تەگەران ورمۋز بۇعازى ارقىلى وتەتىن كەمەلەرگە باج سالىعى مەن شەكتەۋلەر ەنگىزدى

جاڭا تارتىپكە سايكەس، ا ق ش- پەن، يزرايلمەن نەمەسە بۇعان دەيىن يرانعا قارسى ءبىرجاقتى سانكتسيالار ەنگىزگەن ەلدەرمەن بايلانىستى كەمەلەردىڭ بۇعاز ارقىلى وتۋىنە تىيىم سالىنادى. باج سالىعىن يران ريالىمەن تولەۋ تالاپ ەتىلەدى.

بۇعان دەيىن ا ق ش پەن ءيزرايلدىڭ اسكەري وپەراتسياسى باستالعاننان كەيىن يران بۇعازدى جاۋىپ، كوممەرتسيالىق كەمەلەر بىرنەشە رەت ۇشقىشسىز اپپاراتتاردىڭ شابۋىلىنا ۇشىراعان ەدى.

25 - ناۋرىزدان باستاپ بۇعاز ارقىلى تەك «دوستاس ەلدەردىڭ» كەمەلەرىنە عانا وتۋگە رۇقسات بەرىلدى. ولاردىڭ قاتارىندا رەسەي، ءۇندىستان، يراك، قىتاي جانە پاكىستان بار.

ەسكە سالايىق، 22 - ناۋرىزدا ا ق ش پرەزيدەنتى دونالد ترامپ يرانعا ورمۋز بۇعازىن اشۋ ءۇشىن 48 ساعات ۋاقىت بەرگەن ەدى. ول ەگەر بۇعاز كەمە قاتىناسى ءۇشىن اشىلماسا، ا ق ش قارۋلى كۇشتەرى بەلگىلى ءبىر نىساندارعا سوققى جاسايتىنىن ەسكەرتكەن.

الەمدىك مۇناي تۇتىنۋىنىڭ شامامەن 20 پايىزى، ياعني تاۋلىگىنە شامامەن 20 ميلليون باررەل مۇناي وتەتىن ورمۋز بۇعازى مۇناي جەتكىزۋ تۇرعىسىنان ستراتەگيالىق ماڭىزعا يە. الايدا قازىرگى كەزدە بۇل بۇعازداعى قوزعالىس ءىس جۇزىندە توقتاپ قالعان.

21 - ناۋرىزدا امەريكا قۇراما شتاتتارى 20 - ناۋرىزعا دەيىن تانكەرلەرگە تيەلگەن يران مۇنايىن ساتۋ جانە تاسىمالداۋ وپەراتسيالارىن جۇرگىزۋگە رۇقسات بەردى. ءتيىستى شەشىم شەتەلدىك اكتيۆتەردى باقىلاۋ باسقارماسى جاريالاعان باس ليتسەنزيادا بەكىتىلگەن.