-ناۋرىز كۇنى تەھراندا ورنالاسقان ەكونوميكالىق ىنتىماقتاستىق ۇيىمىنىڭ مادەني ينستيتۋتىندا شاكارىم قۇدايبەردى ۇلىنىڭ «ءلايلى- ءماجنۇن» پوەماسىنىڭ پارسى تىلىندەگى نۇسقاسىنىڭ تانىستىرىلىمى ءوتتى، دەپ حابارلايدى «Parstoday».
وسى اتاۋلى كۇنگە وراي وتكەن «نيزاميمەن ۇيلەسكەن جۇرەك كۇيى» (ءنازم- ە دەل با نيزامي) اتتى سەميناردا ە ى ۇ مادەني ينستيتۋتىنىڭ ديرەكتورى سااد حان مىرزا، ءال-فارابي اتىنداعى قاز ۇ ۋ پروفەسسورى ءارى «تۇران- يران» زەرتتەۋ ورتالىعىنىڭ ديرەكتورى دوكتور يسلام جەمەنەي، تاشكەنت مەملەكەتتىك شىعىستانۋ ۋنيۆەرسيتەتى دوكتورى قاتارلى ءبىرقاتار ەلدەردەن كەلگەن عالىمدار ءسوز سويلەدى.
سەمينار سوڭىندا ەكى كىتاپ - شاكارىمنىڭ «ءلايلى- ءماجنۇن» پوەماسى مەن شاحين بۇحارايدىڭ «ءلايلى- ءماجنۇن» كىتابىنىڭ پارسى تىلىندەگى نۇسقالارىنىڭ تۇساۋى كەسىلدى.
ايتا كەتەيىك، شاكارىمنىڭ «ءلايلى- ءماجنۇن» پوەماسىن قازاق تىلىنەن پارسى تىلىنە اۋدارعان - گاۋحار ومارحانوۆا.
قىتايداعى شاباندوز قازاق قىزى ارمانىن ايتتى - «Harajorga»
قىتايدىڭ ىلە ايماعىنان شىققان كاسىبي شاباندوز قىز ءمۇنيرا سەرىكتۇردى قىزى «اقجەلكەن» اتتى سايگۇلىگىنە ءمىنىپ، ءتۇرلى ءاتۇستى ويىندارىن كورسەتكەندە كوپشىلىكتى تاڭعالدىرماي قويمايدى، دەپ جازادى قىتايدىڭ «Harajorga» اقپاراتتىق پاراقشاسى.
اتالعان ب ا ق-تىڭ حابارلاۋىنشا، قىتايدىڭ ىلە ايماعىندا تۋعان ءمۇنيرا كىشكەنتايىنان جىلقى جانۋارىن وزىنە سەرىك ەتىپ، كەڭ جايلاۋدا ات قۇلاعىندا ويناپ وسكەن. اتىنا مىنگەندە بولەكشە وبرازعا كىرىپ، ەرتەگىلەردەگى باتىر قىزدارداي ايباتتى كورىنەتىن شاباندوز ءمۇنيرا قاراپايىم ومىردە وتە ۇياڭ دا بيازى قىز ەكەن.
قازىر شينجاڭ بايىرعى ەكولوگيالىق پاركىندەگى شاباندوز ءارى ات باپكەرى بولىپ جۇرگەن قىز جالعىز وسى ءمۇنيرا عانا. ول تىلشىگە بەرگەن سۇحباتىندا ات سپورتىن قاتتى ۇناتاتىنىن ايتقان.
«ول كۇندەلىكتى «اقجەلكەنىنە» ءمىنىپ ءارتۇرلى ات ءۇستى ويىندارىن قويىپ، كوپشىلىكتىڭ كوڭىلىنەن شىققاندى ماقتانىش سەزىنەدى. م. سەرىكتۇردى قىزى قولى بوساي قالعان ساتتە «اقجەلكەنىن» جەتەلەپ سەرۋەندەگەندى ۇناتادى. ونىڭ ارمانى كوپتەگەن ات سپورتى ويىندارىنا قاتىناسىپ، ۇلكەن ساحنالاردان كورىنۋ ءارى جانكۇيەرلەرىنە شىڭجاڭدىق سايگۇلىكتەردى باپتاپ مىنەتىن شاباندوز قىزداردىڭ كاسىبيلىگىن مويىنداتۋ»، - دەپ جازادى قىتايلىق ب ا ق.
«دۋدار-اي» ءانىن ورىنداعان سىبە ۇلتىنىڭ وكىلى جۇرت نازارىن اۋداردى - CNR
14-بۇكىلقىتايلىق حالىق وكىلدەرى جينالىسى وكىلىنىڭ «دۋدار-اي» ءانىن ورىنداعان ۆيدەوسى الەۋمەتتىك جەلىدە كەڭىنەن تارالىپ، جۇرتتىڭ نازارىن اۋداردى، دەپ حابارلايدى قىتايدىڭ «ورتالىق حالىق راديوسى».
ءاندى ورىنداۋشى ىلە وبلىسىنا قاراستى شاپشال سىبە اۆتونوميالى اۋدانى، شاپشال قالاشىعى پارتيا كوميتەتىنىڭ ورىنباسار ءتوراعاسى، قالاشىق باستىعى كۇڭ فيفي ەسىمدى ازاماتشا ەكەن.
كۇڭ فيفي ءوز ۇلتى باسقا بولسا دا قازاقتارمەن ءجيى ارالاسىپ تۇراتىنىن، سونىڭ ارقاسىندا «دۋدار-اي» ءانىن ۇيرەنگەنىن ايتادى.
«ءبىزدىڭ قالاشىققا قاراستى ۇزىنبۇلاق دەيتىن قىستاق بار، بۇل قىستاق اۆتونوميالى ولكە بويىنشا ەڭ ۇلگىلى قىستاق. وندا نەگىزىنەن قازاق ۇلتى قونىستانعان. مەن وسى تۇرعىنداردىڭ ۇيىنە كوپ بارامىن، «دۋدار-اي» ءانىن سولاردان ۇيرەندىم»، - دەيدى كۇڭ فيفي.
«التايىم» كانن تەلەدراما فەستيۆالىندە «ۇزدىك ۇزاق مەتراجدى دراما» تىزىمىنە ەندى - «جەنمين جيباو»
7-كانن تەلەدراماتۋرگيالىق فەستيۆالىندە شينجاڭدىق جازۋشىنىڭ رومانى بويىنشا تۇسىرىلگەن «التايىم» اتتى شاعىن تەلەحيكايا «ۇزدىك ۇزاق مەتراجدى دراما» بايقاۋىنىڭ ىرىكتەۋ تىزىمىنە ەندى. بۇل تۋرالى وسى اپتادا «جەنمين جيباو» باسىلىمى حابارلادى.
قىتايلىق باسىلىمىنىڭ مالىمەتىنشە، كانن تەلەدراما فەستيۆالىنىڭ نەگىزگى بايقاۋىنىڭ ىرىكتەۋ تىزىمىنە ەنگەن «التايىم» فيلمىنىڭ تۇساۋكەسەرى 7-ءساۋىر كۇنى كانن قالاسىندا وتەدى.
بايقاۋدا اتالعان تۋىندى 5 باستى جۇلدە ءۇشىن الەمنىڭ باسقا ەلدەرى مەن ايماقتارىنىڭ 7 دراماسىمەن باسەكەگە تۇسەدى.
ايتا كەتەيىك، «التايىم» - شينجاڭدىق جازۋشى لي جۋاننىڭ شىعارماسى بويىنشا تۇسىرىلگەن 8 ءبولىمدى شاعىن تەلەحيكايا. ونىڭ پروديۋسەرى داپەن، رەجيسسەرى تىڭ كوڭكوڭ. باستى رولدەردى ما يلي، جوۋ يران، يۋ شي، ءالىمجان، ءاليما، قايرات جانە ت. ب. ونەر ادامدارى سومدايدى.
وزبەكستان پرەزيدەنتى قازاقستان پرەمەر-ءمينيسترىن قابىلدادى- «ءوز ا»
وزبەكستان رەسپۋبليكاسىنىڭ پرەزيدەنتى شاۆكات ميرزيەيەۆ 15-ناۋرىز كۇنى قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ باستاعان ۇكىمەتتىك دەلەگاتسيانى قابىلدادى. بۇل تۋرالى وزبەكستاندىق «ءوز ا» اقپاراتتىق اگەنتتىگى حابارلادى.
وزبەكستاندىق ب ا ق-تىڭ دەرەگىنشە، مەملەكەت باسشىسى ق ر پرەمەر-مينيستر ولجاس بەكتانوۆتى جاقىندا وسى قىزمەتكە تاعايىندالۋىمەن شىن جۇرەكتەن قۇتتىقتاپ، جاۋاپتى قىزمەتىندە تولاعاي تابىستار تىلەگەن.
ءوز كەزەگىندە قازاقستان ۇكىمەتىنىڭ باسشىسى وزبەكستان پرەزيدەنتىنە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ سالەمى مەن ىزگى تىلەگىن جەتكىزدى.
كەزدەسۋدە وزبەكستان مەن قازاقستان اراسىنداعى كوپجاقتى ارىپتەستىكتى ودان ءارى كەڭەيتۋ ماسەلەلەرى قارالدى. اتاپ ايتقاندا، بولاشاقتا جوعارى دەڭگەيدەگى بىرلەسكەن ءىس-شارالارعا دايىندىق اياسىندا ىنتىماقتاستىقتىڭ جاڭا كۇن ءتارتىبىن قالىپتاستىرۋعا ەرەكشە نازار اۋدارىلعان.
وزبەكستان پرەزيدەنتى وزبەكستان مەن قازاقستان اراسىنداعى ءوزارا ءتيىمدى ىنتىماقتاستىقتى تۇبەگەيلى كەڭەيتۋ ماقساتىندا ۇكىمەتتىك دەڭگەيدە تىعىز جانە جۇيەلى قارىم-قاتىناستاردى جالعاستىرۋدىڭ ماڭىزدىلىعىن اتاپ ءوتتى.
اۆتور
بەيسەن سۇلتان ۇلى
