ەتنيكالىق قازاق وزبەكستانداعى بىرەگەي تەاتردىڭ ديرەكتورى بولىپ تاعايىندالدى

استانا. KAZINFORM - مادەنيەت ءمينيسترى وزودبەك نازاربەكوۆتىڭ ءتيىستى بۇيرىعىنا سايكەس، وزبەكستانداعى بىرەگەي ونەر ورداسى - الىشەر ناۋاي اتىنداعى وزبەكستان مەملەكەتتىك اكادەميالىق ۇلكەن تەاترىنىڭ ديرەكتورى بولىپ الىبەك قابدىراحمانوۆ تاعايىندالدى. بۇل تۋرالى مادەنيەت مينيسترلىگىنىڭ باسپا ءسوز قىزمەتى حابارلادى.

29-شىلدە كۇنى مينيسترلىك عيماراتىندا وزبەكستان مادەنيەت ءمينيسترى وزودبەك نازاربەكوۆتىڭ توراعالىعىمەن كەزەكتەن تىس جيىن ءوتتى. جيىندا ۇيىمداستىرۋ ماسەلەلەرى تالقىلاندى. جيىنعا ءمينيستردىڭ ءبىرىنشى ورىنباسارى اۆازحون توجيحونوۆ، مينيسترلىكتىڭ ورتالىق اپپاراتىنىڭ وكىلدەرى، وڭىرلىك ستۋديالاردان سالا وكىلدەرى قاتىستى.

جيىن بارىسىندا وزبەكستاننىڭ الىشەر ناۋاي اتىنداعى مەملەكەتتىك اكادەميالىق ۇلكەن تەاترىنىڭ ديرەكتورى، وزبەكستاننىڭ حالىق ءارتىسى راميز ۋسمونوۆتىڭ باسقا جۇمىسقا اۋىسۋىنا بايلانىستى مادەنيەت ءمينيسترىنىڭ ءتيىستى بۇيرىعىمەن تەاتر ديرەكتورى قىزمەتىنە تاعايىندالعان الىبەك قابدىراحمانوۆ ۇجىمعا تانىستىرىلدى.

مينيستر وزودبەك نازاربەكوۆ الىبەك قابدىراحمانوۆتىڭ جۇمىسىنا ساتتىلىك تىلەپ، ونىڭ ءبىلىمى مەن تالانتىن سالانى دامىتۋعا جۇمسايتىنىنا سەنىم ءبىلدىردى.

ءمينيستردىڭ ءبىرىنشى ورىنباسارى اۆازحون توجيحونوۆ تا الىبەك قابدىراحمانوۆتى جاڭا قىزمەتكە تاعايىندالۋىمەن قۇتتىقتاپ، قىزمەتىنە تابىس تىلەدى.

الىبەك قابدىراحمانوۆ 1984 -جىلى تاشكەنتتە دۇنيەگە كەلگەن. ەتنيكالىق قازاق. وزبەكستان مەملەكەتتىك كونسەرۆاتورياسىنىڭ «ۇرمالى اسپاپتار» فاكۋلتەتىندە وقىعان.

جەتىستىكتەرى:

مادەنيەت سالاسىنداعى «تاساننو» سىيلىعىنىڭ 2 دۇركىن لاۋرەاتى (وزبەكستان، 2005، 2007)
«شابىت» حالىقارالىق بايقاۋىنىڭ گران-پري يەگەرى (استانا، قازاقستان، 2007 ج. )
«EMCY Art for music Prize» حالىقارالىق بايقاۋىنىڭ «وركەسترمەن ەڭ جاقسى ورىنداۋى ءۇشىن» نوميناتسياسى بويىنشا ارنايى جۇلدە (گەرمانيا، 2006 ج. )
ميۋنحەندەگى «EMCY Art for music Prize» حالىقارالىق بايقاۋىنىڭ 2-ورىن يەسى (گەرمانيا، 2006 ج. )
استانادا وتكەن حالىقارالىق «شابىت» بايقاۋىنىڭ 2-ورىن يەسى(قازاقستان، 2004 ج. )
نيكولاي ستاسينەۆيچ اتىنداعى 2-حالىقارالىق كونكۋرستىڭ ديپلومانتى، ۆارشاۆا، (پولشا، 2004 ج.)
جەنيەۆاداعى 57-حالىقارالىق بايقاۋدىڭ ديپلومانتى (شۆەيتساريا، 2002 ج.)
رەسپۋبليكالىق جاس ورىنداۋشىلار بايقاۋىنىڭ ديپلومانتى (وزبەكستان، 2001 ج.)
ديرەكتور بولىپ تاعايىندالعانعا دەيىن وزبەكستانعا ەڭبەك سىڭىرگەن ءارتىس الىبەك قابدىراحمانوۆ وزبەكستان مەملەكەتتىك فيلارمونياسىنىڭ ۇلتتىق سيمفونيالىق وركەسترىنىڭ باس ديريجەرى بولىپ ىستەگەن.

ەسكە سالا كەتەيىك، وزبەكستاندىق قازاق بوكسشى Golden Boy پروموۋشەنىمەن كەلىسىمشارتقا وتىرعانى جايلى جازعان ەدىك.

اۆتور

بەگابات ۇزاقوۆ