ترامپ ا ق ش ەنەرگەتيكا ءمينيسترى قىزمەتىنە Liberty Energy مۇناي كومپانياسىنىڭ باسشىسىن ۇسىنباق
ا ق ش- تىڭ جاڭادان سايلانعان پرەزيدەنتى دونالد ترامپ ەلدىڭ ەنەرگەتيكا ءمينيسترى قىزمەتىنە Liberty Energy مۇناي كومپانياسىنىڭ باسشىسى كريس رايتتىڭ كانديداتۋراسىن ۇسىنباق، دەپ حابارلايدى ت ا س س اگەنتتىگى.
- كريس - ەنەرگەتيكا سالاسىنداعى جەتەكشى تەحنولوگ ءارى كاسىپكەر. ول يادرولىق، كۇن، گەوتەرمالدىق جانە مۇناي- گاز ەنەرگەتيكاسىندا جۇمىس ىستەدى، - دەدى سايلانعان پرەزيدەنتتىڭ وتپەلى توبى سەنبىدە جاساعان مالىمدەمەسىندە.
قۇجاتتا رايتتىڭ ترامپ جۇما كۇنى جاريالاعان ۇلتتىق ەنەرگەتيكالىق كەڭەسكە دە قوسىلاتىنى ايتىلعان. بۇل كەڭەستى سولتۇستىك داكوتا گۋبەرناتورى دۋگلاس بەرگۋم باسقاراتىن بولادى، ول بۇعان دەيىن ىشكى ىستەر مينيسترلىگىنىڭ باسشىسى لاۋازىمىنا ۇسىنىلعان.
امەريكالىق ب ا ق اتاپ وتكەندەي، رايت ترامپ سياقتى مۇناي ءوندىرۋدى ارتتىرۋدى جاقتايدى جانە قازبالى وتىندى پايدالانۋ قاجەتتىگىنە سەنىمدى.
«الەم مۇناي مەن گازدا ءومىر سۇرەدى جانە بىزگە ولار قاجەت» ، - دەدى ول 2023 -جىلى CNBC- گە بەرگەن سۇحباتىندا.
رايت ترامپقا كليماتتىڭ وزگەرۋىنە قارسى كۇرەستە جاھاندىق ىنتىماقتاستىقتان باس تارتۋدا قولداۋ كورسەتەدى دەپ كۇتىلۋدە، ويتكەنى Liberty Energy باسشىسى پارنيكتىك گازدار شىعارىندىلارى پلانەتانىڭ تەمپەراتۋراسىن كوتەرىپ، تابيعي اپاتتار تۋعىزاتىنىنا سەنبەيدى.
ەنەرگەتيكا ءمينيسترى لاۋازىمىن قازىرگى ۋاقىتتا دجەننيفەر گرانحولم اتقارادى. ا ق ش- تىڭ ەنەرگەتيكا مينيسترلىگى ەلدىڭ يادرولىق اسكەري كەشەنىنە جاۋاپتى.
