ترامپ وسى جولى جەڭىلىپ قالسا، پرەزيدەنت سايلاۋىنا قايتا تۇسپەيدى

استانا. KAZINFORM – ا ق ش- تىڭ بۇرىنعى پرەزيدەنتى جانە پرەزيدەنتتىككە ۇمىتكەر دونالد ترامپ جەكسەنبى كۇنى قاراشاداعى سايلاۋدا جەڭىلىپ قالسا، سايلاۋعا قايتا تۇسپەيتىنىن مالىمدەدى، دەپ حابارلايدى BBC.

Sinclair Broadcast Group TV- ءنىڭ Full Measure تەلەباعدارلاماسىنىڭ جۇرگىزۋشىسى سۇحباتىندا ودان قاراشا ايىندا كامالا حارريستەن جەڭىلىپ قالسا، 2028-جىلى پرەزيدەنتتىككە تاعى ۇمىتكەر بولا ما، جوق پا، سونى سۇرادى.

«جوق. مەنىڭ ويىمشا، وسىمەن ءبىتتى. مەن ءوزىمدى (قايتادان سايلاۋعا قاتىسقانىمدى) مۇلدە كورىپ تۇرعانىم جوق… وتە جاقسى جۇمىس ىستەيمىز دەپ ۇمىتتەنەمىن»، - دەيدى 78 جاستاعى ترامپ.

ا ق ش- تا زاڭ بويىنشا ادام ەكى مەرزىمنەن ارتىق پرەزيدەنت بولا المايدى، سوندىقتان ول جەڭسە، 2028-جىلى سايلاۋعا قايتا تۇسە المايدى.

بۇعان دەيىن ترامپ سايلاۋدا جەڭىلۋ مۇمكىندىگى تۋرالى وتە سيرەك ايتاتىن - ول ءارقاشان ءوز جاقتاستارىنا سويلەگەن سوزىندە جانە الەۋمەتتىك جەلىلەردەگى جازبالارىندا الداعى جەڭىسىن سەنىمدى تۇردە جاريالاپ كەلدى.

ءبىراق سوڭعى ءتورت كۇندە ول جەڭىلۋ ىقتيمالدىعى تۋرالى ەكى رەت ايتتى.