ترامپ ونداعان ەلگە، سونىڭ ىشىندە قازاقستانعا قاتىستى باج سالىعىن ەنگىزدى
استانا. KAZINFORM - ا ق ش پرەزيدەنتى دونالد ترامپ ءبىرقاتار ەلدەرگە، سونىڭ ىشىندە قازاقستانعا دا جاڭا كەدەندىك باج سالىعىن ەنگىزدى. ول قول قويعان جارلىق اق ءۇيدىڭ سايتىندا جاريالانعان.
تىزىمدە 70 كە جۋىق مەملەكەت پەن ەۋروپالىق وداق اتالعان. يمپورتتىق باج سالىعىنىڭ كولەمى 10 نان 41 پايىزعا دەيىن وزگەرەدى. ەڭ جوعارى تاريفتەردىڭ كەيبىرى سيرياعا (%41)، لاوس پەن ميانماعا (%40) جانە شۆەيتسارياعا (%39) بەلگىلەنگەن.
قازاقستان ءۇشىن بۇل كورسەتكىش 25 پايىز.
ە و، جاپونيا جانە وڭتۇستىك كورەيا ءۇشىن %15 كولەمىندە قوسىمشا اقى قاراستىرىلعان.
تىزىمدە جوق ەلدەر ءۇشىن %10 مولشەرىندەگى ءبىرىڭعاي تاريف قولدانىلادى.
باج سالىعى بۇرىن كۇتىلگەندەي 1-تامىزدا ەمەس، 7-تامىزدا كۇشىنە ەنەدى، ويتكەنى جاڭا ەرەجەلەردى ەنگىزۋ ءۇشىن كوبىرەك ۋاقىت قاجەت.
اق ءۇي قۇجاتىنا سايكەس، شارا «امەريكالىق جۇمىسشىلاردىڭ مۇددەلەرى ءۇشىن جاھاندىق ساۋدانى قايتا قۇرىلىمداۋعا» باعىتتالعان.
7-شىلدەدە دونالد ترامپ Truth Social الەۋمەتتىك جەلىسىندە قازاقستان پرەزيدەنتى قاسىم- جومارت توقايەۆقا جولداعان حاتتى جاريالاپ، ا ق ش-تىڭ 1-تامىزدان باستاپ قازاقستاننان كەلەتىن بارلىق يمپورتقا 25 پايىزدىق كەدەندىك باج سالىعىن ەنگىزەتىنىن حابارلادى.
Truth Social الەۋمەتتىك جەلىسىندە جاريالانعان حاتتا ترامپ 1-تامىزدان باستاپ ا ق ش قازاقستاننان ا ق ش-قا جەتكىزىلەتىن بارلىق يمپورتقا 25 پايىزدىق يمپورتتىق باج سالىعىن ەنگىزەتىنىن مالىمدەدى. دونالد ترامپ قازاقستانمەن ساۋدا قاتىناستارىنىڭ ماڭىزدىلىعى مەن بەرىكتىگىن اتاپ ءوتتى. سونداي-اق ول ساۋدا تاپشىلىعىنا قاراماستان قازاقستانمەن ىنتىماقتاستىققا دايىن ەكەنىن اتاپ ءوتتى.
ءساۋىر ايىندا ترامپ مەملەكەتتەرگە بارلىق سالانى قامتيتىن باج سالىعىن ەنگىزۋدى جوسپارلاپ وتىرعانىن جازعان ەدىك.
كەيىن قازاقستان رەسپۋبليكاسى ساۋدا جانە ينتەگراتسيا مينيسترلىگىنىڭ ا ق ش-تىڭ ءبىرقاتار تاۋارعا جاڭا كەدەندىك باجدار ەنگىزۋىنە قاتىستى مالىمدەمەسى جاريالاندى.
- بۇل رەتتە قازاقستاندىق ەكسپورتتىڭ باسىم بولىگى جاڭا تاريفتەردەن بوساتۋعا بايلانىستى جاڭا باج سالىعىنسىز جەتكىزىلە بەرەدى. بۇل نەگىزگى شيكىزات پەن ستراتەگيالىق تاۋارلار - مۇناي، ۋران، كۇمىس، فەرروقورىتپا، تانتال مەن تيتانعا قاتىستى. ەسەپتەۋ بويىنشا، قابىلدانعان شارالار قازاقستاننىڭ ا ق ش-قا ەكسپورتىنىڭ 95 پايىزعا جۋىعىنا اسەر ەتپەيدى، - دەپ حابارلادى ۆەدومستۆو.
